Скачать или смотреть 林家謙用輕鬆心情面對頒獎禮｜樂迷望《有一種傳說》面世 家謙：首歌屬於姜濤嘅｜田木集作

林家謙用輕鬆心情面對頒獎禮｜樂迷望《有一種傳說》面世 家謙：首歌屬於姜濤嘅｜田木集作

林家謙噚晚出席「新城勁爆頒獎禮」後，今日下午現身Now TV舉辦嘅「STEM獎勵計劃」頒獎典禮，仲即場演唱《神奇的糊塗魔藥》。

家謙受訪問時被問到，以前可有參加過相關比賽？佢話細個嘅比賽較單一，「有參加過畫畫呀，歌唱比賽嗰啲，冇乜贏。我覺得比賽可以幫到大家進步嘅，大家唔使睇得個比賽太重。」佢仲話自己歌唱比賽都冇乜參加，到後期摸到自己唱歌，後期就有啲成績。佢仲話自己通常都係同啲同學一齊報：「佢報開合唱，我哋就報埋獨唱，買兩Q睇吓中邊Q咁囉。」

家謙仲識講吓笑，而且睇落去都幾精神，佢話自己噚晚瞓得幾好，問到係咪頒獎禮完咗所以鬆一口氣？佢話：「係囉，因為而家自己頒獎禮都輕鬆心情面對，唔會話好緊張，未必會大起大落。」提起噚晚鍾雨璇喺台上暈倒，佢都話：「嗰度我呆咗一下，大家見我木獨咗，因為我唔知發生咩事，又唔敢埋去騷擾佢哋，我扶咗佢一下已經唔敢再掂，最好都交返畀專業人士處理。」

早前出新專輯，家謙亦透露慢慢出貨中，但何時會搞簽名會？家謙話仲未搞到，「因為而家都未出晒貨，我到出晒貨，大家有碟喺手先啦，唔想有啲人冇，但我又搞咗，啲人嚟到兩手空空咁有啲尷尬，所以而家當務之急出晒啲貨先。廠嗰邊都休息咗幾日，今日開始復工㗎喇，希望一月中前出到晒，我覺得過完年就可以成事。」

提到有樂迷想聽返家謙同姜濤合作嘅《有一種傳說》，佢解釋：「隻歌唔係我主導嘅，隻歌係屬於阿姜嘅，我只係做創作嘅部份，我估未必喇，因為已經過咗去，嗰個當係一個拉闊限定嘅彩蛋。」

====================
更多《田木集作》嘅片，可以喺呢度睇到👇🏻👇🏻👇🏻

🛎️ YT：   / 田木集作  
🏃🏻 IG ：  / touchwoodtv  
❤️ FB：  / touchwoodtv  
====================
#林家謙 #神奇的糊塗魔藥 #SEVEN #有一種傳說 #姜濤 #NowTV #STEM獎勵計劃
#田木集作 #田木 #touchwoodTV