Скачать или смотреть ကျားဖြန့် မျက်နှာစာအသစ် ကျောက်ခတ် | People's Spring

ကျားဖြန့် မျက်နှာစာအသစ် ကျောက်ခတ်

နဒီ/People's Spring

ကရင်ပြည်နယ်၊ မြဝတီဒေသကကျားဖြန့် လုပ်ငန်းတွေရဲ့အကြောင်းဟာ ဒီလပိုင်းအတွင်းမှာ​ဒေသတွင်းအဆင့်​ကျော်လွန်ပြီးနိုင်ငံတကာကိုပါ အုတ်အော်သောင်းနှင်း ဖြစ်နေပါတယ်။ကျားဖြန့် လူကုန်ကူးဂိုဏ်းတွေရဲ့ အကြောင်းကိုပြောလိုက်ရင် အများစုက ကာစီနို လောင်းကစားရုံတွေရှိတဲ့ မြဝတီ​ဒေသက ရွှေကုက္ကိုလ် နဲ့ KK Park ကိုပဲလူသိများတာပါ။

အများစုသိပ်မသိသေးတဲ့ ကျားဖြန့်လုပ်ငန်းတွေရဲ့ ကြင်လည်ရာအရပ်ဒေသအသစ်တစ်ခု မြဝတီဒေသမှာပဲ ထပ်မံထွက်ပေါ်လာပါတယ်။ ၂၀၂၁ခုနှစ် စစ်တပ်အာဏာမသိမ်းမီကတည်းက အစပျိုးလာတဲ့ အဲဒီဒေသအသစ်ဟာ စစ်တပ်အာဏာသိမ်းအပြီးမှာတော့ နေ့ချင်း၊ညချင်း တဟုန်ထိုးအဆောက်အဦးတွေဆောက်ပြီး မြို့ပြအသစ်တစ်ခုလို ဖြစ်နေပါပြီ။

မြဝတီမြို့နဲ့ (၂၅)မိုင်ကျော်ကွာဝေးပြီး ထိုင်းနိုင်ငံ ဖုဖရမြို့နယ်ရဲ့ မျက်နှာချင်းဆိုင်နေရာမှာရှိတဲ့ ကျောက်ခတ်လို့ ခေါ်တဲ့ကျေးရွာမှာ အသစ်ထွက်ပေါ်လာပါတယ်။

မြဝတီမြို့နယ်က ကျောက်ခတ်ဒေသဟာ ဒီမိုကရက်တစ် ကရင်အကျိုးပြုတပ်မတော်(DKBA)စိုးမိုးရာနယ်မြေဒေသဖြစ်ပြီး DKBAက ဗိုလ်မှူးချုပ် စိုင်းကျော်လှ အုပ်ချုပ်နေတာဖြစ်ပါတယ်။ ဗိုလ်မှူးချုပ် စိုင်းကျော်လှဟာ အရင်ကတော့ ရှမ်းပြည်တပ်မတော်(SSPP)က ဖြစ်ပါတယ်။

ဗိုလ်မှူးချုပ် စိုင်းကျော်လှ အုပ်ချုပ်နေတဲ့ ကျောက်ခတ်ဒေသမှာဖြစ်နေတဲ့ အရာတွေကို အများသိအောင် ဖော်ထုတ်ခဲ့တာကတော့ ကင်ညာနိုင်ငံသားဖြစ်ပါတယ်။ ကင်ညာနိုင်ငံသားဟာ ဖေဖော်ဝါရီ ၉ရက်မှာ ကျောက် ခတ်က လူကုန်ကူးဂိုဏ်းဆီကနေ ထွက်ပြေးလွတ်မြောက်လာပြီး ထိုင်းနိုင်ငံ ဖုဖရရဲစခန်းကို သူကြုံတွေ့ခဲ့ရတဲ့ ဖြစ်ရပ်တွေကို ဖွင့်ချခဲ့တာပါ။

ကင်ညာနိုင်ငံသား နဲ့ အတူ အယောက် ၅၀လောက်က ကျောက်ခတ်မှာရှိတဲ့ တရုတ် လူမျိုး လူကုန်ကူးဂိုဏ်းရဲ့ လက်ထဲကနေ ထွက်ပြေးလွှတ်မြောက်လာခဲ့တာပါ။ သူတို့ဟာ အုတ်တံတိုင်းကိုကျော်တက်ပြီး လွှတ်မြောက်လာခဲ့တာလို့ ဖုဖရရဲစခန်းမှာ ထွက်ဆိုထားတဲ့အကြောင်း မဲဆောက်မြို့က သည်ရီပိုတာသတင်းဌာနက ဖော်ပြပါတယ်။

သူက ထိုင်းမှာ လစာကောင်းကောင်းနဲ့ စားဖိုမှူး အလုပ်ရမယ်ဆိုတဲ့ ပြည်တွင်း အလုပ်ခေါ်စာ တစ်စောင်ကို ယုံစားရာက အောက်တိုဘာ ၅ ရက်နေ့မှာ ထိုင်းကို ရောက်ခဲ့ကြောင်း ပြောပါတယ်။ ပြီးတော့ သူနဲ့အတူ တခြားကင်ညာ နိုင်ငံသား ၂ ဦးကို အေးဂျင့်တစ်ယောက်က ဘန်ကောက်မြို့၊ သုဝဏ္ဏဘူမိ လေဆိပ်မှာ လာစောင့်နေခဲ့ပြီး မဲဆောက်ကို ခေါ်သွားခဲ့သလို အဲဒီကနေတဆင့် နယ်စပ်ဖြတ်ပြီး မြန်မာဖက်ကို ဝင်ရောက်ခဲ့တယ်လို့လည်း သူက ရှင်းပြပါတယ်။

အဲဒီအချိန်ကစပြီး သူတို့ ၃ ယောက်လုံးဟာ ကျားဖြန့်ဂိုဏ်းအတွက် အလုပ်လုပ်ပေးဖို့ အဓမ္မ ခိုင်းစေခံခဲ့ရပါတယ်။

ငွေလိမ်ဂိုဏ်းက ခေါင်းဆောင်တွေဟာ တရုတ်မာဖီးယားတွေဖြစ်ပြီး အဲဒီလူတွေဟာ တခြားဘာကိုမှ ဂရုမစိုက်ပဲ သတ်မှတ်ချက်ပြည့်မှီအောင် ငွေရှာရေးကိုသာ ဂရုစိုက်ကြပါတယ်။ တကယ်လို့ သတ်မှတ်ချက်မပြည့်မှီရင် ညှဉ်းပန်းနှိပ်စက်ခံရကြောင်း ပြောပြပါတယ်။

ကျဥ်စက်နဲ့တို့တာ၊ ဖိနပ်ချွတ်ခိုင်းပြီး စူးတွေပေါ်ရပ်ခိုင်းတာ၊ စူးပေါ်ရပ်နေရင်း အလေးတွေကိုင်ပြီး ထိုင်ထလုပ်ရတာတွေလို့ ဆိုပါတယ်။ နောက်ပြီး သူ့ရဲ့ ဒဏ်ရာတွေကို ဖယောင်းရည်ပူနဲ့ လောင်းချတာမျိုးလည်း ခံခဲ့ရပါတယ်။သူ့မှာရခဲ့တဲ့ ဒဏ်ရာတွေကိုလည်း သတင်းထောက်တွေကို ပြပါတယ်။

အဲဒီ့မှာ အလုပ်လုပ်တဲ့ အမျိုးသမီးတစ်ယောက်ဆိုရင် (၆)နာရီကျော်ကြာ သတိလစ်သွားတာတောင် ဆေးရုံကို မပို့ပေးဘူးလို့လည်း ကင်ညာနိုင်ငံသားက ပြောပါတယ်။

သူဟာ နယ်စပ်ထိ ခြေဗလာနဲ့ ထွက်ပြေးလာတာကြောင့် ခြေထောက်တွေ ရောင်ကိုင်းနေခဲ့တယ်လို့လည်း ထိုင်းရဲတွေက ဆိုပါတယ်။

အဲဒီနေရာကို တရုတ်မာဖီးယားတွေက ထိန်းချုပ်ထားပြီး အဆောက်အအုံတွေ အများကြီးရှိတယ်လို့လည်း ကင်ညာနိုင်ငံသားက ဆက်ပြောပါတယ်။ သူအပါအဝင် ကင်ညာနိုင်ငံသား ၂၃ဦးရှိပြီး အခု ကင်ညာသား ၂၂ဦးကတော့ ပိတ်မိနေတုန်းပဲလို့ ဖွင့်ဟပါတယ်။

မြဝတီဒေသမှာ ပြီးခဲ့တဲ့ ဇန်နဝါရီ၃ရက်က တရုတ်မင်းသား ဝမ်ကျင် လူကုန်ကူးခံရတဲ့ဖြစ်ရပ်အပြီး အခု ကင်ညာနိုင်ငံသားအဖွဲ့က နောက်ထက် ထွက်ပေါ်လာတဲ့ ဇာတ်လမ်းတစ်ပုဒ်ဖြစ်ပါတယ်။

လူထုနွေဦးရဲ့ ကျောက်ခတ်ဒေသ သတင်းအရင်းမြစ်ကတော့ သူတို့ဆီမှာ တရုတ်လူမျိုးတွေ ထောင်နဲ့ချီရှိနေတယ်လို့ ပြောပါတယ်။ တရုတ်လူမျိုးအချို့ဆို လက်နက်ပါ ကိုင်ဆောင်တာရှိတယ်လို့လည်း ပြောပါတယ်။

“ ကျောက်ခတ်က လုံးဝ ဟောင်ကောင်ပဲ။ တရုတ်တွေ ကြိုက်တာလုပ်ခွင့်ပေးထားတာ”လို့ ပြောပါတယ်။

ထိုင်းနိုင်ငံကနေ တဆင့် လူကုန်ကူးခံရတဲ့သူအများစုဟာ ကျောက်ခတ်ဒေသကို အရင်ရောက်ပြီး အဲဒီကနေတဆင့် မြဝတီမြို့နယ်ထဲက လုပ်ငန်းဆိုက်အသီးသီးကို ပို့ဆောင်တာလို့ လူထုနွေဦးက စုံစမ်းသိရပါတယ်။

ကျောက်ခတ်ကျေးရွာရဲ့ အမည်ကို စာဖတ်သူတွေ အရင်ကကြားဖူးပါလိမ့်မယ်။ ၂၀၁၄ ဦးသိန်းစိန်အစိုးရ လက်ထက်ကဖြစ်ပါတယ်။ ရန်ကုန်တိုင်း လှည်းကူးမြို့နယ်ထဲက သမီးကလေးကျေးရွာကို ကျူးကျော်တွေဆိုပြီး အာဏာပိုင်တွေက ဘူဒိုဇာတွေနဲ့ ဖျက်ဆီးခဲ့လို့ နေစရာမရှိဖြစ်နေတဲ့ သူတွေကို DKBAက လာခေါ်ပြီး ကျောက်ခတ်ကျေးရွာမှာ နေစရာပေးခဲ့ပါတယ်။

နယ်စပ်ဒေသမှာရှိတဲ့ လူကုန်ကူးဂိုဏ်းတွေရှိတဲ့ ကျားဖြန့်လုပ်ငန်းတွေကို အထိနာအောင် ထိုင်းအစိုးရက မီးဖြတ်တောက်မှု၊အင်တာနတ်ဖြတ်တောက်မှုတွေကို ပြုလုပ်ခဲ့ပေမယ့် လက်တလော အထိနာတွေတာက ပြည်သူတွေလို့ ပြောပါတယ်။

ကျားဖြန့်လုပ်ငန်း​တွေဟာ တခြား​ဒေသကို​ရွေ့​ပြောင်းတာရှိ​နေသလို ၊ရှိ​နေတဲ့ ကျားဖြန့်လုပ်ငန်း​တွေအ​​ပေါ် ဓါတ်အားနဲ့ စက်သုဲးသက်​ရောက်မှု ၄၀ ရာခိုင်နှုန်း​လောက်ရှိတယ်လို့ ထိုင်းအစိုးရဘက်က​သုံးသပ်ပြောကြားထားပါတယ်။

ကျားဖြန့်လုပ်ငန်း​တွေကို ထိထိ​ရောက်​ရောက်အ​ရေးယူချင်ရင် စစ်​ကောင်စီ နဲ့ စစ်တပ်လက်​​အောက်ခံ BGF ၊ DKBA နဲ့ တရုတ်ရာဇဝတ်ဂိုဏ်​တွေကိုပဲ ထိထိ​ရောက်​ရောက်အ​ရေးယူသင့်တာဖြစ်ပြီး ပြည်သူ​တွေကိုထိခိုက်​အောင်မလုပ်သင့်ဘူးလို့ ပြည်သူအချို့က​ပြောပါတယ် ။ ။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring