امریکی طیارے کے قریب سے روسی لڑاکا طیارے کی 'غیر محفوظ' پرواز

امریکی فوج نے پیر کو ایک ویڈیو جاری کی ہے جس میں الاسکا کے قریب ایک روسی لڑاکا طیارہ امریکی طیارے کے بہت قریب سے گزرتے ہوئے دیکھا جا رہا ہے۔

امریکی فوج کے مطابق یہ ویڈیو گزشتہ ہفتے کی ہے جب روسی طیارے کو روکنے کی کوشش کے دوران وہ غیر محفوظ طریقے سے طیارے کے قریب سے گزرا۔

حکام کے مطابق امریکہ اور روس کے لڑاکا طیاروں کا الاسکا کے قریب انٹرنیشنل ایئراسپیس میں اکثر آمنا سامنا ہوتا ہے اور ہر بار پیشہ ورانہ طریقہ اپنایا جاتا ہے لیکن اس بار روسی طیارے نے غیر محفوظ طریقے سے پرواز کی۔

شمالی امریکہ میں امریکی افواج کی نگرانی کرنے والے فضائیہ کے جنرل گریگوری گیولٹ نے ایک بیان میں کہا ہے کہ روسی طیارے ایس یو-35 کا طرزِ عمل غیر پیشہ ورانہ اور سب کو خطرے میں ڈالنے والا تھا۔ یہ عمل ایسا نہیں تھا جو آپ کسی پیشہ ور فضائیہ میں دیکھیں۔

واشنگٹن میں روسی سفارت خانے نے اس معاملے پر فوری تبصرے سے انکار کیا ہے۔