Скачать или смотреть ნოდარ რევაზიშვილი

ჩემი ოთახის კედლები ცისფერია.
აღარ მახსოვს რა ფერია ცა.
კარგა ხანია გადავეჩვიე წოლას გულაღმა,
ცაში ყურებას.
მინდორში ვდგავარ ირგვლივ
ყველგან საფლავებია,
პროცესიაა...
სიკვდილს ქსოვს მიწა,
ჩაუშვებენ კუბოს თოკებით,
თავს დახრის ყველა,
და უკლებლივ ყველას თვალები
ჩაჰყურებს მიწას.
გარდა ერთისა...
ვინც წევს გულაღმა
ვინც დარჩება სამუდამოდ
ცასთან პირისპირ.
მინდორში ვდგავარ ირგვლივ
ყველგან საფლავებია,
წვანან ისინი,
სამუდამოდ ვინც დარჩნენ ცასთან,
ვწვები გულაღმა
მათთან ერთად
ცასთან პირისპირ...
ჩემი ოთახის კედლები კი
კვლავ ცის ფერია.
კარგახანია გადავეჩვიე წოლას გულაღმა
ვწევარ გულაღმა
ვწევარ გულაღმა
და აქედან ცას
აქედან ცა
არაფერია !

. . .


ავტომატგადაკიდებული,
გამთენიისას,
მძინარე ცოლ-შვილს,
რომ დახედა,
თავისი გადასაწერი პირჯვარიც რომ მათ გარდასახა,
წავიდა,
წავიდა და ვეღარ დაბრუნდა.

მიკვირს,
გული როგორ არ უსკდებათ იმ პირჯვარგარდასახულ ცოლებს,
ნამდვილი კაცები საფლავში უწევთ
და ყოველ ღამით,
როცა სხვასთან,
სხვებთან წვებიან.
მრცხვენია ხოლმე,
ხშირად მრცხვენია !