လက်ဘနွန်ရှိ ကုလသမဂ္ဂ ယာယီတပ်ဖွဲ့ မူလနေရာတွင် ခေတ္တဆက်လက်တပ်စွဲရန် စီစဉ်ထား

လက်ဘနွန်ရှိ ကုလသမဂ္ဂ ယာယီတပ်ဖွဲ့ မူလနေရာတွင် ခေတ္တဆက်လက်တပ်စွဲရန် စီစဉ်ထား

ပေကျင်း၊ အောက်တိုဘာ ၆ ရက် (ဆင်ဟွာ)

ကုလသမဂ္ဂက စေလွှတ်ထားသော လက်ဘနွန်နိုင်ငံတောင်ပိုင်းနယ်စပ်ဒေသရှိ ငြိမ်းချမ်းရေးထိန်းသိမ်းမှုတပ်ဖွဲ့များသည် မူလနေရာ၌ ခေတ္တဆက်လက်တပ်စွဲထားရန် ဆုံးဖြတ်ထားကြောင်း ကုလသမဂ္ဂငြိမ်းချမ်းရေးထိန်းသိမ်းမှုလှုပ်ရှားရေးအဖွဲ့တာဝန်ရှိသူက အောက်တိုဘာ ၃ ရက်တွင် ပြောကြားခဲ့သည်။ ယင်းမတိုင်မီ အစ္စရေးက လက်ဘနွန် ဟစ်ဇ်ဘိုလာ ပစ်မှတ်များကို မြေပြင်စစ်ဆင်ရေးများ ပြုလုပ်တော့မည်ဟု ပြောကြားခဲ့ပြီး လက်ဘနွန်တောင်ပိုင်းရှိ ငြိမ်းချမ်းရေး ထိန်းသိမ်းမှုအဖွဲ့ဝင်များကို အမြန်ဆုံး ဆုတ်ခွာရန် တောင်းဆိုခဲ့သည်။

လက်ဘနွန်ရှိ ကုလသမဂ္ဂ ယာယီတပ်ဖွဲ့ (UNIFIL) ကို ဆက်လက်စခန်းချထားရှိခြင်းသည် ဘက်စုံ နက်နက်ရှိုင်းရှိုင်း ဆွေးနွေးပြီးနောက် ပြုလုပ်သော ဆုံးဖြတ်ချက်ဖြစ်သည်ဟု ကုလသမဂ္ဂ ငြိမ်းချမ်းရေး ထိန်းသိမ်းမှုရေးရာ လက်ထောက် အထွေထွေ အတွင်းရေးမှူး Jean-Pierre Lacroix က နယူးယောက်မြို့ ကုလသမဂ္ဂရုံးချုပ်တွင် သတင်းထောက်များအား ပြောကြားခဲ့သည်။ UNIFIL သည် အစ္စရေးနှင့် လက်ဘနွန် စစ်ဘက်ဆိုင်ရာ တပ်ဖွဲ့များနှင့် အမြဲ အဆက်အသွယ် ရှိနေကြောင်း ၎င်းက ပြောကြားခဲ့သည်။ "လက်ရှိ အလွန်ကြမ်းတမ်းခက်ထန်တဲ့ အခြေအနေတွေအောက်မှာ UNIFIL က လုံခြုံရေးကောင်စီရဲ့ ဆုံးဖြတ်ချက်တွေကို ဆက်လက်အကောင်အထည်ဖော်ဖို့ အစွမ်းကုန် လုပ်ဆောင်နေပါတယ်" ဟု ၎င်းက ပြောကြားခဲ့သည်။

၁၉၇၈ ခုနှစ်တွင် အစ္စရေးသည် လက်ဘနွန်ကို ပထမဆုံးအကြိမ် ကျူးကျော်ဝင်ရောက်ခဲ့ပြီးနောက် မကြာမီ ကုလသမဂ္ဂ လုံခြုံရေးကောင်စီက ဆုံးဖြတ်ချက်အမှတ် ၄၂၅ ကို အတည်ပြုခဲ့ကာ အစ္စရေး၏ ဆုတ်ခွာမှုကို ကြီးကြပ်ရန်နှင့် ဒေသတွင်း ငြိမ်းချမ်းရေးနှင့် လုံခြုံရေးကို ပြန်လည်ထူထောင်ရန် UNIFIL ကို တည်ထောင်ခဲ့သည်။ ထိုအချိန်မှစ၍ လက်ဘနွန်အစိုးရ၏ တောင်းဆိုချက်နှင့် လက်ဘနွန်တောင်ပိုင်းဒေသ အခြေအနေများ၏ လိုအပ်ချက်များကို ဖြည့်ဆည်းရန် UNIFIL စခန်းချထားမည့်ကာလကို ဆက်လက် သက်တမ်းတိုးခဲ့သည်။
၂၀၀၆ ခုနှစ် လက်ဘနွန်ဟစ်ဇ်ဘိုလာအဖွဲ့ နှင့် အစ္စရေး အကြား အပြန်အလှန် ပစ်ခတ်မှု အကြီးအကျယ်ဖြစ်ပွားခဲ့ပြီး ထိုနှစ် သြဂုတ်လတွင် လုံခြုံရေးကောင်စီက ဆုံးဖြတ်ချက် အမှတ် ၁၇၀၁ ကို အတည်ပြုခဲ့ရာ လက်ဘနွန်နှင့် အစ္စရေး နှစ်ဖက်စလုံးကို ရန်လိုလှုပ်ရှားမှုများ ရပ်တန့်ရန်၊ လစ်တာနီမြစ်မှ လက်ဘနွန်-အစ္စရေးယာယီနယ်စပ်၏ "အပြာရောင်စည်း" ကြား လက်ဘနွန် အစိုးရတပ်နှင့် ကုလသမဂ္ဂငြိမ်းချမ်းရေးထိန်းသိမ်းမှုတပ်ဖွဲ့မှလွဲ၍ မည်သည့်အခြားလက်နက်ကိုင်တပ်ဖွဲ့များ မရှိရန် တောင်းဆိုခဲ့သည်။ ဆုံးဖြတ်ချက်သည် UNIFIL ၏ မစ်ရှင်လုပ်ပိုင်ခွင့်ကိုလည်း တိုးချဲ့ခဲ့ပြီး လက်ဘနွန်တောင်ပိုင်းဒေသ လုံခြုံရေးကို ကာကွယ်ထိန်းသိမ်းရန် တပ်ဖွဲ့ဝင်အင်အားများ တိုးမြှင့်ချထားခဲ့သည်။ ယခုနှစ်ဧပြီလအထိ UNIFIL သည် နိုင်ငံအများအပြားမှ စစ်သားနှင့် အရပ်ဘက်အမှုထမ်း ၁၀,၀၀၀ ဖြင့် ဖွဲ့စည်းထားကြောင်း UNIFIL ၏ တရားဝင်ဝက်ဘ်ဆိုက် ဖော်ပြချက်အရ သိရသည်။

ယခုသီတင်းပတ်အစောပိုင်းတွင် အစ္စရေးစစ်တပ်သည် UNIFIL တပ်ဖွဲ့များကို "အပြာရောင်စည်း" မှ ၅ ကီလိုမီတာအကွာရှိ နေရာများသို့ ဆုတ်ခွာရန်၊” ခင်ဗျားတို့ရဲ့ (UNIFIL ငြိမ်းချမ်းရေးထိန်းသိမ်းမှုအဖွဲ့ဝင်များ) လုံခြုံမှု သေချာစေဖို့ မြန်လေကောင်းလေ” ဟု တောင်းဆိုထားကြောင်း ရိုက်တာ သတင်းဌာန၏အဆိုအရ သိရသည်။


UNIFIL ငြိမ်းချမ်းရေးထိန်းသိမ်းမှုအဖွဲ့ဝင်အားလုံးသည် လက်ရှိတွင် မူလနေရာ၌ ဆက်လက်တည်ရှိနေမည်ဖြစ်ပြီး အစ္စရေးနှင့် လက်ဘနွန်ဟစ်ဇ်ဘိုလာအဖွဲ့ တို့သည် ငြိမ်းချမ်းရေးထိန်းသိမ်းမှုအဖွဲ့ဝင်၏ ဘေးကင်းရေးကို ကာကွယ်ရန် တာဝန်ရှိသည်ဟု Lacroix က ပြောကြားခဲ့သည်။
လက်ဘနွန်နယ်နိမိတ်အတွင်း "အကန့်အသတ်နဲ့ ပစ်မှတ်ထားတိုက်ခိုက်တဲ့ မြေပြင်စစ်ဆင်ရေးတွေ" ဖြစ်လာနိုင်သည်ဟု UNIFL က ကြိုတင်မျှော်မှန်းထားပြီး ဖြစ်နိုင်သည့်အခြေအနေအမျိုးမျိုးအတွက် အရေးပေါ်အစီအစဉ်များကို ရေးဆွဲထားကြောင်း Lacroix က ထုတ်ဖော်ပြခဲ့သည်။ UNIFIL သည် ငြိမ်းချမ်းရေးထိန်းသိမ်းမှုအဖွဲ့ဝင်များ၏ ဘေးကင်းမှု သေချာစေရန် အခြေအနေ ဖြစ်ပေါ်နေမှုကို ဆက်လက် အကဲဖြတ်သွားမည်ဖြစ်ကြောင်း သိရသည်။

စက်တင်ဘာ လလယ်က လက်ဘနွန်တွင် ဆက်သွယ်ရေး ကိရိယာ ပေါက်ကွဲမှု အကြီးအကျယ် ဖြစ်ပွားပြီးနောက် လက်ဘနွန်နှင့် အစ္စရေးတို့ကြား ပဋိပက္ခသည် ရုတ်တရက် ပြင်းထန်လာသည်။ အစ္စရေးသည် လက်ဘနွန်ဟစ်ဇ်ဘိုလာအဖွဲ့ ခေါင်းဆောင် Hassan Nasrallah အပါအဝင် ဟစ်ဇ်ဘိုလာအဖွဲ့မှ အကြီးတန်းပုဂ္ဂိုလ်အများအပြားကို “ပစ်မှတ်ထား ရှင်းလင်းခြင်းများ” ဆက်တိုက် လုပ်ဆောင်ခဲ့သည်။ လက်ဘနွန်တောင်ပိုင်းနယ်စပ်ဒေသရှိ ဟဇ်ဘိုလာပစ်မှတ်များကို “အကန့်အသတ်ဖြင့် မြေပြင်စစ်ဆင်ရေးများ” စတင်ခဲ့ကြောင်း အစ္စရေးစစ်တပ်က အောက်တိုဘာ ၁ ရက် နံနက်အစောပိုင်းတွင် ကြေညာခဲ့ပြီး နောက်ပိုင်း၌ လေကြောင်းအကူအညီဖြင့် လက်ဘနွန်ကို မြေပြင်တိုက်ခိုက်မှုများ ပြုလုပ်ခဲ့သည်။

လွန်ခဲ့သောနှစ်အတွင်း အစ္စရေးက လက်ဘနွန်အပေါ် တိုက်ခိုက်မှုများ ဆက်တိုက်လုပ်ဆောင်လာခြင်းကြောင့် လက်ဘနွန်တွင် လူပေါင်း ၁.၂ သန်းကျော် အိုးမဲ့အိမ်မဲ့ဖြစ်ခဲ့ပြီး လူပေါင်း ၂,၀၀၀ နီးပါး သေဆုံးခဲ့ရာ ၎င်းအနက် အများစုမှာ လွန်ခဲ့သည့် နှစ်ပတ်အတွင်း အစုလိုက်အပြုံလိုက်သေဆုံးခဲ့ခြင်းဖြစ်ကြောင်း လက်ဘနွန်အစိုးရ၏ ကိန်းဂဏန်းအချက်အလက်များအရ သိရသည်။ (Xinhua)

#UnitedNation #Lebanon #လက်ဘနွန်ဟစ်ဇ်ဘိုလာအဖွဲ့ #အစ္စရေး #UNIFIL #လက်ဘနွန်ရှိကုလသမဂ္ဂယာယီတပ်ဖွဲ့ #ငြိမ်းချမ်းရေးထိန်းသိမ်းမှုတပ်ဖွဲ့