Скачать или смотреть Ерлік, елге мұра-ұрпаққа аманат

Сарыөзек гарнизонындағы 12740 әскери бөлімнің жеке құрамы және Кербұлақ аудандық Қорғаныс істері жөніндегі бөлімнің бастығы капитан Қуаныш Кәрімов, сондай-ақ Ауған соғысының ардагерлері Кербұлақ ауданындағы №49 орта мектебінде тағылымды «Ерлік сабағын» өткізді. Бұл маңызды іс-шараға мектептің 7-ші кадет сыныптарының тәрбиеленушілері мен 11-сынып оқушылары қатысып, батырлық пен отансүйгіштікке толы әсерлі кездесу болды.
Ерлік сабағы барысында ардагерлер Ауған соғысы кезіндегі бастан кешкен оқиғаларын егжей-тегжейлі баяндап, сол кезеңнің ауыртпалығы мен жауынгерлердің ерік-жігері туралы әсерлі аңгімелер айтты. Олардың өмірлік тәжірибесі мен елге деген адалдығы оқушыларға үлкен ой салды. Әскери қызметшілер де ардагерлердің еңбек жолын дәріптеп, Отан алдындағы борыш пен әскери қызметтің маңызы жөнінде мазмұнды пікірлерін бөлісті.
Кездесуден кейін мектеп оқушылары ардагерлерге арнап шағын концерттік бағдарлама ұсынып, өз өнерлерін көрсетті. Жас ұрпақтың ықыласы мен құрметі ардагерлердің көңілін толқытты. Сонымен қатар қонақтар мектептің тыныс-тіршілігімен танысып, білім ордасының жетістіктеріне жоғары баға берді.
Іс-шара соңында ардагерлер оқушыларға алғыстарын білдіріп, сабақты жақсы оқып, білімді де саналы азамат болуға шақырды. Олар жастардың бойынан патриоттық рухты көріп, елдің болашағына сенім білдірді.
Осындай ерлік сабақтары жас ұрпақтың жүрегіне отансүйгіштік сезімін ұялатып, ел қорғаған батырлардың ерлігі мен еңбегін құрметтеуге тәрбиелейді. Өскелең ұрпақ үшін бұл кездесу – тарихтан тағылым алып, болашаққа нық қадам жасауға жол ашқан маңызды рухани сабақ болды.