Скачать или смотреть শিৱসাগৰত ১৪৪ ধাৰাৰ অধীনত নিষেধাজ্ঞা

শিৱসাগৰত ১৪৪ ধাৰাৰ অধীনত নিষেধাজ্ঞা

শিৱসাগৰ জিলাত শান্তি-শৃংখলাৰ পৰিস্থিতি বিঘ্নিত হোৱাৰ আশংকা কৰি শিৱসাগৰ জিলাৰ অতিৰিক্ত জিলা দণ্ডাধীশ বিতোপন নেওগ স্বাক্ষৰিত নিৰ্দেশযোগে সমগ্ৰ শিৱসাগৰ জিলাত তৎকালে বলৱৎ হোৱাকৈ ভাৰতীয় ফৌজদাৰী কাৰ্যবিধি আইনৰ ১৪৪ ধাৰাৰ অধীনত নিষেধাজ্ঞা জাৰি কৰিছে এই নিষেধাজ্ঞা অনুসৰি ৰাজহুৱা স্থানত পাঁচ জন বা তাতোধিক লোকৰ সমাবেশ, সভা সমিতি পতা, শোভাযাত্ৰা উলিওৱা, শ্বহীদ বেদী নিৰ্মাণ, দেৱাল লিখন, শ্ল’গান ছপা কৰা, কোনো ব্যক্তি বা ব্যৱসায়িক প্ৰতিষ্ঠান, কাৰ্যালয় আদিত যি কোনো ধৰণৰ বৰঙণি সংগ্ৰহ বা প্ৰদান কৰা নিষিদ্ধ কৰিছে ।
জিলাখনত অসামাজিক লোক তথা উগ্ৰপন্থীৰ আইন বিৰুদ্ধ কাৰ্যকলাপ, গুলিচালনা, হত্যা, অপহৰণ বা ধনলুটৰ আশংকা কৰি দুচকীয়া যানত দুজন বা তাতোধিক লোকৰ বিচৰণো নিষিদ্ধ কৰিছে । অৱশ্যে ৬০ বছৰ উৰ্দ্ধৰ লোক, ১২ বছৰ ৱয়সৰ তলৰ ল’ৰা-ছোৱালী, মহিলা, চৰকাৰী বিষয়া-কৰ্মচাৰী আৰু আৰক্ষীৰ লোকক এই নিষেধজ্ঞাৰ পৰা ৰেহাই দিয়া হৈছে ।
দৈনন্দিন জীৱনত ব্যবহৃত প্লাষ্টিক কেৰী বেগ আৰু অন্যান্য প্লাষ্টিক সামগ্ৰী যেনে বেনাৰ, উৎসৱ-পাৰ্বনত সৌন্দৰ্য বৰ্ধনৰ বাবে ব্যৱহৃত প্লাষ্টিক সামগ্ৰী (bunting), ফ্লেক্স, প্লাষ্টিকৰ পৰা প্ৰস্তুত কৰা ফ্লেগ, প্লেট, কাপ, চামুচ আদি সামগ্ৰীৰ ব্যৱহাৰে হ্ৰস্বম্যাদী আৰু দীৰ্ঘম্যাদী ভাৱে পৰিবেশ বিনষ্ট কৰাৰ লগতে জনস্বাস্থ্য আৰু জীৱ-জন্তুৰ প্ৰতি সৃষ্টি কৰা ভাবুকিৰ প্ৰতি লক্ষ্য ৰাখি সমগ্ৰ শিৱসাগৰ জিলাত প্লাষ্টিক কেৰী বেগ আৰু ৭৫ মাইক্ৰন কম ঘনত্বৰ ফিল্ম বিক্ৰী আৰু ব্যৱহাৰ ৩১ ডিচেম্বৰ ২০২২ লৈকে নিষিদ্ধ কৰা হৈছে ।
ইয়াৰোপৰি এবাৰ ব্যৱহাৰ যোগ্য প্লাষ্টিক, থাৰ্ম’কল আদি প্ৰস্তুকৰণ, আমদানি, মজুতকৰণ, বিতৰণ, বিক্ৰী আৰু ব্যৱহাৰ আদি ১ জুলাই, ২০২২ তাৰিখৰ পৰা নিষিদ্ধ কৰা হৈছে ।
জিলাখনৰ সীমামূৰীয়া অঞ্চলেদি উগ্ৰপন্থীৰ আহ-যাহ আৰু অসমাজিক কাৰ্যকলাপৰ প্ৰতি লক্ষ্য ৰাখি অসম-নগালেণ্ড সীমান্তত নৈশ সান্ধ্য আইন প্ৰৱৰ্ত্তন কৰি সীমান্তৰ ৫ কিলোমিটাৰ পৰিধিৰ ভিতৰত সন্ধিয়া ৬-০০ বজাৰ পৰা পুৱা ৬-০০ বজালৈ যিকোনো ব্যক্তি বা গোট আৰু গাড়ী-মটৰৰ চলাচল নিষিদ্ধ কৰা হৈছে ।
ইয়াৰোপৰি লালীগুড়ৰ পৰা থলুৱা মদ প্ৰস্তুতকৰণেৰে জনস্বাস্থ্য হানি হোৱাৰ আশংকা কৰি সমগ্ৰ জিলাখনত লালীগুৰ বেচা-কিনা নিষিদ্ধ কৰা হৈছে । অৱশ্যে পশু খাদ্য হিচাবে ব্যৱহাৰৰ বাবে জিলা দণ্ডাধীশ/অতিৰিক্ত জিলা দণ্ডাধীশ বা পশু পালন বিভাগৰ অনুমতি সাপেক্ষে লালীগুৰ বেচা-কিনা কৰিব পাৰিব ।
এই নিষেধাজ্ঞা সমূহ তৎকালীনভাৱে বলৱৎ হৈছে আৰু পৰৱৰ্ত্তী ৬০ দিনলৈ বা পুণৰ আদেশ নিদিয়া পৰ্যন্ত বাহাল থাকিব । এই আদেশ সমূহ অমান্য কৰা সকল ভাৰতীয় দণ্ডবিধি আইনৰ ১৮৮ ধাৰা অনুসৰি দণ্ডণীয় হ’ব বুলি এই নিৰ্দেশ সমূহত উল্লেখ কৰিছে ।