Скачать или смотреть YESU AKUBWERANSO POSACHEDWA, UTHENGA WOYAMBA M'CHAKA CHA 2026

Vidiyo imeneyi ndi uthenga wonena zoti Yesu akubwera posachedwa kudzatenga okondedwa ake kuchokera m'dziko lino lapansi kunka nao Kumwamba. Koma nkhani yaikulu mu uthenga umenewu yamanga nthenje pa Mateyu 24:8 pamene Yesu atatha kundandalika zochitika zoopsa za m'masiku otsiriza monga aneneri onyenga, aKhristu onama, nkhondo, kuukirana kwa maufumu, mafuku ndi mitundu ya anthu ndiponso zivomezi, njala ndi miliri ya matenda osiyanasiyana pa anthu, anapitiriza ndi mau oti, "Koma zonsezi ndizo zowawa zoyamba." Pongoliganizira lemba limeneli likhoza kupereka chithunzi choti tsogolo la anthu a m'dziko lapansi ndi loopsa komanso lopanda kuwala, la mdima ndiponso lonka kuchionongeko chokhachokha basi. Koma m'chilankhulo cha chiHelene kapena chiGriki, liu loti ziwawa zoyamba ndi liu lonena kuti kuyamba kwa zowawa zofanana ndi za mai amene aliwoyembekezera pamene akukabala mwana. Ganizo la mai woyembekezera ndi zowawa zace pobala mwana ndi ganizo losiyana ndi la zowawa zoyamba chifukwa chakuti Mai woyembekezera akayamba kumva kuwawa, kupweteka kwace kumanka nkukulakulabe kwambiri mpaka atabala mwanayo. Ndipo mwana akabadwa, zowawa zija zimathera pomwepo. Ululu wonse wakupweteka kwa kubala umatheratu osamvekanso. M'malo mwake, mai uja amakhala wokondwa poona mwana wake atabadwa. Chimodzimodzinso Yesu pobwera posachedwapa adzadzetsa chimwemwe chachikulu kwa anthu omuyembekezera amene akhala akupirira zowawa zochuluka pa dziko lapansi. Kubwera kwa Yesu kwa posachedwa kudzakhala chimwemwe cha anthu onse olungama. Ife tiyenera kukonzekera kudza kwa Yesu masiku ovuta ngati amene tikukhala ano.