Скачать или смотреть 07.001 திருவெண்ணெய்நல்லூர் | பித்தா பிறைசூடீ பெருமானே | சுந்தரர் தேவாரம் |

07.001 திருவெண்ணெய்நல்லூர் | பித்தா பிறைசூடீ பெருமானே | சுந்தரர் தேவாரம்

#SriKripapureeswararTemple | #Thiruvennainallur | #SundaramurthyThevaram

இறைவன் சிவபெருமான் சுந்தரரை தடுத்தாட்கொண்ட சிறப்புடையது இத்தலம். இறைவன் முதிய வேதியராய் வந்து வழக்குரைத்து சுந்தரர் தனக்கு அடிமை என்று நிரூபித்து தன்னுடன் அழைத்துச் சென்று அவரை ஆட்கொண்டார். இறைவன் அடியெடுத்துத் தர சுந்தரர் "பித்தா பிறைசூடி" என்ற திருப்பதிகத்தை அருளிய தலம். தலத்தின் பெயர் திருவெண்ணெய்நல்லூர் என்றும் கோவிலின் பெயர் அருட்டுறை என்றும் பதிகத்தில் குறிப்பிடப் பெறுகிறது. அருணகிரிநாதர் இத்தலத்தில் முருகப் பெருமான் மயில் மீது நடனம் புரிதலைக் கண் குளிரக் கண்டு திருப்புகழ் ஒன்றும் பாடியுள்ளார்.

இறைவர் திருப்பெயர் : ஸ்ரீ கிருபாபுரீசுவரர், ஸ்ரீ அருட்டுறை நாதர்

இறைவியார் திருப்பெயர் : ஸ்ரீ மங்களாம்பிகை, ஸ்ரீ வேற்கண்ணிநாயகி

திருமுறை : ஏழாம் திருமுறை 001 வது திருப்பதிகம்

அருளிச்செய்தவர் : சுந்தரமூர்த்தி சுவாமிகள்

பதிக குரலிசை : திரு சிவ மகேஸ்வர ஓதுவார்

இத்திருப்பதிகம், சிவபிரானை நோக்கி "அடியேன் உனக்கு முன்பே ஆளாகி இப்பொழுது நீ வந்து என்னை உனக்கு அடியான் என்று சொல்லியபொழுது அடியவன் அல்லேன்" என எதிர் வழக்குப் பேசியது தகுமோ என இரங்கி அருளிச்செய்தது.

பித்தா பிறைசூடீ பெருமானே அருளாளா
எத்தால் மறவாதே நினைக்கின்றேன் மனத்து உன்னை
வைத்தாய் பெண்ணைத் தென்பால் வெண்ணெய் நல்லூர்
அருள் துறையுள் அத்தா உனக்காளாய் இனி அல்லேன் எனலாமே. (01)

பொருளுரை : பித்தனே, பிறையைக் கண்ணியாகச் சூடியவனே, பெருமை உடையவனே, பெண்ணையாற்றின் தென்பால் உள்ள திருவெண்ணெய்நல்லூரின் கண்ணதாகிய "அருட்டுறை" என்னும் திருக்கோயிலின்கண் எழுந்தருளியிருக்கும் தலைவனே, எனது நெஞ்சத்துள் உன்னை அகலாது வைத்தருளினாய்; அதனால், எவ்வாற்றானும் உன்னை மறவாமலே நினைந்து, முன்பே உனக்கு அடியவனாகி, இப்பொழுது "உனக்கு அடியவன் அல்லேன்" என எதிர்வழக்குப் பேசியது பொருந்துமோ!

காரூர் புனல் எய்திக் கரை கல்லித் திரைக் கையால்
பாரூர் புகழ் எய்தி திகழ் பன்மாமணி உந்தி
சீரூர் பெண்ணைத் தென்பால் வெண்ணெய் நல்லூர்
அருள் துறையுள் ஆரூரன் எம்பெருமாற்காள் அல்லேன் எனலாமே. (10)

பொருளுரை : மேகத்தினின்றும் ஒழுகும் தன்மையை உடைய நீர் திரண்டு பொருந்தி, அலைகளாகிய கைகளால் கரையைக் குத்தி, நிலம் முழுதும் பரவிய புகழைப்பெற்று, ஒளி விளங்குகின்ற பல சிறந்த மணிகளைத் தள்ளிவந்து, அழகு மிகுகின்ற பெண்ணையாற்றின் தென்பால் உள்ள திருவெண்ணெய்நல்லூரில் உள்ள அருட்டுறைத் திருக்கோயிலில் எழுந்தருளியிருக்கும் எம்பெருமானுக்கு, ஆரூரன் "அடியவனல்லேன்" என எதிர்வழக்குப் பேசியது பொருந்துமோ.

ஆலய முகவரி : அருள்மிகு கிருபாபுரீஸ்வரர் திருக்கோவில், திருவெண்ணைநல்லூர் அஞ்சல், திருக்கோயிலூர் வட்டம், விழுப்புரம் மாவட்டம், PIN - 607 203.

எப்படிப் போவது : மற்றொரு பாடல் பெற்ற சிவஸ்தலமான திருக்கோவிலூரில் இருந்து தென்கிழக்கே சுமார் 20 கி.மி. தொலைவிலும், விழுப்புரத்திலிருந்து 22 கி.மீ. தொலைவிலும் பெண்ணையாற்றின் தென்கரையில் திருவெண்ணைநல்லூர் தலம் அமைந்துள்ளது. திருக்கோவிலூரில் இருந்து அரசூர் செல்லும் சாலையில் சென்று இத்தலத்தை அடையலாம். விழுப்புரம், உளுந்தூர்பேட்டை மற்றும் திருக்கோவிலூரில் இருந்து இங்கு வர நேரடிப் பேருந்துகள் உள்ளன.

குறிப்பு : இப்பதிகத்திற்கான சொற்பிரிவு எங்களது முயற்சியில் உருவாக்கப்பட்டுள்ளது. பிழை இருப்பின் எங்களுக்கு தெரியப்படுத்தலாம்.

"மேன்மைகொள் சைவநீதி விளங்குக உலகம் எல்லாம்"