Скачать или смотреть கூடலூரில் புத்தரி கதிர் அறுவடை திருவிழா —பாரம்பரிய நடனங்களுடன் வனதேச மக்களின் ஆனந்தக் கொண்டாட்டம் 🌾🎉

கூடலூரில் புத்தரி கதிர் அறுவடை திருவிழா — பாரம்பரிய நடனங்களுடன் வனதேச மக்களின் ஆனந்தக் கொண்டாட்டம் 🌾🎉

நீலகிரி மாவட்டம், கூடலூர்:
நீலகிரி மாவட்டம் கூடலூர் வட்டத்தில் உள்ள புத்தூர் வயல், தொரப்பள்ளி, மேம்பாலக்கோடு உள்ளிட்ட பகுதிகளில் நூற்றாண்டுகளாக வழக்கமாக நடைபெற்று வரும் புத்தரி கதிர் அறுவடை திருவிழா இன்று மிகுந்த உற்சாகத்துடன் நடைபெற்றது.

இந்த விழாவில் பழங்குடியினர் மக்களின் பாரம்பரிய ஆடல்கள், நாட்டுப்புற இசைகள், நடனங்கள் என கலாச்சார நெறிமுறைகளுடன் விழா சிறப்பாக நடைபெற்றது. விவசாயிகள் மற்றும் ஏராளமான பொதுமக்களும் இதில் கலந்துகொண்டு மகிழ்ச்சி வெளிப்படுத்தினர்.

இந்த பகுதிகளில் உள்ள விவசாயக் குடும்பங்கள் தலைமுறை தலைமுறையாக ஜீரகசால், கெந்தகசால், மரநெல் உள்ளிட்ட பாரம்பரிய நெல் வகைகளை பயிரிட்டு வருகின்றனர். வனப்பகுதிகளை ஒட்டிய கிராமங்களாக இருப்பதால், யானைகள் உள்ளிட்ட காட்டு விலங்குகளின் தாக்குதலிலிருந்து பயிர்களை பாதுகாப்பதற்காகவும், வன தேவதைக்கு நன்றி செலுத்தும் வகையிலும் இந்த புத்தரி விழா கொண்டாடப்படுகிறது.

பருவமழை தொடங்கியதும், ஐப்பசி மாதத்தில் வயல் தயார் செய்து நாற்று நட்டு, பால் கதிர்கள் வளரும் போது, அந்த கதிர்களை தங்கள் குலதெய்வமான வன தேவதைக்கு படைப்பது வழக்கம்.

இந்த ஆண்டு விழாவில் விரதமிருந்து தேர்ந்தெடுக்கப்பட்ட ஒருவர் வயலில் இறங்கி முதல் பால் கதிர்களை அறுத்து கோயிலுக்குக் கொண்டு வந்தார். பூஜாரிகள் அதனை வரவேற்று, தேவதைக்கு படையல் செய்து பின்னர் பக்தர்களுக்கு பிரசாதமாக வழங்கினர்.

பழங்குடியின மக்களின் பாரம்பரிய உடைகளுடன் நடனமாடிய காட்சிகள் விழாவிற்கு வண்ணம் சேர்த்தன. விழா நிறைவில், கிராம மக்கள் தங்கள் குல தெய்வ கோவில்களில் பூஜை செய்து வயலில் விளைந்த முற்றிய கதிர்களை அர்ப்பணித்தனர்.

இவ்விழாவில் பல்வேறு இன மக்கள் கலந்து கொண்டு, வனமக்கள் கலாச்சாரத்தை அனுபவித்தனர்.