အာဆီယံအထူးကိုယ်စားလှယ်အဖြစ်အင်ဒိုနီးရှားဗိုလ်ချုပ်ကြီးဟောင်းတစ်ဦးခန့်အပ်ဖို့စဉ်းစားနေဟုသတင်းထွက်ပေါ်

လက်ရှိ အာဆီယံအလှည့်ကျဥက္ကဋ္ဌ အင်ဒိုနီးရှားနိုင်ငံဟာ မြန်မာ့အရေးကို ကြားဝင်ဖြေရှင်းနိုင်ဖို့အတွက် အတွေ့ အကြုံရှိတဲ့ ဝါရင့်စစ်ဗိုလ်ချုပ်ဟောင်းတစ်ဦးကို မြန်မာနိုင်ငံဆိုင်ရာ အာဆီယံအထူးကိုယ်စားလှယ်အဖြစ် ခန့်အပ် ဖို့ စီစဉ်နေတယ်လို့ ဖေဖော်ဝါရီ ၈ ရက် ရရှိတဲ့ နိုင်ငံတကာသတင်းတွေက ဖော်ပြပါတယ်။
စကစတာဝန်ရှိသူများနဲ့ တွေ့ဆုံဆွေးနွေးနိုင်ဖို့ အာဆီယံဥက္ကဋ္ဌရဲ့မြန်မာနိုင်ငံဆိုင်ရာ အထူးကိုယ်စားလှယ်အဖြစ် ဗိုလ်ချုပ်ကြီးဟောင်းအဖြစ်ကနေ ဝန်ကြီးအဖြစ် ပြောင်းလဲတာဝန်ယူနေသူတစ်ဦးကို ပြောင်းလဲခန့်အပ်ဖို့ အင်ဒိုနီးရှားအစိုးရ စဉ်းစားနေကြောင်း သတင်းများထွက်ပေါ်လျက်ရှိနေတာပါ။
အင်ဒိုနီးရှားသမ္မတ ဂျိုကိုဝီဒိုဒိုကလည်း မြန်မာစစ်ဗိုလ်ချုပ်တွေကို ဒီမိုကရေစီအသွင်ကူးပြောင်းရေး အတွေ့ အကြုံကို ရှင်းပြဖို့အတွက် ထိပ်တန်းစစ်ဗိုလ်ချုပ်တစ်ယောက်ကို မြန်မာနိုင်ငံကို စေလွှတ်ဖို့ စီစဉ်ထားကြောင်း ဖေဖော်ဝါရီ ၁ ရက်နေ့က ရိုက်တာသတင်းဌာနကို ပြောခဲ့ပါတယ်။
အဲ့ဒီနောက်မှာတော့ အသက် ၇၅ နှစ်အရွယ်ရှိ အင်ဒိုနီးရှားရေကြောင်းနှင့် ရင်းနှီးမြှုပ်နှံမှုဆိုင်ရာပူးပေါင်းရေးဝန်ကြီး စစ်ဗိုလ်ချုပ်ဟောင်း လူဟတ် ပန်ဂျီယာတန်ဟာ မြန်မာနိုင်ငံရေးနဲ့ ပတ်သက်ပြီး အင်ဒိုနီးရှားသမ္မတ ဂျိုကိုဝီဒိုဒိုရဲ့ အာဆီယံဥက္ကဋ္ဌအထူးကိုယ်စားလှယ်အဖြစ် ခန့်အပ်ခံရဖို့ ထိပ်ဆုံးမှာ ရှိနေကြောင်း အဆိုပါကိစ္စနဲ့ နီးစပ်သောသတင်းအရင်းမြစ်များ က ပြောပါတယ်။
လူဟတ် ပန်ဂျီယာတန်ဟာ အင်ဒိုနီးရှားစစ်တပ်မှာ ကြယ်လေးပွင့်အဆင့်ရှိ ဗိုလ်ချုပ်ကြီးတစ်ဦးအဖြစ် တာဝန်ယူ ခဲ့ဖူးသလို စီးပွားရေးလုပ်ငန်းရှင်တစ်ဦးလည်းဖြစ်ကာ အင်ဒိုနီးရှားဒီမိုကရေစီ ပြုပြင်ပြောင်းလဲမှုများတွင် ပါဝင်ခဲ့သူဖြစ်တယ်လို့ သိရပါတယ်။
ဒါ့အပြင် အင်ဒိုနီးရှားသမ္မတရုံးကလည်း အဆိုပါကိစ္စနဲ့ပတ်သက်ပြီး တစ်စုံတစ်ရာမှတ်ချက်ပြု ပြောဆိုခြင်း မရှိဘူးလို့ သိရပါတယ်။
 လူဟတ် ပန်ဂျီယာတန်ဟာ အာဆီယံအထူးကိုယ်စားလှယ်အဖြစ် ခန့်အပ်ခံရမယ်ဆိုရင် မြန်မာနိုင်ငံရေးအခက်အခဲများကို ကိုင်တွယ်ဖြေရှင်းဖို့ ဖွဲ့စည်းထားတဲ့ အာဆီယံအထူးကိုယ်စားလှယ်ရုံးမှာပါ ဝင်ဆောင်ရွက်ခွင့်ရမှာဖြစ်ကြောင်း သတင်းအရင်းမြစ်များ က ပြောပါတယ်။
အင်ဒိုနီးရှားနိုင်ငံက အာဆီယံအလှည့်ကျဥက္ကဋ္ဌတာဝန်ယူပြီးနောက် မြန်မာနိုင်ငံရေး အခက်အခဲများကို ကြားဝင် ဆောင်ရွက်ပေးနိုင်ဖို့ အာဆီယံဥက္ကဋ္ဌရဲ့အထူးကိုယ်စားလှယ်ရုံးကို ဖွဲ့စည်းထားပြီး အင်ဒိုနီးရှားနိုင်ငံခြားရေးဝန်ကြီး ရက်နိုမာဆူဒီက တာဝန်ယူနေတယ်လို့ သိရပါတယ်။
မြန်မာ့အရေး တိုးတက်မှုမရှိတဲ့အတွက် အာဆီယံရဲ့ ကြိုးပမ်းမှုတွေကို နောက်တစ်ဆင့် တိုးမြှင့်ဖို့ ဖေဖော်ဝါရီ ၃ ရက်နဲ့ ၄ ရက် အင်ဒိုနီးရှားနိုင်ငံ ဂျာကာတာမြို့ အာဆီယံနိုင်ငံခြားရေးဝန်ကြီးများ အစည်းအဝေးမှာ သဘောတူခဲ့ ကြပါတယ်။
အစည်းအဝေးအပြီး ထုတ်ပြန်တဲ့ ကြေညာချက်မှာတော့ လွန်ခဲ့တဲ့ လပေါင်း ၂၀ ကျော်က ချမှတ်ခဲ့တဲ့ အာဆီယံ ဘုံသဘောတူညီချက် ငါးချက်ကို လက်တွေ့ အကောင်အထည်ဖော်ဖို့ကိုသာ အာဆီယံက ထပ်မံ တိုက်တွန်း ခဲ့ပါတယ်။
ဒီဘုံသဘောတူညီချက်တွေကို အချိန်အတိအကျသတ်မှတ်ပြီး အကောင်အထည်ဖော်ရမယ်ဆိုတဲ့ ၂၀၂၂ နိုဝင်ဘာလ အာဆီယံထိပ်သီးညီလာခံ ဆုံးဖြတ်ချက်တွေနဲ့ ပတ်သက်ပြီး တစ်စုံတစ်ရာ ထူးထူးခြားခြား ဖော်ပြထားတာ မတွေ့ရပါဘူး။
အကြမ်းဖက်မှုတွေ ချက်ချင်းရပ်တန့်ပြီး တစ်ဖက်နဲ့ တစ်ဖက် ယုံကြည်မှု အမြန်ဆုံး တည်ဆောက်ဖို့၊ အားလုံး ပါဝင်တဲ့ နိုင်ငံတော်အဆင့် တွေ့ဆုံဆွေးနွေးရေး လုပ်ဖို့ မဖြစ်မနေလိုအပ်တယ်လို့ အင်ဒိုနီးရှား နိုင်ငံခြားရေး ဝန်ကြီး Retno Marsudi က ပြောဆိုကြောင်း နိုင်ငံတကာသတင်းတွေမှာ ဖော်ပြပါတယ်။ အာဆီယံဟာ လူသား ချင်းစာနာမှု အကူအညီတွေ ပေးနိုင်ရေးနဲ့ တွေ့ဆုံဆွေးနွေးရေးလမ်းကြောင်း ပေါ်ပေါက်လာဖို့ကို ကုလသမဂ္ဂ အပါအဝင် အိမ်နီးချင်းနိုင်ငံတွေ၊ သက်ဆိုင်ရာ တခြားနိုင်ငံတွေနဲ့ ပူးပေါင်းဆောင်ရွက်သွားမယ်လို့လည်း မာဆူဒီက ပြောပါတယ်။
အင်ဒိုနီးရှားရဲ့ အစီအစဉ်ဟာ ကောင်းမွန်ပေမယ့်လည်း လက်ရှိအခြေအနေအရ နှစ်ဖက် တွေ့ဆုံဆွေးနွေးပွဲတွေ ဖြစ်လာဖို့က အတော်လေးခက်ခဲလိမ့်မယ်လို့ အာဆီယံအရေး လေ့လာသူတွေက ပြောပါတယ်။


-----------------------------------------
@MizzimaTV
မဇ္ဈိမကို လွတ်လပ်တဲ့ မီဒီယာအဖြစ်ရပ်တည်နိုင်ရေးအတွက် ဝိုင်းဝန်းကူညီဖို့ ဖိတ်ခေါ်လိုက်ပါရစေ. လင့်ကို နှိပ်ပြီး သင်ရဲ့အားပေးကူညီမှုကို စတင်နိုင်ပါတယ်. https://bit.ly/2VhJ12U

Subscribe now and join the Mizzima TV family to get insights into Burma's culture and people. With Mizzima TV, you can stay informed about the latest news and events happening in Myanmar, as well as connect with the world.

   / @mizzimanewstv  
Facebook ( Myanmar Language) https://bit.ly/3BuWBSJ
Facebook (English language) https://bit.ly/3d5g1V2
Facebook (Mizzima+TV) https://bit.ly/3eGNjdl
Twitter https://bit.ly/3Dbvqh1
Telegram https://bit.ly/3RRn2rk
Tiktok https://bit.ly/3xngMzE
Get Mizzima TV App Free : https://onelink.to/jnuwak/
Website: https://www.mizzima.com/ https://www.mizzimaburmese.com/ https://www.mizzima.tv/