ลายลำบูชาหลวงพ่อพระลับ (พระศรีสตนาคนหุต)

ลายลำ : บูชาหลวงพ่อพระลับ (พระศรีสตนาคนหุต)
ประพันธ์กลอนลำ : พระมหาอธิวัฒน์ ภทฺรกวี
*ขับเชียงขวาง แปลงจาก บัวฮมฮับน้อง : อัครวิทย์ ทองใบ
เรียบเรียง : ภูมิศักดิ์เสรี สาสีดา (คีตะ อีสาน)
ขับร้องกลอนลำ : อ็อฟ สุรพล ทองด้วง
กราฟฟิก : สุทธิพงษ์ อุพลเถียร
ประสานงาน : พระนัฐพงศ์ ขนฺติสมฺปนฺโน
อำนวยการผลิต : พระโสภณพัฒนบัณฑิต รศ.ดร.

เนื้อร้องกลอนลำ

(ลำพื้น เกริ่น)
สาธุเด้อ....องค์พระลับล้ำ คู่นครขอนแก่น
บวรแวนวัดธาตุท้น คนขาบไหว้หลั่งโฮม
พรพระสมมาตมุ่ง โดยดั่งปรารถนา
จั่งบูชาชุลีกร อ่อนเศียรกราบก้ม
อัญขยมบรมเบื้อง เพียเมืองแพนพื้นแผ่น
จากแดนเวียงจันทน์กว้าง เชิญเข้าบึงบอน
กาลก่อนกี้ เกรงต่อนครหลวง
หวงเสี่ยงองค์พระลับ นับมาแต่เดิมเค้า
เฮาจั่งพากันเอิ้น ออกแต่นามหลวงพ่อ
บ่มีไผพบพ้อ องค์แท้เที่ยงจริง
อิงหลักออกเอ่ยอ้าง ทางฤทธิ์อัศจรรย์
บันดาลชาวนคร อยู่เกษมสำราญล้น.....

(ลำพื้น ลำเดินกลอน)
เอาเด้อสาธุชนแซวซ้อง แซวซ้ององค์จำลองหลวงพ่อ
เอาล่ะน้อฮ่านี้ บารมีซูค้ำพร่ำเมือง
เฮืองเฮืองฮ้วย เฮืองฮ้วย อ่วยล่วยงามสม
ฝูงข้านบบังคม ฮ่มพระศรีล้านช้าง
พ่างพ่างเหลื่อมลำล้วย ลำล้วย ฮวยหอมแหนแห่
แลพระลับหลังช้าง สีข้างแอ่นหลัง
วัดธาตุเนาอยู่ยั้ง คู่ฝั่งเมืองขอน
พระยาศรีนครบริรักษ์วอนออนซอนไท้
เทพอยู่ในหนห้อง หนห้อง วิมานทองเทียวท่อง
สลองทิพย์ดอกไม้ แคนไค้ดุริยางค์
โสมสอางนางฟ้า อัจฉรางามหลาย
บายเอาบุบผาหอม ฮ่อมฮำรำฟ้อน
สะออนวัดธาตุคุ้ม คนหุ้มหลายหลั่ง
บุญอั่งสะพรั่งพร้อม คนน้อมหน่วยมโน
ขบวนรำประกาศโก้ ฮ้องโฮแส่วแซวเสียง
เผลียงฤทธิ์บารมี บูชาศรีพระลับเจ้า

(ขับเชียงขวาง*)
โอนอ พอเมื่อเจ้าแห่แหน เขาก็แพนลีลา
ทอดถวยเทียนบุญบา สาธุการว่าเชิญเยอ
ตกแต่งเต้าข่วงเพียง แถวเฮียงเลียนซะล้าย
ทั้งหญิงชายน้อยหนุ่ม ซุมอยู่ไกลกลับนคร
ต่างรำฟ้อนนบนิ้ว เบิ่งแล้วก็งามตา...
โอนอ ว่ามาเยอข้าสิไหว้ พระคู่เมืองแก่นนคร
ไหว้ขอพรเอิ้นขวัญ ข้าอยู่ดงพงพนา
มาเยอมา ฮีบมา ขวัญบามาเฮียงคู่
คืนมาอยู่เนาห้อง โฮงทองว่าเนาซ้อน
คืนมาเนาอิงหมอน ฮ่วมเฮียงอยู่เคียงกาย...
โอนอ มาเยอขวัญมือพร้อม ขวัญตีนพาต่าวแล่น
ทังขวัญขาขวัญแขน ขวัญคางและขวัญไหล่
ขวัญข้าไปทางได๋ ขวัญใจให้คืนมา
ทังขวัญตา ขวัญคิ้ว ขวัญคีงให้อยู่ดี
ขวัญเกศีเกษเกล้า ขวัญเค้าให้คืนมา
โอนอ ขอข้าจงอยู่ดี อย่าสุมีโรคาต้อง
ให้ข้าใสฮองฮอง หายฮ้อนอยู่สบาย
อยู่ถวายทวยแคว้น แก่นขอนนครใหญ่
สิทธิไซ ซะโยน้อม ผู้ข้าล้อมลีลา
ถวยเทียนทองวันทา ยอหัตถาประนมนิ้ว
โอนอ คื่นคื่นก้อง เสียงกลองดังม่วนมี่
เสียงดนตรีพาทย์พิณ ม่วนยินว่าคับค่าย
คนทั้งหลายฮ่ายฮ้อง แอ่นสะหลองน่วยนินาย
แอะแอ่นย้ายลีลา แซวแซวซ่าสะนั่น
ก็พากัน ฟ้อนแอ่น แกว่งแพนกันพร้อมเพรียง
ฟ้อนฮ่วมเฮียงลวดลาย ยัวระยายลงลีลา...
โอนอ โยติกาบทไหว้ องค์พระลับบอระบวน
พอสมมาพาควร สิลาลงแต่ท่อนี้
ขออยู่ดีเด้อท่าน ยามจากกันสิขอลา
ให้ยืนหมั่นพันวัสสา พระลับฤทธิ์ประสิทธิ์พร
อยู่สบายหายฮ้อน ซื่นจิตใจบ่ม้างม่าย
ท่านทั้งหลายถ้วนหน้า โมทนานำกันเดอ โมทนานำกันเดอ....