呂爵安最想拍藍球打機廣告 未出糧唔學姜濤買豪宅 讚Ansonlo拍劇好捱得

MIRROR成員呂爵安（Edan）為手機錢包拍攝新一輯廣告，表示今次廣告中有多個造型，雖然跟該品牌第三年合作，但未知可有加人工。談到近年頻頻拍廣告，是否豬籠入水？Edan就賣口乖指多謝廣告客戶，雖然賺到少少，但不算好多，希望將來可接拍關於藍球及打機的廣告。雖則賺到錢，Edan笑謂未有計劃再請家人去歐遊，皆因工作忙又未出糧。講到會否效法隊友姜濤買豪宅，他坦言暫時未必，反而想跟家人搬到較大的單位居住。他說：「姜濤層樓幾貴！我暫時都唔會諗自己搬出去住，Anson Lo同屋企人住同一棟樓不同單位，我都有問阿媽好唔好，阿媽話唔好！媽媽需要我，佢先係仔寶，唔係我痴住阿媽，係阿媽痴住我。」

另外，現正忙於拍攝新劇《社內相親》的Edan，透露經已拍攝重要場口，跟沈殷怡（Shirley）演出的親熱戲已完成八成，但床戲仍未拍，自己亦未作好準備。他續說早前拍較多通宵戲，但演出該劇不算辛苦，因為自己夜瞓，反而不喜歡開早，又大讚Anson Lo好捱得，對方拍完通宵戲後，翌日下午要開工也會去做健身運動，反而自己寧願瞓覺好過。談到何時操肌拍床戲，他搞笑謂：「黎緊都要勤力啲，因為稍後開演唱會，操fit啲都好。當時我拍《I SWIM》好勤力操肌，黎緊都要咁做，飲食上都會控制。（幾時開始？）今晚開始！」他又指演出《I SWIM》時身形較瘦，但演出《社內相親》的對手沈殷怡較為高，所以想自己有點肌肉配襯對方。提到八月開尾開個唱的他，可想好像隊友盧翰霆（Anson Lo） 及柳應廷（Jer）開演唱會加場？他說：「睇下反應如何，暫時就未知。」

#呂爵安 #社內相親 #爵屎 #星島娛樂

-----------------------------------------------------------------------
更多娛樂新聞，即去👇🏼👇🏼👇🏼
星島娛樂 https://bit.ly/3wO0HmP
頭條娛樂 https://bit.ly/38Lh8qT

想睇更多…TVB ▸ https://bit.ly/3NGExsh
想睇更多…ViuTV ▸ https://bit.ly/3yZK7Sg

Facebook ▹ https://bit.ly/3NU2OLF
Instagram ▹ https://bit.ly/3lJ7pnB