Скачать или смотреть 【元朗奇景 晚繁博愛迴旋處竟然冇車龍？ 加交通燈整體車龍減少20% 但南北車龍未分勻】

剛剛個星期日（2月9日），出入元朗嘅大動脈博愛迴旋處加咗兩組交通燈，分別喺屯門入迴旋處，同大欖隧道入迴旋處路口。以往我立法會開完會，要晚繁入元朗參加活動，基本上喺大欖個出口入博愛迴旋處，最低消費都要塞15分鐘，特別日子超過半個鐘頭都試過。為咗睇吓枝交通燈有幾犀利，琴日我就約咗運輸署嘅官員，喺加咗交通燈嘅第一個工作日晚繁，一齊入嚟睇咗成個鐘。由6:00開始，竟然最塞嘅大欖入迴旋處嘅樽頸位，今日居然一輪交通燈就清晒條龍，真係seeing is believing.

運輸署話如果有一個迴旋處唔同出入口有唔平均嘅車流，咁紅綠燈就可以大派用場。以佢哋嘅數據，由元朗市中心進入迴旋處少過大欖返元朗嘅車流，理論上大欖入嚟嘅綠燈應該長啲，不過因為大欖嗰條路好長，又闊啲附近有冇其他出入口，Hold到車嘅容量會大啲。相反如果市中心入嚟嗰啲車一出現倒灌就會block住咗元朗市嘅其他支路。所以暫時嘅設計係元朗市方向入嚟嘅車有較長嘅綠燈。

根據觀察，朝早大欖入嚟由以往400米嘅車龍，減到約150米，而屯門方向入嚟就由以往嘅300米車龍加到約400米，結果都幾有趣，一個方向好咗另一個方向就好似差咗咁，不過整體嚟講，總數由700米減到550米嘅車龍我都覺得係一件好事。我就即時同運輸署反映，係咪可以再調校燈號，公平分配交通燈帶嚟嘅好處，令到兩個入口嘅車龍齊齊減少到270米左右，令到大欖方向可以減少130米車龍，屯門都可以減少30米車龍，兩邊都好咗。運輸署就話車龍由好多環境造成，不過同意我哋個說法，會持續觀察同調教燈號，令到兩邊齊齊得益，公平啲。而琴日晚繁我哋就睇到兩個方向都由以往300米嘅車龍，減到咗一半咁滯，有明顯嘅改善。

見到呢盞交通燈加埋往錦田方向加多咗條線，令到啲車儲到一個長度一轉燈就可以”hur hur”聲咁出晒，簡直唔相信自己係企喺博愛迴旋處。我一直以來都覺得交通調控係一件非常複雜嘅事，原來交通燈喺適當嘅位置加落去配合天時地利人和係可以做到咁嘅效果。不過，我哋再睇多幾日先，暫時嚟講我係審慎樂觀嘅。