بعد اذنكم كلمات : عناد الشيباني أداء : خالد ال بريك

قصيدة مهداه لرجل الأعمال
مشبب بن مشعان بن مانع الشيباني

كلمات : عناد الشيباني
أداء : خالد ال بريك
تصميم : سجى البقمي

بعد اذنكم يا اصاحبي الغالين لا حل الظلام
محتاج عزله لين يصفي جوي اللي ما صفا

بعيد عن بعض السوالف والمشاغل والزحام
البال مبطي ماهدا .. والقلب جرحه مارفا

فـ ارضٍ خلا في جوها سجه وراحه وانسجام
لا احدٍ يلحقي عتب و يقول وش فيه اختفا ..؟

لا اخذت جرعة من نسيم الليل قدام المنام ..!
قام يتماثل جرحي اللي وسط قلبي لـ الشفا

مهوب شرط العزله اسباب القلق والانفصام
اكثر مشاكلنا من اللي شوفهم بذ الخفا

الناس شفهم يربطون الحزن مع نوح الحمام
ويرددونه في قصايدهم ليا طال الجفا

وانا ليا اوحيت الحمام ينوح اردد يا سلام
حتى لو اني من جروح الحب جفني ما غفاا

اهم شي تعيش متصالح وتسعى لـ السلام
ولا تقدا الا بقول الله وقول المصطفى

واللي ماخذ عبره من القريه ومن قتل الغلام
ما تنفعه قصة .. سباق الارنب مع السلحفا

اسوى شعور يعيشه الواحد شعور الانتقام
واطيب شعور يعيشه .. الواحد ليا منه عفا

واقسى شعور يمر .. بالواحد ليا احتاج اهتمام
واجمل شعور يمر بالواحد شعور الاكتفاء

وانا لامني جيت ابا اقف قبل تحقيق المرام
سمعت صوتٍ من بعيد يقول : افا يا عناد افا

تراك من قومٍ مواقفهم مثل حد الحسام
وعزومهم تخلف جبال طويق وجبال الشفا

واليا اعتزيت وقلت ابن مشيب وشديت الحزام
ماهمني تعطيني .. الدنيا وجه والا قفا

حنا فعايلنا نحتناها على صدور الانآم
وشلون ما ننحت فعايلنا على صم الصفا

كبيرنا لا قام صارت .. وقفته قد المقام
واصغيرنا دايم يردد " مرحبا باللي لفاا " ..!

اليا وقفناا ياقف التاريخ حشمه واحترام
واليا جلسنا ياخذ التاريخ مجراه وكفى

بين الدخول وبين حومل كل ماسقنا الجهام
قالت منازلنا " قفا نبكي على الذكرى قفا "

انا اشهد لي عزوةٍ وقت الشدايد ما تضام
سبحان ربٍ .. ما خلق فينا كسالى واضعفا

والناس في حاجة بعضها كل يوم وكل عام
لكن لا ترخص مقامك فالبيان وفـ الخفا

ما يزرع المعروف غير الطيب من بين الكرام
مهوب ماء وجهك ليا منه على الارض انكفى

لا بارو اللي ما مسكهم .. لا وعود ولا كلام
سلم على اللي كلمتة وحده و اذا واعد وفا

اليا ذكرت مشبب اكوع على متن الغمام
معاد اشوف من الفخر غير الخيال اللي ضفى

هذا ولد عمي هذا مسك البدايه والختام
اسمه وفعله .. يستحق المفخره والاحتفا

فعول ابن مشعان فوق صدورنا مثل الوسام
ظلعٍ يذري .. تحت ظله للعرب عد ودفا

يعطي ما ياخذ بس ياخذ .. كل خطوه للامام
ما زل عن درب المراجل من صباه ولا هفى

ياطا على الجمره وكنه .. واطيٍ ريش النعام
يوم انه غيره ما قدر يا طا على شوك السفا

حول على سوق البكار الوضح لين السوق قام
محوال جدانه هل العليا بفعلٍ ما اختفى

شوق الشناح ام القلاده خل شوق ام اللثام
اليا طفح كيل التنافس عندها والا طفى

حاضر بحاضر ما يقول الدفع بعد الاستلام
واليا نشدو عن قيمة الصفقة ماصد ولا نفا

واخوانه اخوان السعد والله ما يلحقهم ملام
من طيبهم شفهم على شداد النواميس اردفا

ما مات من خلف عيالٍ مثل طبعه بالتمام
مشعان ابن مانع ليا هالحين ضوه ما طفى

بيت الكفو لو يندفن راعيه ما جاااه الهدام
وبيت الردي قدام يدفن فوقه السافي سفا