Скачать или смотреть Maulana Mohamad Mehdi Zaidpuri Ep.101 مولانا محمد مہدی زید پور

استاد الواعظین سیّد المحققین مولانا سید محمد مہدی رضوی 5/فروری سن 1897 عیسوی کو زیدپور ضلع بارہ بنکی صوبہ اترپردیش میں پیدا ہوئے آپکے والد مولانا عطا محمد زیدپوری کا شماراپنے وقت کے جید علماء میں ہوتا تھا۔ مولانا عطا محمد نے اپنا تبلیغی مرکز حیدرآباد کو قرار دیا اور نظام حیدرآبادی کے یہاں استاد کی حیثیت سے مصروف عمل تھے۔
آپ نے ابتدائی تعلیم زیدپور کے مکتب ناصر الایمان اور عربی ، فارسی کی تعلیم مولوی مونس حسین اور مولوی یونس حسین سے حاصل کی۔
سیّد المحققین نے اپنے والد کی وفات کے بعد اپنے نانا مولانا شمشاد حسین آثم زید پوری کے ہمراہ حیدر آباد دکن کا سفر کیااور وہاں رہ کر اپنے نانا کے علاوہ مولانا مہدی حسن اور مولانا احمد حسین سے کسب فیض کیا ۔
استاد الواعظین نے حیدرآباد ترک کرنے کے بعد لکھنؤ کا رخ کیا اور وہاں کی مشہور درسگاہ" سلطان المدارس" میں داخلہ لے کر جیداساتذہ سے کسب فیض کیا جن میں مولانا محمد رضا فلسفی، مولانا مولانا محمد ہادی، باقرالعلوم آیت اللہ محمد باقر ، خطیب اعظم مولانا سبط حسن وغیرہ کے نام سر فہرست ہیں ۔ سلطان المدارس سے تعلیم مکمل کرنے کے بعد مزید حصول علم کی غرض سے مدرسة الواعظین میں داخلہ لیا۔ موصوف واعظین کے سب سے پہلے طالب علموں سے تھے جنہیں واعظ بننے کا شرف حاصل ہوا۔ آپ تعلیم مکمل کرنے کے بعد تبلیغ و تدریس میں مصروف ہوگئے۔ موصوف نے برما رنگون اور دیگر مقامات کے سفر کئے۔ اسی زمانے میں مولانا سبط حسن نے آپکو عشرہ محرم میں رنگون عشرہ مجالس کو خطاب کرنے کی غرض سے بھیجا۔ دوسال کراچی میں عشرہ محرم کو خطاب کیااسکے بعد پینتالیس سال تک مسلسل چک الہ آباد میں عشرہ محرم الحرام خطاب کیا آپ ہر سال ایک نئے عنوان کے ساتھ مجالس خطاب سے کرتے تھے۔
موصوف نےپورے ملک میں مجالس خطاب کیں جن میں الہ آباد، ردولی، نانپارہ، فیض آباد، سلطان پور، ریاست حسن پور ،منجھن پور، لکھنؤ ، متوپور، اکبر پور، سیتا پور آپکی ذاکری کے خاص مقامات تھے۔
سیّد المحققین استاد، ذاکر اور مبلغ ہونے کے ساتھ ساتھ شعر و شاعری سے بھی گہرا لگاؤ رکھتے تھے۔ آپ کے اشعار کا مجموعہ کلام ناشاد آپ کی پختہ شاعری کی دلیل ہے۔جس میں مدحیہ غزلیں اور قصیدے دیکھنے کو ملتے ہیں۔
سنہ 1965 عیسوی میں بابائے منطق مولانا شاہ عبدالحسین کی رحلت کے بعد سلطان المدارس میں منطق کے استاد مقرر ہوئے اور عمر کے آخری حصہ تک تدیسی فرائض انجام دیتے رہے۔ موصوف کو شرح ملا صدرا پر کامل عبور تھا اسکی مشکل عبارت کو آسانی سے حل کر دیتے تھے ، مگر طبیعت میں سادگی اور انکساری پائی جاتی تھی طلاب سے انتہائی شفقت و محبت سے پیش آتے تھے۔آپ کے وجود سے سلطان المدارس کا علمی وقار بلند تھا۔ طلاب آپ کے درس میں شرکت کرنے پر فخر محسوس کرتے تھے۔ آپکے شاگردوں کی فہرست کافی طویل ہے جن میں خطیب اکبر مولانا مرزا محمد اطہر اور ڈاکٹر مولانا کلب صادق کے نام سر فہرست ہیں۔ آپ مدرستہ الواعظین کے تاحیات ممتحن رہے۔¬¬¬¬¬
اللہ نے آپ کو 2 فرزند عطا کئے جو مولانا اخلاق مہدی اور محمد وصی زیدپوری کے نام سے پہچانےگئے ۔
یہ علم و عمل کا آفتاب 9/ محرم الحرام ١٤٠١ہجری بمطابق ١٩٨٠ عیسوی کو حسینہ سرکار حسینی میں مجلس کو خطاب کرتے ہوئے غروب ہو گیا۔ چاہنے والوں کا مجمع شریعت کدہ پر امنڈ پڑا، نماز جنازہ مولانا حکیم محمد اکبر کی اقتدا میں ادا کی گئی۔ نماز جنازہ کے بعد ہزار آہ و بکا کے ہمراہ کربلا زیدپور میں سپرد خاک کر دیے گئے۔
ماخوذ از : نجوم الہدایہ، تحقیق و تالیف: و مولانا سید رضی زیدی پھندیڑوی، ج10، ص354 دانشنامۂ اسلام، انٹرنیشنل نورمیکروفلم دہلی، 2024ء
ShiaOlama #Biography #Documentary #Islam #noormicrofilm #ShiaHistory #IslamicVideo