លោក ង៉ែត ជូ | រៀន​តាម​ចិន ដើម្បី​ធូរធារ​ដូច​ចិន​ | ហរិញ្ញវត្ថុ | Finance

រៀន​តាម​ចិន ដើម្បី​ធូរធារ​ដូច​ចិន​?
=====
​ភ្នំពេញ​៖ អ្នកជំនាញ​ផ្នែក​ហិរញ្ញវត្ថុ លោក ង៉ែត ជូ បាន​ឲ្យ​ដឹងថា វប្បធម៌​ចាត់ចែង​ថវិកា​របស់​ជនជាតិ​ចិន មាន​ចំណុច​ល្អ​មួយចំនួន ដែល​ពលរដ្ឋ​ខ្មែរ​អាច​រៀនសូត្រ​តាម ដើម្បី​ភាពល្អប្រសើរ​លើ​រឿង​លុយកាក់​ក្នុង​ជីវភាព​រស់នៅ​។ ក្រៅពី​រឿង​ចាត់ចែង​ថវិកា ជនជាតិ​ចិន​មាន​ចំណុច​ល្អ​លើ​ភាព​អំណត់ ខ្នះខ្នែង​ក្នុង​ការងារ និង​អាជីវកម្ម​។


​លោក ង៉ែត ជូ មានប្រសាសន៍ថា ទម្លាប់​គ្រប់គ្រង​ថវិកា​របស់​ចិន បាន​ចាក់​ឫ​យ៉ាងជ្រៅ​ក្នុងសង្គម​ចិន ហើយ​ជាពិសេស​ជនជាតិ​ចិន មាន​ផ្នត់គំនិត​រកស៊ី ដូច្នេះ​ពួកគេ​ត្រូវតែ​បង្ខំចិត្ត​សន្សំសំចៃ​ទុន​ដើម្បី​បើក ឬ​ពង្រីក​អាជីវកម្ម​។

​ផ្ទុយ​ពី​ជនជាតិ​ចិន ពលរដ្ឋ​ខ្មែរ​ដែល​មិនមាន​ផ្នត់គំនិត​រកស៊ី​ពី​សម័យមុន​មក ពុំ​សូវ​គិតគូរ​លើ​ការ​សន្សំ​នេះឡើយ​។ បើ​សន្សំ ខ្មែរ​ច្រើន​បម្រុង​ទុក​សម្រាប់​ការ​ដោះ​ទាល់​ប៉ុណ្ណោះ គឺ​មិនមែន​សម្រាប់​ពង្រីក​មុខ​របរ​នោះទេ​។ តែ​លោក ជូ ប្រាប់ថា សម័យ​បច្ចុប្បន្ន​ការ​សន្សំសំចៃ និង​គំនិត​អាជីវ​កម្មនេះ បានកើត​ក្នុងសង្គម​ខ្មែរ​ជា​បណ្ដើរៗ​។​

​អ្នកជំនាញ​ផ្នែក​ហិរញ្ញវត្ថុ​រូបនេះ បាន​ទទួលស្គាល់ថា មានការ​ចាយវាយ​មិនបាន​ត្រឹមត្រូវ​របស់​ពលរដ្ឋ​ខ្មែរ​មួយចំនួន ពិសេស​ក្នុង​រង្វង់​កម្មករ និង​ពលរដ្ឋ​ក្រីក្រ ដែល​ហ៊ាន​ចាយ​លើស​ចំណូល​របស់ខ្លួន​។ លោក​ជំរុញ​ឲ្យ​មានការ​សន្សំសំចៃ ដើម្បី​បញ្ចៀស​បញ្ហា​ជីវភាព​លំបាកលំបិន​ទៅ​ពេល​ក្រោយ​។

​ក្រៅពី​ការចាយវាយ ខ្មែរ​ក៏​អាច​រៀនសូត្រ​ពី​ចិន ចំពោះ​ភាព​ខ្នះ​ខ្នាយ​នឹង​ការងារ និង​អាជីវកម្ម​ផងដែរ​។ បើក​អាជីវកម្ម​ឲ្យ​ប្រាកដ គ្រប់គ្រង​ឲ្យ​ដឹក​ដល់ ដើម្បី​បញ្ចៀស​ការខាតបង់​។ លោក ង៉ែត ជូ ថ្លែង​បែបនេះ​។​

​យ៉ាងណាមិញ កង្វះខាត​ចំណេះដឹង​មូលដ្ឋាន​ផ្នែក​ហិរញ្ញវត្ថុ​របស់​ពលរដ្ឋ​កម្ពុជា ត្រូវបាន​លោក ង៉ែត ជូ ជំរុញ​ជា​រើ​យៗ​ទៅដល់​រដ្ឋាភិបាល ឲ្យ​បណ្ដុះបណ្ដាល​ដល់​ពលរដ្ឋ​៕
--------------------------------------------------------------------
ThmeyThmey News Social Media:

https://thmeythmey.com/
  / thmeythmey  
  / thmeythmeyvideonews  
  / thmeythmeynews  
  / thmeythmey