Скачать или смотреть WENYEVITI WA VIJIJI MONDULI WANOLEWA, WASISITIZWA KUZINGATIA SHERIA NA MIONGOZO YA UTUMISHI WAO

Mkuu wa Wilaya ya Monduli Mkoani Arusha Mhe. Festo Kiswaga leo Jumanne Aprili 08, 2025 amekutana na kuzungumza na Wenyeviti wa Vijiji na Maafisa watendaji wa Kata na Vijiji Vya Halmashauri hiyo, akisisitiza umuhimu wa kutambua Majukumu yao na kuzingatia Miongozo, Taratibu na Sheria zinazowaongoza kwenye majukumu yao ya kila siku.

Mhe. Kiswaga amesisitiza pia umuhimu wa Viongozi hao kushirikiana katika utendaji, sambamba na kutambua kuwa wananchi ndio waajiriwa wao, akivitaka pia vyombo vya habari kuzingatia maadili ya uandishi wa habari kwa kuweka usawa kwenye taarifa zao kwa kuzungumza na pande zote zitakazokuwa zinahusika na taarifa wanazoziandika kutoka kwa wananchi.

"Kila mmoja lazima uoneshe uwezo wako wa kiuongozi kwa kufuata kanuni, sheria na taratibu zilizopo, kuna watu wanashinda Uenyekiti wa Kijiji anaona kama kile Kijiji ni cha kwake, cha familia yake na anaweza kufanya chochote anachotaka. Kazi haziendi hivyo, kama uliingia ukakuta mipango ya mwenzako imefanyika, usiiguse isipokuwa tu kama ilikuwa ina tatizo, mfuate Mtendaji muulize na baadae iboreshe tu kwa kushirikisha wenzako." Ameongeza Mhe. Festo Kiswaga.

Akikemea pia suala la uuzaji wa ardhi kiholela, Mhe. Kiswaga amepiga marufuku uuzaji wa ardhi bila ya kushirikisha Ofisi ya Mkurugenzi wa Halmashauri hiyo katila jitihada za kupambana na migogoro ya ardhi ambayo imeonekana kushamiri kutokana na baadhi ya wenyeviti wa Vijiji ambao wamekuwa wakisimamia uuzaji wa ardhi bila kuzingatia sheria.

Viongozi hao wa Vijiji pia wamesisitizwa umuhimu wa kusoma ripoti za mapato na matumizi kila baada ya miezi mitatu, kuzingatia taratibu na miongozo ya matumizi ya fedha pamoja na kujiepusha na ubadhirifu ambapo Viongozi hao wameshukuru kwa maelekezo hayo ambayo yamewajengea uelewa kuhusu majukumu yao ya kila siku kwa wananchi.