Скачать или смотреть တနင်္သာရီတွင် စစ်ကောင်စီ တိုက်လေယာဉ်ကို ပူးပေါင်းတပ် ပစ်ခတ် | People's Spring

တနင်္သာရီတွင် စစ်ကောင်စီ တိုက်လေယာဉ်ကို ပူးပေါင်းတပ် ပစ်ခတ်၊ ထိခိုက်မှုရှိဟု KNU ထုတ်ပြန်

စက်တင်ဘာ ၁၃၊ ၂၀၂၅။ ထားမြတ်/People’s Spring

ကရင်အမျိုးသားအစည်းအရုံး(KNU) မြိတ်ထားဝယ်ခရိုင်၊ တနင်္သာရီမြို့နယ် မောတောင်နယ်စပ်ကုန်သွယ်ရေးလမ်းရှိ သိန်းခွန်း‌ကျေးရွာအနီးတွင် စစ်ကောင်စီ၏ တိုက်လေယာဉ်ကို ယမန်နေ့ စက်တင်ဘာ ၁၂ရက်က ပစ်ခတ်ခဲ့ရာ ထိခိုက်မှု ရှိခဲ့ကြောင်း KNU မြိတ်-ထားဝယ်ခရိုင်က သတင်းထုတ်ပြန်သည်။

အာဏာသိမ်းစစ်တပ်၏ Jet Fighterလေယာဉ် ဗုံးလာကြဲချိန် ကရင်အမျိုးသားလွတ်မြောက်ရေးတပ်မတော် တပ်မဟာ(၄) လက်အောက်ခံ တပ်ရင်း(၁၁)နှင့် တော်လှန်ရေးပူး‌ပေါင်းတပ်များးက ပစ်ခတ်ခဲ့‌ခြင်းဖြစ်ပြီး ဂျက်ဖိုက်တာလေယာဉ်ထိခိုက်မှုရှိခဲ့၍ မြိတ်မြို့ဘက်သိုပြန်လှည့်ခဲ့ဟု ဖော်ပြသည်။

“ ကျနော်တို့ တပ်မဟာ(၄)မှာ အာဏာသိမ်းအကြမ်းဖက်တပ်ရဲ့ လေယာဉ်ကို ပထမအကြိမ်ပစ်ခတ်တယ်လို့ပြောလို့ရတယ်။ သူတို့ သုံးတာ ဂျက်ဖိုက်တာအမျိုးအစားဖြစ်တယ်၊ကျနော်တို့ သတင်းရရှိတဲ့အပေါ်မှာ သူတို့ မြိတ်မြို့ ပြန်ဆင်းတဲ့အချိန်မှာ လေယာဉ်က မီးခိုးထွက်တယ်။ မီးခိုးထွက်ပြီးတော့ မြိတ်မြို့က နယ်မြေခံတွေ တွေ့ရှိချက်ကတော့ တောင်ပံအထက်လား မီးခိုးတွေတအားထွက်တယ်။ ခန့်မှန်းချက်အရတော့ လေယာဉ်ရဲ့ တောင်ပံတဖက်ထိခိုက်တာလို့တော့ သိတယ်” ဟု KNLA သတင်းရင်းမြစ်က ပြောသည်။

စစ်ကောင်စီသည် မြန်မာ-ထိုင်းနယ်စပ် မောတောင်လမ်းပိုင်း ထိန်းချုပ်နိုင်ရေး ၂၀၂၄ ဒီဇင်ဘာကတည်းက ထိုးစစ်ဆင်လာရာ သိန်ခွန်းကျေးရွာအနီးဝန်းကျင်၌ တိုက်ပွဲများ ပြင်းထန်ခဲ့ပြီးရှေ့မတိုးနိုင်သည့် အခြေအနေတွင် လေကြောင်း တိုက်ခိုက်မှုများ မကြာခဏ လုပ်ဆောင်နေခြင်းဖြစ်သည်။

“စစ်ကြောင်းဝင်ထိုးနိုင်ဖို့ လေယာဉ်ကို အသုံးပြုတယ်။ ပြီးတော့ သူတို့ ဒရုန်းအသုံးပြုတယ်။ အဓိကတော့ နယ်စပ်ကို ပြန်ထိန်းချုပ်နိုင်ဖို့ တအားသုံးလာတာပေါ့။” ဟု KNLA သတင်းရင်းမြစ်က ပြောကြားပြီး တော်လှန်ရေးပူးပေါင်းတပ်က စစ်ကောင်စီ မထိုးဖောက်နိုင်ရေးခုခံလျက်ရှိဟု အသိပေးသည်။

ပြည်သူ့ခုခံတွန်းလှန်စစ်ကာလအတွင်း စစ်အုပ်စု ၏ ပျက်စီး/ပစ်ချခံခဲ့ရသော စစ်လေယာဉ်(၁၀) စီး နှင့် ရဟတ်ယာဉ် (၁၀)စီးရှိဟု အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနကထုတ်ပြန်သော ပြည်သူ့ခုခံတွန်းလှန်စစ် (၄) နှစ်ပြည့်အစီရင်ခံစာတွင် ဖော်ပြထားသည်။

#ludunwayoo #လူထုနွေဦး #NewsUpdate

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 -    / @peoplespring  
𝗙𝗮𝗰𝗲𝗯𝗼𝗼𝗸 -   / ludunwayoo  
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 -   / ludunwayoo  
𝗧𝗲𝗹𝗲𝗴𝗿𝗮𝗺 - https://t.me/peoplespring