1 ივლისიდან ცვლილებები საგზაო მოძრაობის შესახებ კანონში ძალაში შედის. ეს არის დღე, რომელსაც თითოეული ჩვენთაგანი ველოდით. რადგან ის რაც ჩვენს გზებზე ჯერ კიდევ ხდება, თითოეულ ჩვენთაგანს გვეხება. გვეხება იმიტომ, რომ ჩვენი კეთილდღეობა და წარმატება ერთმანეთის კარგად ყოფნაზე არის დამოკიდებული. სამწუხაროდ ეს ყოველთვის მეც არ ვიცოდი და მხოლოდ მაშინ გავიაზრე, როცა ერთ-ერთი ავტოსაგზაო შემთხვევის მონაწილე თავადაც გავხდი. მას შემდეგ საგზაო უსაფრთხოების უზრუნველყოფაში საკუთარი წვლილის შეტანა ჩემი ცხოვრების ერთ-ერთ უმთავრეს მიზნად დავისახე და სხვა გამოწვევებთან ერთად, ეს იყო ჩემი მოტივაციაც, როცა პარლამენტის არჩევნებში ვიღებდი მონაწილეობას.
საკმაოდ შრომატევადი სამუშაო იყო გაწეული და მინდა მადლობა ვუთხრა ყველას, ვინც ამ პროცესში იყო ჩართული - ცვლილებების ინიცატორებს, შინაგან საქმეთა სამინისტროს, ყველა იმ ექსპერტს, დაინტერესებულ პირს და კანონმდებელს, ვინც თავისი წვლილი შეიტანა საერთო საქმეში. ეს არის სამართლიანი, პროპორციული და შედეგზე გათვლილი ცვლილებების პაკეტი, რომლის სიკეთეც უსწრაფესად აისახება თითოეული ჩვენთაგანის უსაფრთხოებასა და კეთილდღეობაზე.
მაგრამ როგორი სამართლიანიც არ უნდა იყოს კანონი, ეს ჩვენ არ გვათავისუფლებს პასუხისმგელობისგან გავუფრთხილდეთ როგორც საკუთარ, ასევე, ერთმანეთის ცხოვრებასა და ჯანმრთელობას. ჩვენი სიცოცხლე მარტო ჩვენ არ გვეკუთნის, ის ჩვენი ქვეყნის, ჩვენი საზოგადოების, ჩვენი მომავლის კუთვნილებაც არის.
ჩემო მეგობრებო, როცა ერთი ადამიანი ყვება ავტოავარიაში, ამით ზარალდება ჩვენი სამშობლო. საქართველოში დაიწყო ზაფხულის სეზონი და სამწუხაროდ წელიწადის ამ დროს ავტოსაგზაო შემთხვევების სტატისტიკა მატულობს. მე განსაკუთრებით მტკივნეულად ვრეაგირებ თითოეულ ასეთ შემთხვევაზე, რადგან არ მაქვს სურვილი ვინმემ, ეს გზა ისევ გაიაროს, მით უფრო, რომ ბევრს ამის შანსიც აღარ ეძლევა. ამიტომ თითოეულ ჩვეგანს მეტი ყურადღება და სიფხიზლე გვმართებს.
მე მინდა ჩემს თანამოქალაქეებს ვუთხრა, რომ ჩვენ ერთმანეთის გაფრთხილება და ერთმანეთზე ზრუნვა შეგვიძლია არა მხოლოდ მაშინ, როცა ჩვენს ოჯახებში, ან ჩვენს მეგობრებთან ერთად ვიმყოფებით, ან სულაც ვმუშაობთ ჩვენი ქვეყნის და საქმის საკეთილდღეოდ არამედ მაშინაც, როცა გზებზე საკუთარი ავტომობილებით გადავაადგილდებით. ცხოვრება ისედაც ხანმოკლეა და ჩვენ არსად არ გვეჩქარება, გზა დავუთმოთ ქვეითებს, გზა დავუთმოთ ერთმანეთს, დავიცვათ მოძრაობის წესები, რადგან ამით შეიძლება ისე, რომ სულაც არ ვიცოდეთ, ჩვენ ერთმანეთის სიცოცხლეს გადავარჩენდეთ.
Информация по комментариям в разработке