Con Smitin Gəncədə keçdiyi master-klas

Ölkəmizdə səfərdə olan amerikalı güləş mütəxəssisləri sentyabrın 30-da Gəncə şəhərində olublar.

Sərbəst güləş üzrə 2 qat olimpiya, 4 qat dünya çempionu Con Smit və qadın güləşi üzrə dünya çempionatının 2 qat bürünc medalçısı Seli Roberts Gəncə şəhəri İdman Liseyində yerli idmançılarla görüşüblər.

Smitlə Roberts 2 saat davam edən nəzəri-praktiki məşğələdə təcrübələrini gəncəli güləşçilərlə bölüşüblər. Müxtəlif fəndlərin effektiv icrasının yollarını əyani surətdə göstərən Smit böyük uğurlar qazanmaq üçün kollektiv məşqlərdən əlavə fərdi çalışmaların vacibliyini də diqqətə çatdırıb.

Qeyd edək ki, master-klasdan öncə tanınmış mütəxəssislərlə keçirilən görüşdə İdman Liseyinin direktoru Mehman Allahverdiyev Con Smitin baş məşqçisi olduğu Oklahoma Dövlət Universitetinin güləş komandasını təlim-məşq toplanışı üçün Gəncəyə dəvət edib. Amerikalı mütəxəssis bu təklifi müsbət qarşılayıb və əməkdaşlığı davam etdirəcəklərini bildirib.