Скачать или смотреть #WuOpera

တရုတ်ပြည်သူ့သမ္မတနိုင်ငံထူထောင်ခြင်း (၇၆) နှစ်မြောက်နှင့် တရုတ်-မြန်မာ သံတမန်ဆက်ဆံရေးထူထောင်ခြင်း (၇၅) နှစ်မြောက်ဂုဏ်ပြုခြင်း အထိမ်းအမှတ် အနုပညာဖျော်ဖြေပွဲ မြန်မာနိုင်ငံ ရန်ကုန်မြို့၌ ကျင်းပ

ရန်ကုန်၊ စက်တင်ဘာ ၂၂ ရက် (ဆင်ဟွာ)

တရုတ်ပြည်သူ့သမ္မတနိုင်ငံထူထောင်ခြင်း (၇၆) နှစ်မြောက်နှင့် တရုတ်-မြန်မာ သံတမန်ဆက်ဆံရေးထူထောင်ခြင်း (၇၅) နှစ်မြောက်ဂုဏ်ပြုခြင်း အထိမ်းအမှတ် အနုပညာဖျော်ဖြေပွဲကို စက်တင်ဘာ၂၀ ရက် ညနေပိုင်းတွင် ရန်ကုန်မြို့ ဒဂုံမြို့နယ် မြို့မ ကျောင်းလမ်းရှိ အမျိုးသားဇာတ်ရုံ၌ ကျင်းပခဲ့သည်။ စက်တင်ဘာ ၂၁ ရက် ညနေ ၃ နာရီတွင်လည်း ပရိသတ်များအား ဆက်လက်ကပြဖျော်ဖြေသွားမည်ဖြစ်ကြောင်း သိရသည်။

အခမ်းအနားသို့ မြန်မာနိုင်ငံဆိုင်ရာ တရုတ်သံအမတ်ကြီး Ms. Ma Jia အပါအဝင် တရုတ်သံရုံးမှ သံတမန်အရာရှိများ၊ ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း၊ သာသနာရေးနှင့်ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး ဦးတင်ဦးလွင်၊ ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာ ချောချောစိန်၊ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်း ၊ နိုင်ငံပေါင်းစုံမှ သံတမန်များနှင့် နယ်ပယ်ပေါင်းစုံမှ ကိုယ်စားလှယ်များ စုစုပေါင်း နှစ်ထောင်ကျော် တက်ရောက်ခဲ့ကြသည်။

အဆိုပါအနုပညာဖျော်ဖြေပွဲကို မြန်မာနိုင်ငံဆိုင်ရာ တရုတ်သံရုံး၊ မြန်မာနိုင်ငံ နိုင်ငံခြားရေးဝန်ကြီးဌာန၊ သာသနာရေးနှင့် ယဉ်ကျေးမှု ဝန်ကြီးဌာန၊ တရုတ်နိုင်ငံ၊ ကျဲ့ကျန်းပြည်နယ် ယဉ်ကျေးမှု၊ ရုပ်မြင်သံကြားနှင့် ခရီးသွားလာရေးဦးစီးဌာန၊ တရုတ်နိုင်ငံ၊ ကျဲ့ကျန်းပြည်နယ်၊ ဝူအော်ပရာ အနုပညာသုတေသနအဖွဲ့ (ကျဲ့ကျန်း ဝူအော်ပရာအဖွဲ့) အပါအဝင် သက်ဆိုင်ရာ အဖွဲ့အစည်းများမှ ကူညီထောက်ပံ့ခဲ့ခြင်းဖြစ်သည်။

ဝူအော်ပရာ《吕布试马》 “လွီပု မြင်းကို စမ်းသပ်စီးနင်းခြင်း”၊《天女散花》“နတ်သမီး ပန်းများဖြန့်ကြဲခြင်း” ၊《三岔口》 “လမ်းသုံးသွယ်” ၊《三打白骨精》“အရိုးဖြူဘီလူးမအား သုံးကြိမ်ရိုက်နှက်နှိမ်နင်းခြင်း” စသည့်အစီအစဉ်များသည် ဆန်းပြားလှသည့် တရုတ်ယဉ်ကျေးမှုများကို ပြသခဲ့ပြီး ထိုဂီတအသံများ၏ တိကျလှပမှု၊ များပြားစုံလင်သည့် တောက်ပသောအက တင်ဆက်မှုများသည် ကြည့်ရူသူများ၏ စိတ်ကိုလှုပ်ရှားစေခဲ့သည်။ နှစ်ပေါင်း ၅၀၀ကျော် သမိုင်းကြောင်းရှိခဲ့ပြီး တရုတ်နိုင်ငံ နိုင်ငံတော်အဆင့် ယဉ်ကျေးမှုအမွေအနှစ် ဖြစ်ပါသည်။ ဝူအော်ပရာ အနုပညာသည် ယဉ်ကျေးမှု ကိန်းအောင်းကာ ၊ လူမျိုးရေး ခံစားချက်များကို သယ်ဆောင်ပြီး ယနေ့တိုင် တရုတ်နိုင်ငံတွင်သာမက ကမ္ဘာတစ်ဝန်းတွင်လည်း လူသိများပြီး သြဇာလွှမ်းမိုးမှု အရှိန်အဟုန် တိုးမြင့်နေလျက် ရှိပါသည်။

ယဉ်ကျေးမှုများသည် အပြန်အလှန် ဖလှယ်ခြင်းအားဖြင့် ထွန်းကားလာပြီး အပြန်အလှန် သင်ယူလေ့လာမှုမှတဆင့် ပိုမိုစုံလင်သည့် အရည်အသွေး ရရှိလာသည်။ မြန်မာအနုပညာရှင်များကလည်း ဂန္ထဝင်ဇာတ်တော်ကြီး “ရာမာယဏ” ဇာတ်တော်ကြီးမှ အစိတ်အပိုင်းနှစ်ခုဖြစ်သည့် “ရာမမင်းသား သမင်လိုက်ခန်း” နှင့် “သီတာမင်းသမီးက ဒဿဂီရိဘီလူး၏ အချစ်ကို ငြင်းပယ်ခြင်း” တို့ကို တင်ဆက်ပေးခဲ့ကြသည်။ ဂီတနှင့် အက အလှတရားများသည် မြန်မာနှင့် အရှေ့တောင်အာရှ နိုင်ငံများ၏ ထူးခြားသည့် ယဉ်ကျေးမှုအသွင်အပြင်၊ လူမျိုး စရိုက်လက္ခဏာများကို ဖော်ပြပေးနိုင်ခဲ့သည်။ တရုတ်-မြန်မာ အနုပညာရှင်များ ပူးပေါင်းဖျော်ဖြေပွဲသည် အရွယ်အစားကြီးမား၍ အနုပညာ အဆင့်အတန်း မြင့်မားကာ လူမျိုးရေးဝိသေသနကို ထိရောက်စွာ ဖော်ပြခဲ့သည်။ ကမ္ဘာယဉ်ကျေးမှုများ အပြန်အလှန် ဆုံဆည်း၍ အချင်းချင်း တန်ဖိုးတိုးတက်စေသည့် အလှတရား အထိမ်းအမှတ်အဖြစ် ထပ်မံဖန်တီးပေးခဲ့သည်။

ရန်ကုန်မြို့ တရုတ်ယဉ်ကျေးမှုစင်တာ၊ မြန်မာအမျိုးသား အနုပညာအထက်တန်းကျောင်း စသည့်အဖွဲ့အစည်းများကလည်း အဆိုပါပွဲကျင်းပရာ အမျိုးသားဇာတ်ရုံ(ရန်ကုန်)တွင် ရိုးရာ ယဉ်ကျေးမှု အမှတ်တရပြပွဲများကို ခင်းကျင်းပြသခဲ့ကြသည်။ ပြပွဲ မတိုင်မီနှင့် ပြီးဆုံးသည့်နောက်တွင် ကြည့်ရှုသူများက “你好！中国” “မင်္ဂလာပါ၊ တရုတ်နိုင်ငံ” စာအုပ်ကို လိုအပ်သလို ရယူကာ၊ မြန်မာ-တရုတ် နှစ်နိုင်ငံ၏ အမျိုးသားယဉ်ကျေးမှု အမွေအနှစ်များဖြစ်သည့် ချည်ယှက်ခြယ်၊ အပ်ချုပ်၊ သကြားပုံဆွဲ၊ စက္ကူညှပ်၊ လက်ပန်းချီ၊ သနပ်ခါးစသည့် ရိုးရာအစဉ်အလာတို့ကို ကိုယ်တိုင်လက်တွေ့ လေ့လာခွင့် ရရှိခဲ့ကြကြောင်း သိရသည်။ (Xinhua)

#WuOpera #ဝူအော်ပရာ #အနုပညာဖျော်ဖြေပွဲ #မြန်မာ-တရုတ်သံတမန်ဆက်ဆံရေးထူထောင်ခြင်း