Скачать или смотреть સુરતમાં ડીઝલ બસો ઇલેક્ટ્રિક બસોમાં કન્વર્ટ થતાં કાર્બન ડાયોક્સાઇમાં થશે ઘટાડો..Raftar Surat News

સુરત મહાનગર પાલિકા શહેરમાં માસ ટ્રાન્સપોર્ટેશન સુવિધા અંતર્ગત BRTS અને સિટી બસ સેવાઓનું સંચાલન કરી રહી છે, જેમાં પ્રતિદિન બે લાખથી વધુ યાત્રીઓ મુસાફરી કરે છે. આ પૈકી, BRTS રૂટમાં દોડતી બસોનો લાભ દરરોજ 1.25 લાખથી વધુ મુસાફરો લે છે. મનપાએ BRTSના તમામ 13 રૂટ પર દોડતી 352 ડીઝલ બસોને સંપૂર્ણપણે ઈલેક્ટ્રિક બસમાં કન્વર્ટ કરીને એક ઐતિહાસિક સિદ્ધિ હાંસલ કરી છે. આ 352 ઇલેક્ટ્રિક બસો હવે દરરોજ સરેરાશ 25,000 કિલોમીટરનું અંતર કાપે છે.ડીઝલ બસોની એવરેજ 4-5 કિલોમીટર પ્રતિ લિટર હતી. તેની તુલનામાં ઈ-બસ ઓનરોડ થવાથી દૈનિક હજારો લિટર ડીઝલની બચત શરૂ થઈ છે. પ્રાપ્ત માહિતી મુજબ, આ નિર્ણયને કારણે પ્રતિદિન 6000 લિટર ડીઝલની બચત થઈ રહી છે. વાર્ષિક ગણતરી કરીએ તો, સુરત મહાનગર પાલિકાએ વર્ષે 18 લાખ લિટરથી વધુ ડીઝલનો ધુમાડો થતો અટકાવ્યો છે.ડીઝલ બસને કારણે દર કિલોમીટરે 0.25 કિલો કાર્બન ડાયોક્સાઈડનું ઉત્સર્જન થતું હતું. ઈ-બસોના સંચાલનથી દૈનિક 6.50 ટન કાર્બન ડાયોક્સાઈડનું ઉત્સર્જન ઘટી રહ્યું છે. વાર્ષિક ધોરણે, 2372.50 ટન કાર્બન ડાયોક્સાઈડ હવામાં ભળતો અટકાવી શકાયો છે. પરિવહન ચેરમેનના જણાવ્યા મુજબ, ઇલેક્ટ્રિક બસો દોડાવવાથી શહેરમાં માસ ટ્રાન્સપોર્ટેશનના ક્ષેત્રમાં મહિને 200 ટન જેટલો કાર્બન ડાયોક્સાઈડ ઘટ્યો છે.આ ‘ગ્રીન ટ્રાન્સપોર્ટેશન’ પહેલના કારણે શહેરના કુલ પ્રદૂષણમાં 15 ટકાનો ઘટાડો નોંધાયો છે. માત્ર કાર્બન ડાયોક્સાઇડ જ નહીં, પરંતુ નાઇટ્રોજન ઓક્સાઇડ જેવા હાનિકારક કણોમાં પણ નોંધપાત્ર ઘટાડો જોવા મળ્યો છે. આ નિર્ણય BRTS રૂટની કાર્યક્ષમતામાં પણ વધારો કરે છે. ડીઝલ બસોની સરેરાશ લાઈફ 7 વર્ષ હતી, જ્યારે ઇલેક્ટ્રિક બસોની સરેરાશ લાઈફ 12 વર્ષ છે. આમ, સુરત મહાનગરપાલિકાએ પર્યાવરણની સુરક્ષા સાથે લાંબા ગાળાના આર્થિક અને સામાજિક લાભોને પણ ધ્યાનમાં રાખીને એક મજબૂત અને પ્રગતિશીલ પગલું ભર્યું છે.