Скачать или смотреть EP09 | ប្រព័ន្ធរបត់ឈាម (Circulatory System)

ប្រព័ន្ធរបត់ឈាមត្រូវបានផ្សំឡើងពីបេះដូង សរសៃឈាម និងឈាម។ ប្រព័ន្ធរបត់ឈាម ដែលត្រូវបានគេស្គាល់ថាជាប្រព័ន្ធសរសៃឈាមបេះដូង ដំណើរការមុខងារសំខាន់ៗមួយចំនួនដូចជា៖
1. ការដឹកជញ្ជូនសារធាតុចិញ្ចឹម និងអុកស៉ីសែន៖ វាបញ្ជូនសារធាតុចិញ្ចឹម និងអុកស៊ីសែនទៅកាន់កោសិកាពាសពេញរាងកាយតាមរយៈឈាម។
2. ការដឹកជញ្ជូនកាកសំណល់៖ វាដឹកនាំកាកសំណល់ដូចជា ឧស្ម័នកាបូនិច ចេញពីកោសិកាមកខាងក្រៅសារពាង្គកាយវិញ។
3. ដឹកជញ្ជូនអរម៉ូនដែលជាសារធាតុគីមីនាំសារ៖ វាដឹកជញ្ជូនអរម៉ូនពីក្រពេញទៅកាន់សរីរាង្គគោលដៅ និងជាលិកា។
4. ការគ្រប់គ្រងសីតុណ្ហភាពក្នុងរាងកាយ៖ វាជួយគ្រប់គ្រងសីតុណ្ហភាពរាងកាយដោយការចែកចាយកំដៅពេញរាងកាយ និងសម្រួលលំហូរឈាមទៅកាន់ស្បែក។
5. ការការពារប្រឆាំងនឹងជំងឺ៖ វាដឹកជញ្ជូនកោសិកាឈាមស និងសារធាតុប្រឆាំងនឹងជំងឺដែលមានសារៈសំខាន់សម្រាប់ការឆ្លើយតបនៃប្រព័ន្ធភាពស៊ាំ។
6. ការរក្សាលំនឹងក្នុងរាងកាយ៖ វាជួយរក្សាលំនឹងដោយគ្រប់គ្រងស្ថានភាពកម្រិត pH និងសមាសធាតុអ៉ីយ៉ុងនៃសារធាតុរាវក្រៅកោសិកា។
ដើម្បីយល់អំពីមុខងារសំខាន់ៗទាំងនេះអោយបានច្បាស់ យើងគប្បីដឹងអំពីលក្ខណៈរបស់ បេះដូង សរសៃឈាម និងឈាម។
✏️បេះដូង
បេះដូងជាសរីរាង្គសាច់ដុំ ប្រហោង ដែលកន្ត្រាក់ពេញមួយជីវិត។ បេះដូងកន្ត្រាក់ប្រហែល ១០០ ០០០ ដងក្នុងមួយថ្ងៃ។ មុខងាររបស់បេះដូងគឺកន្ត្រាក់ដើម្បីបញ្ជូនឈាមទៅកាន់គ្រប់ផ្នែកទាំងអស់នៃសារពាង្គកាយ។ បេះដូងរបស់មនុស្សមាន២ផ្នែកដាច់ពីគ្នា ផ្នែកនីមួយៗមាន២ថត ហើយថតនីមួយៗភ្ជាប់ទៅនឹងសរសៃឈាមដែលមានទិសដៅខុសៗគ្នា។ 
✏️សរសៃឈាម
សរសៃឈាមត្រូវបានចែកជា៣ប្រភេទធំៗ។ ការចែកនេះដោយសារទំរង់នឹងមុខងាររបស់វាមានលក្ខណៈប្លែកគ្នា។ សរសៃឈាមទាំង៣ប្រភេទមាន៖
សរសៃអាកទែ: អាកទែជាសរសៃដែលដឹកនាំឈាមចេញពីបេះដូង។ ដោយសារតែការកន្ត្រាក់នៃបេះដូងបង្កើតបានជាសម្ពាធខ្លាំង ភ្នាសសរសៃអាកទែមានលក្ខណៈក្រាស់និងយឺត (elastic)។ អាកទែគ្មានប្រឹសឡើយ។ ឈាមរត់កាត់អាកទែដោយសម្ពាធជំរុញពីការកន្ត្រាក់របស់បេះដូង។
សរសៃវ៉ែន: វ៉ែនជាសរសៃដែលប្រមូលឈាមពីសារពាង្គកាយទៅបេះដូង។ វាមានទិសដៅបញ្ជ្រាស់ពីទិសដៅរបស់អាកទែ។ សរសៃវ៉ែនមានប្រហោងធំជាងនិងភ្នាសស្តើងជាងសរសៃអាកទែ។ សរសៃវ៉ែនមានប្រឹស ដែលមានប្រយោជន៍ខ្លាំងណាស់ពីព្រោះឈាមដែលរត់តាមវ៉ែន មកកាន់បេះដូងគ្មានកំលាំងជំរុញដូចអាកទែឡើយ ហើយត្រូវប្រឆាំងទំនាញផែនដីផង (ករណីវ៉ែនដែលចេញពីផ្នែកខាងក្រោមបេះដូង)។ ប្រឹសអាចជួយទប់ឈាមកុំអោយហូរត្រឡាប់ថយក្រោយ។
សរសៃប្តូរ: សរសៃប្តូរជាសរសៃតូចឆ្មារៗដែលភ្ជាប់រវាងអាកទែនិងវ៉ែន។ សរសៃប្តូរជាសរសៃដែលព័ទ្ធជុំវិញជាលិកាដើម្បីស្រោចស្រពជាលិកាដោយអុកសុីសែននិងសារធាតុចិញ្ចឹមព្រមទាំងទទួលយកកាកសំណល់ដូចជាឧស្ម័នកាបូនិចនិងកាកសំណល់មេតាបូលីសដូចជាទឹកអ៊ុយរ៉េ មកក្នុងឈាម។ ដោយសារការកើតឡើងនៃបណ្តូររវាងសារធាតុចិញ្ចឹមនិងកាកសំណល់នេះហើយទើបគេដាក់ឈ្មោះវាថាសរសៃប្តូរ។
✏️ឈាម
ឈាមជាធាតុរាវដែលផ្សំឡើងពីទឹក សមាធាតុគីមី និងកោសិកា។ ការដែលយើងចាំពីអំពីធាតុផ្សំរបស់ឈាមនឹងជួយអោយយើងយល់និងចាំបានយូរអំពីមុខងាររបស់ឈាមចំពោះសារពាង្គកាយ។ 
«ដើម្បីប្រជាជនកម្ពុជាទាំងអស់មានសុខភាពល្អ»
#ប្រព័ន្ធរបត់ឈាម
#សរីរាង្គ
#សុខភាព
#គួរដឹងពីសុខភាព
#វេជ្ជបណ្ឌិតម្លិះរដ្ឋា
#បន្ទប់ពិគ្រោះនិងព្យាបាលជំងឺម្លិះ
———————————————
ប្រព័ន្ធផ្សព្វផ្សាយ និងទំនាក់ទំនង៖
Telephone/Telegram: 092​​ 654 778
Facebook:   / mlis.cabinet.homecare  
YouTube:    / @mlis.cabinet.homecare  
TikTok: https://www.tiktok.com/@dr.mlisratha?...
Location: https://maps.app.goo.gl/8Gg1AEkjmq9De...
🏥 ទីតាំង: ផ្ទះលេខ23​ ផ្លូវ​ 287 សង្កាត់បឹងកក់១ ខណ្ឌទួលគោក ក្រុងភ្នំពេញ