Скачать или смотреть រូបចម្លាក់សំរឹទ្ធរបស់ខ្មែរ ដែលសៀមប្លន់ និងកំពុងស្ថិតនៅភូមា

រូបចម្លាក់សំរឹទ្ធរបស់ខ្មែរ ដែលសៀមប្លន់ និងកំពុងស្ថិតនៅភូមា
----------------------------
ក្រៅធ្វើឱ្យខូចខាតសំណង់ប្រាសាទ ប្រព័ន្ធធារាសាស្ត្រ សំណង់ វត្តអារាម លំនៅដ្ឋាន កងទ័ពសៀមក៏បានប្រមូលយករូបសំណាកមានតម្លៃជាច្រើនដែលធ្វើពីស្ពាន់ សំរឹទ្ធ មាស ប្រាក់ជាដើម។ ពិតណាស់ យោងតាមខ្លឹមសារប្រវត្តិសាស្ត្រ នៅពេលពួកសៀមចូលឈ្លានពានប្រទេសកម្ពុជា និងវាយបែកក្រុងអង្គរធំនៅឆ្នាំ១៣៥២ហើយនោះ ពួកវាបានកៀរប្រជារាស្ត្រខ្មែរ និងទ្រព្យសម្បត្តិជាច្រើនពីប្រទេសកម្ពុជាដឹកជញ្ជូនយកទៅក្រុងស្រីអយុធ្យា។ បច្ចុប្បន្ននៅក្នុងរាជវាំងប្រទេសថៃ គេឃើញមានរូបសំណាកតោជាច្រើនទៀតធ្វើពីស្ពាន់ និងសំរឹទ្ធដាក់តាំងនៅច្រកទ្វារ ដែលសុទ្ធសឹងជាតោរចនាបថខ្មែរនាសម័យអង្គរ ដូចជារចនាបថអង្គរវត្ត រចនាបថបាយ័ន្ត ហើយតាមការប៉ាន់ស្មាន គឺអាចត្រូវប្រមូលទៅតំណាលគ្នានឹងរូបសំណាកដែលភូមាវាយយកទៅបន្តទៀត។

តួយ៉ាងដូចជារូបចម្លាក់សំរឹទ្ធខ្មែរចំនួន៥ ដូចជា ទេវរូបចំនួន២ រូបដំរីអៃរាវ័ណឬដំរីក្បាលបីកណ្ដឹងសាមពាន់ចំនួន១ និងរូបសិង្ហឬតោចំនួន២ ដំបូងឡើយ ត្រូវបានសៀមវាយដណ្តើមពីក្រុងអង្គរ ប្រទេសកម្ពុជា យកទៅតម្កល់នៅក្រុងស្រីអយុធ្យា ប្រទេសសៀម នាសតវត្សទី១៥ លុះដល់នៅសតវត្សទី១៦ ឆ្នាំ១៥៦៤ កងទ័ពភូមាក៏បានចូលឈ្លានពានប្រទេសសៀម និងបានវាយបែកក្រុងស្រីអយុធ្យា ដែលពេលនោះហើយដែលភូមារាមញ្ញដឹកជញ្ជូនទ្រព្យសម្បត្តិទាំងឡាយពីក្រុងអយុធ្យាយកទៅក្រុងហង្សាវតី នៃប្រទេសភូមា បច្ចុប្បន្នក្រុងហង្សវតី ត្រូវបានប្ដូរការហៅមកជា ប៉េហ្គូ។ នៅឆ្នាំ១៥៩៩ នៅប្រទេសភូមាខ្លួនឯងក៏មានភាពវឹកវរដែរ ដោយរដ្ឋបុរីនានាបានធ្វើសង្គ្រាមដណ្ដើមអំណាចគ្នាទៅវិញទៅមក ក្នុងនោះក្សត្របុរីនៅម៉រ៉ាវអ៊ូ (Maruok U) បានវាយឈ្នះលើរដ្ឋបុរីហង្សាវតី ហើយក៏បានដឹកជញ្ជូនទ្រព្យសម្បត្តិ ព្រមទាំងរូបចម្លាក់ខ្មែរខាងលើយកទៅក្រុងម៉រ៉ាវអ៊ូនេះដែរ។ ក្រោយមកទៀត រាជវង្សកនបោងរបស់ព្រះមហាក្សត្រអង្គហ្លួងផៃយ៉ា ក៏បានបង្រួបបង្រួមរដ្ឋបុរីទាំងឡាយនៅប្រទេសភូមា រួមទាំងម៉រ៉ាវអ៊ូផងដែរ ហើយដឹកជញ្ជូនដឹកជញ្ជូនទ្រព្យសម្បត្តិ ព្រមទាំងរូបចម្លាក់ខ្មែរខាងលើ ពីក្រុងម៉រ៉ាវអ៊ូ ទៅកាន់ក្រុងអមរាបុរ ដែលជារាជធានីធំរបស់រាជវង្សកនបោង នាសម័យនោះ ពោលគឺនៅក្នុងទឹកដីរដ្ឋមណ្ឌាល័យបច្ចុប្បន្ន។ យោងតាមឯកសារពីខាងភូមា រូបចម្លាក់សំរឹទ្ធរបស់ខ្មែរ មិនមែនមានតែ៥ដូចយើងឃើញនាពេលបច្ចុប្បន្ននេះឡើយ ពោលគឺអាចមានរហូតដល់ជាង៣០រូបឯណោះ ប៉ុន្តែរាជការចក្រភពកនបោងបានស្លរំលាយសំរឹទ្ធទាំងនោះអស់ជាច្រើន ដើម្បីផលិតជាកាំភ្លើងធំប្រើប្រាស់ក្នុងសង្គ្រាមប្រឆាំងជាមួយចក្រភពអង់គ្លេស ដែលកំពុងកាន់កាប់ប្រទេសឥណ្ឌា ហើយធ្វើសង្គ្រាមដណ្ដើមយកប្រទេសភូមាបន្ថែមទៀត។ ទីបំផុត មានតែទេវរូបចំនួន២ រូបដំរីអៃរាវ័ណឬដំរីក្បាលបីកណ្ដឹងសាមពាន់ចំនួន១ និងរូបសិង្ហឬតោចំនួន២ប៉ុណ្ណោះ ដែលនៅសេសសល់ ហើយកំពុងតម្កល់នៅក្រុងបុរាណអមរាបុរ នៃរដ្ឋមណ្ឌាល័យ (Madalay) ប្រទេសភូមា។

#domra_history
#history
#king
#angkor
#angkorwat
#cambodia
#siemreap
#phnompenh
#queen
#culture
#civilization