Скачать или смотреть როგორია კარგი გადასახადი?

ქვეყანაში ზოგიერთი რამ, მაგალითად გარე განათება, სასწრაფო დახმარება, სახანძრო სამსახური, გზები - ყველას გვჭირდება. ეს ყველაფერი კი სახელმწიფო ბიუჯეტიდან ფინანსდება, რომლის შევსების ერთ-ერთი მთავარი წყარო ის გადასახადებია, რომელსაც ბიზნესები და მოქალაქეები იხდიან.
მნიშვნელოვანია, რომ გადასახადები უნდა იყოს ეფექტური და სამართლიანი.
თუ ადამიანებს ვაიძულებთ თავიანთი შემოსავლის იმდენად მნიშვნელოვანი ნაწილი მისცენ სახელმწიფოს, რომ მათ აღარ დარჩეთ თანხა თავიანთი პირადი სურვილების შესასულებლად, ასე ქვეყანაში საერთო კეთილდღეობის დონეც შემცირდება. გადასახადის დანიშნულება ისაა, რომ გადამხდელს სარგებელი უკან სხვადასხვა პროდუქტისა თუ სერვისის სახით დაუბრუნდეს.
რაც შეეხება სამართლიანობას, ეს ყველას თავისებურად ესმის და ქვეყნებისა და დროის მიხედვით საგადასახადო სისტემები განსხვავდება.
მაგალითად, საქართველოში, ყველა ადამიანისთვის საშემოსავლო გადასახადი ხელფასის 20%-ის ტოლია. თუ მარის ხელფასია 6000 ლარი, ის გადაიხდის 6000-ის 20%-ს 1200 ლარს, ხოლო თუ ნიკოს 800 ლარი აქვს ხელფასი, ის გადაიხდის 800-ის 20%-ს 160 ლარს.
განსხვავებით საქართველოსგან, ზოგიერთ ქვეყანაში პროგრესული გადასახადი აქვთ, ანუ მაღალი შემოსავლის მქონე ადამიანები პროცენტულადაც მეტ გადასახადს იხდიან. მაგალითად დანიაში, თუ ადამიანის შემოსავალი წლიურად 67 000$-ზე მეტია, ის 7%-ით მეტ საშემოსავლო გადასახადს გადაიხდის.
საზოგადოების ნაწილი მიიჩნევს რომ პროგრესული გადასახადით მდიდარ და ღარიბ ფენებს შორის უთანასწორობა მცირდება, ნაწილი კი მიიჩნევს ასეთი გადასახადით შრომისმოყვარე ან იღბლიანი ადამიანები იჩაგრებიან.
ასე რომ, ძნელია ერთმნიშვნელოვანი პასუხის გაცემა კითხვაზე - თუ როგორია ეფექტიანი და სამართლიანი საგადასახადო სისტემა.