邀任賢齊任尾場嘉賓 炎明熹唱新歌感觸爆喊

邀任賢齊任尾場嘉賓 炎明熹唱新歌感觸爆喊

炎明熹一連三場演唱會圓滿落幕，陳山聰同囝囝Jaco、陳煒同老公陳醫生、姜浩文都有到場支持，而呢晚Gigi更請嚟任賢齊做嘉賓，佢仲好貼心咁送上印有小齊名字嘅水壺畀對方，令小齊可以喺五月巡唱時隨時攞嚟任用，之後佢哋仲一齊合唱《對面的女孩看過來》呀。

小齊爆全公司所有同事都係Gigi粉絲，佢話自己啱啱喺新加坡做完巡唱，一落機所有同事都唔見晒，原來全部都去咗睇Gigi演唱會，一張飛都無留畀佢呀！小齊驚覺Gigi原來同佢個女係同年出世，所以叮囑Gigi唔好叫做Uncle，叫小齊哥就得啦，認真搞笑。

能夠請到小齊哥做嘉賓，Gigi話非常興奮，大讚小齊哥份人非常親切，又話對方鼓勵佢要勇敢創作，做多啲好歌畀大家聽，不過Gigi就話好遺憾未能同小齊哥合照呀。

Gigi嘅新歌《還有一艘救生艙》推出數日，MV已經有過百萬點擊率，為咗答謝歌迷支持，Gigi亦特別喺呢場加唱新歌，唱到一半時，Gigi更突然感觸落淚：「我覺得我代入咗呢首歌裡面，但今次唔係愛情，可能因為今日係最後一場演唱會，所以我好似代入呢首歌，呢首歌係話今日係最後的一次，然後大家要遠離我嘅感覺。」Gigi話呢場唱新歌，本身係無呢個打算，但最後想喺尾場送比補場嘅歌迷，但點知中途自己忍唔住突然爆喊，搞到對大家有啲唔好意思，佢話形容自己嘅淚點真係好突然架。

#炎明熹 #任賢齊 #演唱會 #尾場 #圓滿落幕 #嘉賓 #新歌 #還有一艘救生艙 #感觸落淚 #Gigi #爆喊 #Uncle #對面的女孩看過來 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0