Скачать или смотреть Mike from Campo - Inte 'n abrasso [con sottotitoli in genovese]

MIKE FROM CAMPO

"Inte 'n abrasso"

Ti sciòrti, ti crii che t'ê arivòu;
arvi i euggi, vegne o sô: l'é tutto inluminòu.
No ti capisci cös'a segge ma ti a senti, a sensaçion d'ese ligòu a questa tæra da-i primmi momenti.
A te çerne lê, a te sta apreuvo comm'a fise teu moæ,
e se ti no ti n'æ coæ de sentila, de amiala, de capî, de rispetala, no ti cresci,
no s'ariesce a andâ lontan sensa e reixe.
A sta acoêgâ e se co-i passi ti a calpesti, a no s'araggia, manco co-i foresti;
paizaggi stupendi sciù pe-e seu montæ, disceize e valli verdi bagnæ da-i riæ.
O vento e l'orizonte, e creuze sciù pe-o monte, l'aia da-o mâ: ödô de sâ ch'o se difonde,
finn-a inti paixi de l'entrotæra, finn-a dove se lotava quande gh'ea ancon a goæra.
E l'é coscì che m'atreuvo in scî sentê anando a pê, sciù pe-i bricchi, derê a-a mæ çitæ,
dov'a luxe a l'é speciale co-a seu inmenscitæ, lontan ti veddi o mâ, into mezo a ghe sta Lê.

Desteiza inte 'n abrasso tra i monti e o mâ, l'é chi che me sento a cà.
Co-i seu borghi, e seu bontæ, co-i seu vegi mestê.
Fin da figin gh'ò dæto i primmi respii, mi no poriö ascordala,
perché semmo comme prie inta terassa da seu stöia milenaia.

Çimme inevæ, t'ê in riparo a l'inverno, quande o vento o fa aragiâ o mâ, o pâ 'n inferno.
In primaveia, co-i perseghi in fiore, de stæ no gh'é paròlle: o l'é 'n respio o teu colore.
D'outunno co-o profummo de rostie, anâ a pe fonzi pe fâ o tocco co-e mæxime conpagnie.
Se ceuve tròppo son dizastri e gh'é da cianze, ma gh'é di zoeni pe sta tæra pronti a spacase e brasse,
perché a solidarietæ a l'é ciù inportante; no l'é vea che niatri semmo solo pe-e palanche.
Semmo preòcupæ pe 'n avegnî sensa certesse, voriescimo 'n lòu fisso, miga e richesse.
'Na vòtta patria de pescoei e de mainæ, òua fabriche seræ e casciaintegræ.
E quante cemento, de vòtte anche in sciô cheu, me da 'n brivido comm'eimo vei e comme semmo ancheu.
Ma son nasciuo chi e primma no o capivo; ti caminn-i in sce 'na stradda: gh'é senpre 'n motivo;
fòscia inutile, ma mi o sò, mi te ringraçio, in fondo te devo quello che gh'ò.

Desteiza inte 'n abrasso tra i monti e o mâ, l'é chi che me sento a cà.
Co-i seu borghi, e seu bontæ, co-i seu vegi mestê.
Fin da figin gh'ò dæto i primmi respii, mi no poriö ascordala,
perché semmo comme prie inta terassa da seu stöia milenaia.

De vòtte ò poia de no faghela ciù, me vegne o magon, me sento tiâ zu,
aloa atacco a scrive con questo lingoaggio, saiâ che o me ricòrda i vegi ma o me da tanto coraggio.
Penso a-o rie che se semmo fæti, comme ti-e contavi ti no e contava nisciun.
Òua semmo distanti e ti m'amii da lasciù ma o ricòrdo o resta bello comme a nòstra region.

Desteiza inte 'n abrasso tra i monti e o mâ, l'é chi che me sento a cà.
Co-i seu borghi, e seu bontæ, co-i seu vegi mestê.
Fin da figin gh'ò dæto i primmi respii, mi no poriö ascordala,
perché semmo comme prie inta terassa da seu stöia milenaia.