Скачать или смотреть ဓမ္မပဒအဋ္ဌကထာမြန်မာပြန် (ဒုတိယတွဲ) ဗုဒ္ဓဝဂ်၊ နတ်ပြည်မှသက်ဆင်းတော်မူသောဝတ္ထု

ကဏ္ဍသရက်ပင်

ဘုရားရှင်သည် သပိတ်တော်ကို အနီးသို့ညွှန်၍ သရက်သီးကိုခံယူတော်မူပြီးလျှင် ထိုအရပ်၌ပင်လျှင် နေတော်မူလိုသောအခြင်းအရာကို ပြတော်မူလေသည်။ ရှင်အာနန္ဒမထေရ်သည် သင်္ကန်းကိုခင်း၍ ပေးလေ၏။ ထိုအခါခင်းထားသောသင်္ကန်းနေရာ၌ နေတော်မူလတ်သည်ရှိသော် မြတ်စွာဘုရားအား ရှင်အာနန္ဒာမထေရ်သည် သောက်ရေကိုစစ်၍ ထိုသရက်သီးမှည့်ကိုနယ်လျှက် အဖျော်ပြု၍ဆက်ကပ်လေ၏။ မြတ်စွာဘုရားသည် အဖျော်ကို သုံးဆောင်တော်မူပြီးလျှင် ကဏ္ဍမည်သော ဥယျာဉ်စောင့်ကို ဤသရက်စေ့ကို ဤအရပ်၌သာလျှင် မြေမှုန့်ကိုယက်၍ စိုက်ပျိုးလော့ဟု မိန့်တော်မူလေသည်။ ဉယျာဉ်စောင့်သည် ထိုမိန့်တော်မူတိုင်း စိုက်ပျိုးခြင်းကိုပြုလေ၏။ ဘုရားရှင်သည် ထိုသရက်စေ့၏အထက်၌ လက်ကိုဆေးတော်မူလေ၏။ လက်ကိုဆေးတော်မူကာမျှပင် ထွန်တုံးမျှ အတိုင်းအရှည်ရှိသော ပင်စည်လုံးပတ်ရှိသည်ဖြစ်၍အဆောက်အားဖြင့် အတောင်ငါးဆယ်ရှိသော သရက်ပင်သည်ပေါက်ရောက်လာလေ၏။ အရပ်လေးမျက်နှာတို့၌ ကိုင်းမတစ်ခုတစ်ခုစီလည်းကောင်း၊ အထက်၌ ကိုင်းမတစ်ခုလည်ကောင်း ဤသို့အကိုင်းခက်မကြီးငါးခုတို့သည် အတောင်ငါးဆယ်စီ ရှိကြလေကုန်၏။ ထိုသရက်ပင်သည် ထိုခဏချင်း၌သာလျှင် အပွင့်အသီးတို့ဖြင့် ဖုံးလွှမ်းအပ်သည်ဖြစ်၍ တစ်ခုတစ်ခုသောအရပ်၌ မှည့်သောသရက်သီးအခိုင်ကို(သီးလျက်)ရှိသည်ဖြစ်လေ၏။ နောက်တော်မှလိုက်လာကြကုန်သောရဟန်းတို့သည် သရက်သီးမှည့်တို့ကို စားကုန်လျက်သာလျှင် လိုက်လာကြရလေကုန်၏။ ကောသလမင်းကြီးသည်ဤသို့သဘောရှိသော သရက်ပင်ပေါက်ရောက်ပေသတတ် ဟူသောစကားကိုကြားရလျှင် ထိုသရက်ပင်ကို တစ်စုံတစ်ယောက်သောသူသည် ချို့ဖဲ့ဖြတ်လှဲခြင်းမပြုရဟု အစောင့်အရှောက်ထားလေ၏။ ထိုသရက်ပင်သည် ကဏ္ဍမည်သောဥယျာဉ်စောင့် စိုက်အပ်သည်အဖြစ်ကြောင့် ကဏ္ဍသရက်ပင်ဟူ၍သာလျှင် ထင်ရှား၏။

#ဓမ္မပဒအဋ္ဌကထာမြန်မာပြန်
#ဓမ္မပဒဝတ္ထုတော်ကြီ
#ဓမ္မပဒဇာတ်တော်များ
#အသံစာအုပ်
#ဓမ္မပဒဇာတ်ဝတ္ထုများ