金馬獎入圍名單丨吳君如相隔21年再角逐影后 游學修演聾啞人問鼎影帝

金馬獎入圍名單丨吳君如相隔21年再角逐影后 游學修演聾啞人問鼎影帝

第61屆金馬獎公佈入圍名單，當中由陳柏霖、王淨、張榕容主演嘅《鬼才之道》獲得11項提名，成大贏家。而今屆最大亮點係五位準影后當中有三位香港女演員，包括《從今以後》區嘉雯、《我談的那場戀愛》吳君如，以及《看我今天怎麼說》鍾雪瑩。三位將會同三屆金馬影后、憑《女兒的女兒》再度入圍嘅張艾嘉，以及憑《小雁與吳愛麗》首度入圍嘅夏于喬爭奪影后殊榮。

03年憑《金雞》首奪金馬影后嘅君如，相隔21年再度入圍，直認收到消息非常開心，以老淚縱橫嚟形容心情。上年憑《填詞L》首度入圍金馬影后嘅鍾雪瑩，今年再接再厲，佢話聽到音響老師同游學修入圍後，再收到自己入圍消息，覺得呢部電影係象徵一群人嘅群體合作，非常榮幸。佢特別多謝聾人朋友、手語老師，以及黃修平導演與整個幕後團隊。

最佳男主角方面，游學修憑《看我今天怎麼說》演聾啞人士，首度入圍金馬影帝，佢話多謝金馬獎畀咗佢前所未有嘅支持同鼓勵，亦多謝導演黃修平一次又一次比機會自己。游學修今次可以話係越級挑戰，佢嘅對手係憑《餘燼》入圍嘅金馬影帝張震，憑《春行》入圍嘅資深演員喜翔，以及泰國同內地演員。今年港產片表現亮眼，《從今以後》除咗女主角，仲入圍最佳劇情片、導演同埋剪輯四個獎。《看我今天怎麼說》除咗男女主角雙雙入圍，仲入圍最佳音效。《武替道》入圍最佳動作設計，而何妙祺就憑《我談的那場戀愛》入圍最佳新導演。

今屆最佳男女配角，入圍名單清一色係台灣演員，入圍女配角嘅包括《鬼才之道》張榕容、《BIG》曾沛慈、《女兒的女兒》劉奕兒、《白衣蒼狗》陸弈靜，以及憑《小雁與吳愛麗》入圍嘅金馬影后楊貴媚。至於男配角方面堪稱死亡之組，當中包括兩位金馬影帝，憑《默視錄》入圍嘅李康生，以及憑《餘燼》入圍嘅莫子儀，另外仲有上年入圍金馬影帝，今年再憑《白衣蒼狗》入圍嘅春風、《角頭-大橋頭》嘅施名帥，以及入行30年首度憑《小雁與吳愛麗》入圍金馬獎嘅曾國城。而七月離世嘅武俠女星鄭佩佩，就獲頒終身成就紀念獎，表揚佢生前對影壇嘅貢獻，而今屆金馬影展亦將會播放鄭佩佩多部經典作品，透過大銀幕緬懷呢位一代俠女。

#金馬獎 #入圍名單 #最佳女主角 #張艾嘉 #吳君如 #鍾雪瑩 #區嘉雯 #夏于喬 #最佳男主角 #游學修 #張震 #喜翔 #終身成就紀念獎 #鄭佩佩 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0