Скачать или смотреть VIJANA WAWILI WANASWA NA SHEHENA YA MBEGU FEKI ZA MAHINDI MWANZA.

Vijana wawili wamekamatwa na vyombo za ulinzi na usalama wilayani Magu mkoani Mwanza kwa tuhuma za kuzalisha na kusambaza mbegu feki za mahindi zenye thamani ya zaidi ya Sh milioni 41 pamoja na dawa feki za mifugo hali inayotajwa kurudisha nyuma jitihada za Serikali katika kuwainua wakulima na wafugaji.

Vijana hao ndugu, Mahe James Raymond (28) na Omary James Mahe (27) wamekamatwa siku ya Jumatano tarehe 23 Oktoba, 2024 na jeshi la polisi wilayani Magu kwa kushirikana na maofisa ukaguzi wa wilaya ya Magu baada ya kupata taarifa kutoka kwa wasamaria wema.

Watuhumiwa hao ambao wanashikiliwa katika kituo cha polisi wilaya ya Magu, walikuwa wakiendesha shughuli zao za uzalishaji wa mbegu feki katika moja ya nyumba iliyopo mtaa wa Isandula Juu, kata ya Kandawe – Magu Mjini.

Akizungumza na waandishi wa Habari jana tarehe 24 Oktoba, 2024 baada ya kukagua mbegu hizo feki za mahindi pamoja na dawa feki za mifugo, Mkuu wa Wilaya ya Magu, Joshua Nassari amesema baada ya kupekua nyumba hiyo wamebaini zaidi ya magunia 20 ya mahindi ambayo yalikuwa yanaandaliwa kuwekwa rangi kabla ya kupakiwa kwenye vifungashio.

Amesema maofisa hao wa halmashauri ya wamekamata mbegu feki za mahindi tani 2.6 (kilo 2,600) zikiwa kwenye vifungashio vya kampuni ya DK zenye namba tofauti tofauti.

Naye Mkaguzi wa mbegu na Mkuu wa Taasisi ya Kuthibiti Ubora wa Mbegu Tanzania (TOSCI) kanda ya Ziwa, Ayoub Mushema amesema mbegu hizo ni feki kwa sababu hazina lebo ya udhibiti wa ubora ya TOSC wala ile ya mbegu zinazotoka nje.

Aidha, Afisa Mfugo wa Halmashauri ya Wilaya ya Magu, Dominic Mwakapemba ametoa wito kwa kuhakikia kwa makini vifungashio kama vina taarifa za mzalishaji, lebo mdhibiti ubora na pia kuchukua risiti kuitunza.