حبل الصبر ¦¦ ملا عباس الكعبي

◾️قصيدة: حبل الصبر
◾️الوزن: تجليبه

#الامام_المهدي_عج
………….



اريد انشد من الغايب وَ ٱهِل عَبره
واگلّه اشصبّرك ياضنوة الزهره
ـــــــــــــــــــــــــــــــــــــــــــــــــــــــ
صبرك ندري يالغايب فلا محدود
حبل من الوصي الكرار الك ممدود
ولو من هضمو امك ما چنت موجود
◾️من كسرو ضلعهه وظلّت ابحسره
ـــــــــــــــــــــــــــــــــــــــــــــــــــــــ
لاچن بالزياره الوارده عنّك
تندب جدّك اعليه يرتفع ونّك
تنوح وتنعه واجروحه يلچمنّك
◾️تگلّه اعليك نار ابگلبي متوجره
ـــــــــــــــــــــــــــــــــــــــــــــــــــــــ
متوجره عله امصابك يبو الأكبر
وحيد ابيوم عاشر والگلب يسعر
ومن صابك سهمهم چبدتك وذّر
◾️هَد حيلك يَجدّي وطِحِت عالغبره
ـــــــــــــــــــــــــــــــــــــــــــــــــــــــ
أبچي المنحرك والراسك المرفوع
لو أبچي اعله ذاك الإصبع المگطوع
لو ابچي وأهل ادموم ويّه ادموع
◾️عله الميمون حين اتلگته الحرّه
ـــــــــــــــــــــــــــــــــــــــــــــــــــــــ
عنّك تنشِده واتگله حاچيني
حال الموت گلهه ابّينه وبيني
صاحت بالله ياسكنه دعينيني
◾️للمظلوم خلّي انروح وانحضره
ـــــــــــــــــــــــــــــــــــــــــــــــــــــــ
حضرن يم ابوالسجاد بين الگوم
وحده واگفه وجسمك عليه اتحوم
تظلل من لهيب الشمس ياجيدوم
◾️او وحده المنحرك ترويه بالعبره
ـــــــــــــــــــــــــــــــــــــــــــــــــــــــ
او وحده اتصيح بويه اوياك اريد اوياك
او وحده اتصيح اريد اتخضّب امن ادماك
او وحده اتصيح اريد انصب عزه وأنعاك
◾️وعليك انحب قبل لا اروح متيسره
ـــــــــــــــــــــــــــــــــــــــــــــــــــــــ
عليك اننوح يالنايم عله التربان
فزعنالك يبوالسجاد بس نسوان
وصاحن صوت واويلي عله العطشان
◾️ياللي ماضگت قبل الذبح گطره

ـــــــــــــــــــــــــــــــــــــــــــــــــــــــ
✍🏻بقلم #احمد_الكعبي_الكربلائي
📍 كربلاء المقدسة

🌐https://t.me/ahmedAlkarbalai0