Скачать или смотреть အိမ်မှာလွယ်လွယ်ကူကူလုပ်စားနိုင်မယ့် မာလာရှမ်းကောချက်နည်း - Recipe Corner Episode (22)

အားလုံးပဲမင်္ဂလာပါ။ ဒီနေ့မှာတော့ ကျွန်တော်တို့ RecipeTube ကနေလူတိုင်းကြိုက်နှစ်သက်ကြတဲ့ မာလာရှမ်းကောကို အိမ်မှာလွယ်လွယ်ကူကူနဲ့ ဘယ်လိုမျိုးချက်ပြုတ်နိုင်သလဲဆိုတာကို ပြသပေးသွားမှာပဲဖြစ်ပါတယ်။ အခုဆိုရင်အပြင်ထွက်စားဖို့ကလည်းသိပ်မလွယ်ကူတာမလို့ အိမ်မှာပဲမိမိတို့ကြိုက်နှစ်သက်တဲ့အရာတွေနဲ့ ဒီချက်နည်းလေးအတိုင်း မာလာရှမ်းကောလေးလုပ်စားနိုင်ပါတယ်။ ကြည့်ရှုပေးကြတဲ့သူတွေအကုန်လုံးကို ကျေးဇူးတင်ပါတယ်ခင်ဗျ။




ပါဝင်ပစ္စည်းများ

မာလာအနှစ် - (၂) ထုပ်
ဝက်သားပြား - (၁) ထုပ်
ကြက်ဥချောင်း - (၁) ထုပ်
ကြက်သားပြား - (၁) ထုပ်
ကြက်သားလုံး - (၁) ထုပ်
ခေါက်ဆွဲခြောက် - (၂-၃) ခု
အပ်မှို - (၁) ထုပ်
ကန်ဇွန်းရွက် - အနည်းငယ်
ပြောင်းဖူးအသေး - (၁၀) ချောင်း
အာလူး - (၁-၂) လုံး
ကြက်သွန်နီ - (၁) လုံးခွဲ
ကြက်သွန်ဖြူ - (၄) မွှာ
ဆား - အနည်းငယ်


ချက်ပြုတ်နည်း
၁) ပထမဦးဆုံးအနေနဲ့ ကြက်သားလုံး၊ ကြက်ဥချောင်းများနှင့် ကြက်သားပြားများကို ရေနွေးပွက်ပွက်ဆူထဲတွင် (၃) မိနစ်ခန့်ပြုတ်ပါ။
၂) အာလူးကိုခပ်ပါးပါးလှီးပြီး ပြောင်းဖူးအသေးကိုနှစ်ပိုင်းပိုင်းပါ။ ပြီးလျှင်ရေနွေးပွက်ပွက်ဆူထဲကို ဆားအနည်းငယ်ထည့်ပြီး (၅-၇) မိနစ်ခန့်ပြုတ်ပါ။ ကန်ဇွန်းရွက်နှင့် အပ်မှိုတို့ကိုလည်း (၂) မိနစ်ပြုတ်ပါ။
၃) ခေါက်ဆွဲခြောက်များကို အနည်းငယ်နူးသွားတဲ့အထိပြုတ်ပြီးစစ်ထားပါ။
၄) ဒယ်အိုးတစ်ခုထဲတွင်ဆီထည့်ပြီး ကြက်သွန်ဖြူ၊ ကြက်သွန်နီတို့ကိုဆီသတ်ပါ။ ပြီးလျှင်မာလာအနှစ်ထည့်ပြီး ဝက်သားပြားနှင့် ပြုတ်ထားသောအသားလုံး၊ အသားပြားတို့ကိုထည့်ပြီးလှိမ့်ပါ။ နှံ့လျှင်ပြုတ်ထားသောအရွက်များထည့်ပါ။ နောက်ဆုံးအနေနဲ့ ခေါက်ဆွဲများထည့်ပြီးမာလာအနှစ်ဖြင့် သမအောင်ရောမွှေပြီးလျှင် ဒယ်အိုးထဲကချကာစားသုံးနိုင်ပါပြီ။