CCIX ΣMER : Tagezzumt - 17 mars 2001 (Version corrigée)

Tagezzumt nna d-ibbey CCIX ΣMER ass n 17 g wayyur n mars n useggas n 2001 :

Ad iss-k rẓemɣ imi-new, a Σilem, ndehɣ iss-un,
A Awḥid ur iccaren tanbaṭṭ d waḍu !
Tenna ira Rebbi at-ts-ig, ur da ttemdakarr ;
A Bu-lɛerc lɛaḍim, Keyy aymi nger aggʷa,
Ur da tzerrid, a Ṭṭamen, unna Kʷni-iggunnan,
A Bu-rrḥemt, nga ak lemsayel-inew g ufus,
Keyy aymi iqqar abda maymi ijra ka,
A ta, rar-d, a tayuga-new, imassen ad mgullin,
Han awd aneccad amm winna ikerrzen akal,
Dinna izerreɛ yittiy, han iger iɣezzif-as !

Adday d-anefɣ imi-new ad di-bduɣ g-gʷawal,
Han awd ass d yiḍ ur aɣ-ifri leḥdiyat !
Ku tawriqt naru-tt, ɛeddant lmejriyat !
Xes a’ nɛawed ka, ma lḥedd, ur t-inn-ngula.
Ur d’ aɣ-d-itteddu yiḍes ! Rẓagen awd waman !
Adday da semraraɣ lemsayel, iḥezn-i wul !
Ka n ayt lɛeqqul ifhemn aɣef awen-d-uwiɣ,
Lxaḍer iḥerra, tta ur ufin mayd d-usin !

A ta, tgamt rreɛb, a luqt-a ! Kulci imzaray !
A ayd aɣulid iwlella-d, yaɣ-d luḍa !
Ibayeɛ-as lbazz i ufullus, yaɣ-d dat-as !
Ad as-faserɣ i mayd ur ittakezn awal :
Lbaṭṭel ibedda ; ayt nniyt, aɣen-d akal !
Zzaxt, udern-as id war-ul d id lgufi !
Ku yuwen, ayeddaɣ ifreɣn as ran ad iɛic !
Iga ccrab, dɣi, ɣur warraw ẓundd aɣu !
Ican ka taẓallit, lefsad yaɣ ddunit !

Idrus mag ttafad mami tkid tidiwa !
Waddaɣ mi tennid "Umneɣ-t." a’ kʷen-izzenz i ka !
Maka, ur as-nbaḍ i tsuta n xirezzaman !
Wa lafɛal nnami tsebbabem ayd d-iddan !
Σniɣ yuweḍ-ḍ, a ayt umuttel, unebdu-nnun !
Unna ikerzen dig-un ka n ibsan g-gʷakal,
Swa lxir ula bu-lɛar, at-ten-imger ass-a !
Wa da nzerreb, ma luqt n kulci teggunna-t !
A Σilem, a Wennami illa lmulek g ufus,
Keyy aymi issutur ku yuwen ayedda ran !
Wa rar-d, a Mulana, lɛezz idɣaren d-ikka !
A Bab n lferja, kulci ɣur-k ayd yaɣul !

Ibbey-as Ccix iɣef i tgezzumt-a s unya (llɣa) n Uɛelwan, inna-as :

A Rebbi, kksat taɣufi d lɣummet i itbirr !