Скачать или смотреть សង្ខេបព័ត៌មានអន្តរជាតិ ប្រចាំថ្ងៃទី៣០ ខែតុលា ឆ្នាំ២០២៥

---
១. ប្រធានាធិបតីចិន លោក ស៊ី ជីនពីង បានជួបចរចាជាមួយសមភាគីអាមេរិក លោក ដូណាល់ ត្រាំ ក្នុងកិច្ចប្រជុំទល់មុខលើកដំបូងរបស់មេដឹកនាំទាំងពីរចាប់តាំងពីលោក ដូណាល់ ត្រាំ វិលត្រឡប់មកកាន់សេតវិមានវិញ ខណៈដែលគូប្រជែងទាំងពីរកំពុងស្វែងរកការបន្ធូរបន្ថយភាពតានតឹងដែលកើនឡើង ជាពិសេសលើបញ្ហាពាណិជ្ជកម្ម។ ក្រោយកិច្ចប្រជុំបិទទ្វារ ១ម៉ោង និង៤០នាទី, លោក ដូណាល់ ត្រាំ បានពណ៌នាអំពីកិច្ចប្រជុំនោះថា «អស្ចារ្យ» និងប្រកបដោយក្តីរាប់អានទៅវិញទៅមក ហើយថាលោកគ្រោងនឹងធ្វើដំណើរទៅកាន់ប្រទេសចិននៅឆ្នាំក្រោយ។ លោកបានថ្លែងថា «យើងបានឯកភាពថា ខ្ញុំនឹងទៅប្រទេសចិន នៅខែមេសា ឆ្នាំ២០២៦» ហើយលោក ស៊ី ជីនពីង ក៏នឹងបំពេញទស្សនកិច្ចនៅ Palm Beach ឬទីក្រុងវ៉ាស៊ីនតោនសហរដ្ឋអាមេរិក ផងដែរ។ ពេលត្រូវបានសួរថា តើពេលណាដែលលោកនឹងមានកិច្ចព្រមព្រៀងពាណិជ្ជកម្មជាមួយរដ្ឋាភិបាលទីក្រុងប៉េកាំង, លោក ដូណាល់ ត្រាំ បានឆ្លើយថា កិច្ចព្រមព្រៀងនេះនឹងត្រូវចុះហត្ថលេខា «ក្នុងពេលឆាប់ៗនេះ» ព្រោះមិនមានឧបសគ្គធំៗច្រើនទៀតនោះទេ។ ក្នុងអំឡុងពេលធ្វើដំណើរហោះទៅកាន់ទីក្រុងវ៉ាស៊ីនតោនវិញ, លោក ដូណាល់ ត្រាំ បានប្រាប់អ្នកយកព័ត៌មានថា «យើងមានកិច្ចព្រមព្រៀងហើយ» ពោលគឺជាកិច្ចព្រមព្រៀង ដែលត្រូវចរចាជារៀងរាល់ឆ្នាំនៅចុងឆ្នាំនីមួយៗ។ ក្រៅពីនេះ លោក ដូណាល់ ត្រាំ ថ្លែងបញ្ជាក់ថា «ពី ០ ដល់ ១០ ដែល ១០ គឺជាពិន្ទុល្អបំផុត ខ្ញុំអាចនិយាយថាកិច្ចប្រជុំនេះបាន ១២ពិន្ទុ»៕
ប្រភព៖ SCMP (https://www.scmp.com/news/china/diplo...)

២. ប្រធានាធិបតីអាមេរិក លោក ដូណាល់ ត្រាំ បានប្រកាសថា លោកបានណែនាំទៅក្រសួងការពារជាតិ ឱ្យចាប់ផ្តើមសាកល្បងអាវុធនុយក្លេអ៊ែររបស់សហរដ្ឋអាមេរិក «ភ្លាមៗ» ដើម្បីឆ្លើយតបទៅនឹងកម្មវិធីសាកល្បងរបស់បណ្តាប្រទេសគូប្រជែង។ សេចក្តីប្រកាសនេះ បានធ្វើឡើងប៉ុន្មាននាទីប៉ុណ្ណោះ មុនពេលលោកជួបជាមួយប្រធានាធិបតីចិន លោក ស៊ី ជីនពីង នៅទឹកដីកូរ៉េខាងត្បូងនាថ្ងៃទី៣០ ខែតុលានេះ។ ផែនការរបស់ប្រធានាធិបតីអាមេរិកនាពេលនេះ នឹងក្លាយជាការផ្លាស់ប្តូរដ៏ធំមួយនៅក្នុងគោលនយោបាយរបស់សហរដ្ឋអាមេរិក។ យោងតាមបណ្ណាល័យសភា សហរដ្ឋអាមេរិក «សហរដ្ឋអាមេរិកបានស្ម័គ្រចិត្តឈប់សាកល្បងគ្រឿងផ្ទុះនុយក្លេអ៊ែរតាំងពីឆ្នាំ១៩៩២ មក»៕
ប្រភព៖ CNN (https://edition.cnn.com/politics/live...)

៣. ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងនាថ្ងៃព្រហស្បតិ៍ ទី៣០ ខែតុលានេះថា លោកបានផ្តល់ការអនុញ្ញាតឱ្យកូរ៉េខាងត្បូងសាងសង់នាវាមុជទឹកដើរដោយថាមពលនុយក្លេអ៊ែរ។ នេះគឺជាការបោះជំហានដ៏គួរឱ្យភ្ញាក់ផ្អើលមួយ ដែលនឹងអនុញ្ញាតឱ្យទីក្រុងសេអ៊ូល ចូលរួមក្នុងក្រុមប្រទេសមួយចំនួនតូច ដែលមាននាវាប្រភេទនេះ។ លោក ដូណាល់ ត្រាំ បានសរសេរនៅលើបណ្តាញសង្គមរបស់លោកថា នាវាមុជទឹកនេះនឹងត្រូវសាងសង់នៅក្នុងទីក្រុង Philadelphia ដែលជាកន្លែងក្រុមហ៊ុនកូរ៉េខាងត្បូងបានបង្កើនការវិនិយោគ។ សូមជម្រាបជូនថា កូរ៉េខាងត្បូង ត្រូវបានហាមឃាត់មិនឱ្យកែច្នៃឡើងវិញនូវឥន្ធនៈនុយក្លេអ៊ែរទេ ប្រសិនបើគ្មានការយល់ព្រមពីសហរដ្ឋអាមេរិក ក្រោមកិច្ចព្រមព្រៀងរវាងប្រទេសទាំងពីរ។ លោក ដូណាល់ ត្រាំ បានសរសេរនៅលើបណ្តាញ Truth Social របស់លោក នាថ្ងៃព្រហស្បតិ៍នេះថា «ខ្ញុំបានផ្តល់ការអនុញ្ញាតឱ្យពួកគេសាងសង់នាវាមុជទឹកដើរដោយថាមពលនុយក្លេអ៊ែរ ជាជាងនាវាមុជទឹកដើរដោយម៉ាស៊ូត (diesel) ដែលមានលក្ខណៈចាស់កំរិល និងមិនសូវរហ័សរហួន ដូចដែលពួកគេមាននាពេលបច្ចុប្បន្ន»៕
ប្រភព៖ CNA (https://www.channelnewsasia.com/east-...)

៤. ពាណិជ្ជកម្មតាមព្រំដែនរបស់ប្រទេសថៃជាមួយកម្ពុជា បានធ្លាក់ចុះ ៩៩.៩% ក្នុងខែកញ្ញា ខណៈដែលការបិទច្រកព្រំដែនរវាងប្រទេសទាំងពីរ បានឈានចូលដល់ខែទីប្រាំ។ នេះបើតាមមន្ត្រីថៃ អះអាកាលពីថ្ងៃពុធ ទី២៩ ខែតុលា។ ទន្ទឹមនឹងនេះ នាយករដ្ឋមន្ត្រីថៃ លោក អនុទីន ឆានវីរគុល បានច្រានចោលពាក្យចចាមអារ៉ាមដែលថា ច្រកព្រំដែននឹងត្រូវបើកឡើងវិញនៅថ្ងៃទី១ ខែវិច្ឆិកា ដោយលោកបានទទូចថា ប្រទេសថៃនឹងមិនធ្វើពាណិជ្ជកម្មឡើងវិញទេ រហូតដល់កម្ពុជាដកអាវុធធុនធ្ងន់, បោសសម្អាតមីន, សហការដោះស្រាយបណ្តាញក្រុមឆបោក និងស្តារទំនាក់ទំនងការទូតឡើងវិញ។ យោងតាមលោកស្រី Arada Fueangthong(អារ៉ាដា ហ្វឿងថង) អគ្គនាយកនៃនាយកដ្ឋានពាណិជ្ជកម្មបរទេស ពាណិជ្ជកម្មសរុប តាមព្រំដែន និងឆ្លងកាត់ព្រំដែន(transit trade) របស់ថៃក្នុងខែកញ្ញាមានចំនួន ១៤១.៧ពាន់លានបាត (៣.៨ពាន់លានដុល្លារ) ដែលបានធ្លាក់ចុះ ៤.៧% ពីធៀបនឹងខែកញ្ញាកាលពីឆ្នាំមុន។ ពាណិជ្ជកម្មជាមួយកម្ពុជាស្ទើរតែដួលរលំ ពោលគឺនៅសល់ត្រឹមតែ ១១លានបាត(៣៤ម៉ឺនដុល្លារ)៕
ប្រភព៖ Khaosod (https://www.khaosodenglish.com/politi...)

Facebook:   / preah.khan.khmer  
Telegram: https://t.me/preah_khan
TikTok:   / preah_khan