Ыһыах (Дьэ, дьиэрэй, чуордук дуорай)

Ыһыах. Октябрина Колесова тыллара, Виктор Никаноров мелодията.

*****
Никаноров Виктор Иванович (1934, Мэҥэ Хаҥалас улууһа, 2-с Наахара нэһилиэгэ - 2004) - биллиилээх ырыа айааччы.
Ырыалара: «Ыһыах» (О. Колесова тыл.), «Түһүлгэҕэ эн таскар» (Уйбаан Нуолур тыл.), «Төрөөбүт дойдум Төҥүлү» (С. Сивцев - Доллу тыл.) о. д. а.

*****
Уйгулаах сайыммыт ыһыаҕын
Тойуксут ырыата аспыта,
Туус маҥан атынан хаамтаран
Уол кыыстыын сэргэҕэ кэлбитэ.
Дьэ, дьиэрэй, чуордук дуорай,
Оһуо-оһуокай, эһиэ-эһиэкэй!

Бу манна чороону көтөҕөн
Кырдьаҕас уруйдуу тоһуйда,
Үс сэргэ аттыгар көрсүһэн
Көлүөнэм илиитин тутуста.
Дьэ, дьиэрэй, чуордук дуорай,
Оһуо-оһуокай, эһиэ-эһиэкэй!

Кырдьаҕас алгыһын ытыктаан
Ыччатым көхтөөхтүк чуоҕуста,
Түһүлгэ оонньуута тэнийдэ,
Кылыыһыт, сүүрүүк да үксээтэ.
Дьэ, дьиэрэй, чуордук дуорай,
Оһуо-оһуокай, эһиэ-эһиэкэй!

Көр-күлүү үллэҥниир кэмигэр
Уол кыыска сибэкки туттарар,
Таптыырын күн бүгүн этиэҕин
Эдэркээн сүрэҕэ долгуйар.
Дьэ, дьиэрэй, чуордук дуорай,
Оһуо-оһуокай, эһиэ-эһиэкэй!

*****
Хаартыскалар - онтон-мантан. Махтал!!!