Скачать или смотреть 13- Khabar e Motawatir | خبر متواتر |

خبر کے ہم تک پہنچنے میں کبھی اسانید کی تعداد کثیر ہوتی ہے کبھی قلیل۔ اس کثرت وقلت کے اعتبار سے خبر کی دو اقسام ہیں:خبرِ متواتر اور خبرِ واحد،
پھر خبرِ واحد کی تین اقسام ہیں :
خبرِ مشہور ،خبرِ عزیز اورخبرِ غریب

خبرِ متواتِر:
لغوی معنی:
مُتواتِر باب تفاعل(تَواتُر) سے اسم فاعل کا صیغہ ہے، جس کا معنی ہے کسی چیز کا پے در پے، مسلسل اور لگاتار ہونا یا آنا۔
اصطلاحی معنی:
وہ حدیث جس کو سند کے ہر طبقہ میں راویوں کی اتنی بڑی تعداد روایت کرے جس کا جھوٹ پر متفق ہونا عقلا ًمحال ہو، یا ان سب کا اجتماعی طور پر غلطی پر ہونا عقلاً محال ہو۔
یعنی وہ حدیث اور خبر جس کو روایت کرنے والوں کی تعداد اس قدر زیادہ ہو کہ عقل ان سب کے جھوٹ پر جمع ہونے کو ناممکن قرار دے۔
مثال:
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : مَنْ کَذَبَ عَلَيَّ مُتَعَمِّداً فَلْیَتَبَوَّأْ مَقْعَدَہٗ مِنَ النَّارِ
رسول اللہ صلی اللہ علیہ وسلم نے فرمایا: جس نے مجھ پر جان بوجھ کر جھوٹ باندھا اسے چاہیے کہ اپنا ٹھکانہ جہنم میں بنالے۔
اس حدیث پاک کو ستر70 سے زائد صحابہ کرام نے روایت کیا ہے اور سند کے بعد کے طبقات میں یہ تعداد بڑھتی چلی گئی۔

اس حدیث کی کچھ اسانید مندرجہ ذیل ہیں:
سند-1) صحیح مسلم، حدیث: 4
1. حَدَّثَنَا مُحَمَّدُ بْنُ عُبَيْدٍ الْغُبَرِيُّ ،
2. حَدَّثَنَا أَبُو عَوَانَةَ ،
3. عَنْ أَبِي حَصِينٍ ،
4. عَنْ أَبِي صَالِحٍ ،
5. عَنْ أَبِى هُرَيْرَةَ ، قَال:
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: مَنْ كَذَبَ عَلَيَّ مُتَعَمِّدًا، فَلْيَتَبَوَّأْ مَقْعَدَهُ مِنَ النَّارِ".

سند-2) سنن ابن ماجه، حدیث: 34
1. حَدَّثَنَا أَبُو بَكْرِ بْنُ أَبِي شَيْبَةَ ،
2. حَدَّثَنَا مُحَمَّدُ بْنُ بِشْرٍ ،
3. عَنْ مُحَمَّدِ بْنِ عَمْرٍو ،
4. عَنْ أَبِي سَلَمَةَ ،
5. عَنْ أَبِي هُرَيْرَةَ ، قَالَ
قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: مَنْ تَقَوَّلَ عَلَيَّ مَا لَمْ أَقُلْ، فَلْيَتَبَوَّأْ مَقْعَدَهُ مِنَ النَّارِ".

سند-3) صحیح بخاری، حدیث: 110
1. حَدَّثَنَا مُوسَى، قَالَ:
2. حَدَّثَنَا أَبُو عَوَانَةَ،
3. عَنْ أَبِي حَصِينٍ،
4. عَنْ أَبِي صَالِحٍ،
5. عَنْ أَبِي هُرَيْرَةَ،
عَنِ النَّبِيِّ صَلَّى اللَّهُ عَلَيْهِ وَسَلَّمَ، قَالَ: تَسَمَّوْا بِاسْمِي، وَلَا تَكْتَنُوا بِكُنْيَتِي، وَمَنْ رَآنِي فِي الْمَنَامِ فَقَدْ رَآنِي، فَإِنَّ الشَّيْطَانَ لَا يَتَمَثَّلُ فِي صُورَتِي، وَمَنْ كَذَبَ عَلَيَّ مُتَعَمِّدًا فَلْيَتَبَوَّأْ مَقْعَدَهُ مِنَ النَّارِ۔
نبی ﷺ نے ارشاد فرمایا
کہ اپنی اولاد کا نام میرے نام پر رکھا کرو۔ مگر میری کنیت اختیار نہ کرو اور جس شخص نے مجھے خواب میں دیکھا تو بلاشبہ اس نے مجھے ہی دیکھا۔ کیونکہ شیطان میری صورت اختیار نہیں کر سکتا اور جو شخص مجھ پر جان بوجھ کر جھوٹ بولے وہ دوزخ کو اپنا ٹھکانہ بنا لے۔

خبرِ متواتِر کا حکم:
خبر متواتر پر عمل کرنا واجب ہے، اور یہ علمِ بدیہی کا فائدہ دیتی ہے، علمِ بدیہی ایسے قطعی اور یقینی علم کو کہتے ہیں جو قدرتی طور پر معلوم ہوتا ہے اور اس کوسمجھنے سمجھانے میں کوئی غور و فکر نہیں کرنا پڑتا۔
لہذا خبر متواتر پر اس طرح ایمان رکھنا واجب ہے گویا خود اُس بات کا مشاہدہ کیا ہو جو حدیث میں بیان کی گئی۔