حصري حفل ضباط السهول كلمات الشاعر : فهد بن عبدالعزيز السهلي (أبو زيد) أداء المنشد : جفران بن هضبان

أبتدي باسم الله الواحد اللي مايزول
الغنيّ المغني الحقّ ربّي ذي الجلال

اطلبك يا رب حسن البداية و القبول
واطلبك يا رب حسن الختم بعد القبال

يُفرَق الرجّال من منطِقَه قبل الفعول
مثل ما يُفرَق مابين الحقيقة والخيال

لا لِفتْـني دعوةٍ من بني عمّي شمول
انتهض وانظم لي ابياتٍ جلالٍ جزال

ضاربٍ لي خطّ والفكرة تصول و تجول
فكرةٍ ما حازها اهل المصالح و الرّيال

ارحبوا ترحيبة الغيم همّال السّيول
باسم ضبّاط القبيلة نرحّب بالرّجال

في حفل ضبّاطنا جعل يسقى كل حول
ويتجدّد كل حولٍ على افضلها حوال

فالحفل نفخربكم عقب جول و حرّ صول
تُرفَع البيضا لكم يا كريمين السّبال

يا ذخر سهْل بن عامر مطيّرة العقول
والله انكم للقبيله ذخر وانكم ظِلال

انبهاجة عيني بشوفكم كنْها تقول
كنّ مالك يا فهَد قبْر في يومٍ يهال

أحمد الله يوم ربعي مداغيشٍ سهول
سقم حرّابٍ ليا صكّ جالٍ قُدْم جال

ضابطٍ من ربعنا يجعل العسرة ذلول
كيف عاد ان كل عامٍ تجي سربة رجَال

تحت راية مملكتنـا و حكّـامٍ عُدول
دونهم نشرب هماجٍ مثل شرب الزّلَال

كلّنا محمّد و سلمان لا شذّ الجفول
وَحَّدُونا واجتمعنا على دقاق و جلال

قبلنا شيبـاننـا مع معزّي بـالخيول
انصروه وكاتفوه و حَكَم حَيلٍ و حال

يوم بقعـا تدّرِج من طلوعٍ في نزول
لابتي قد ردّو التّرك و العالم تخال

لاعتزوا ذبّاحة الرّوم فاليوم المهول
جاك وقعٍ يِثلج الصّدر لاا يوم الزّوال

حن هل العارض ليا صار فالدّعوى ميول
من نزل فـ ديـارنـا لا يضام ولا يطال

ضيفنا من بينه و بين كُرباته نحول
يبشر و نخدمْه من قبل يسألنا سؤال

من زبنّـا جـالـيٍ عقب عـدوانٍ يهول
في عيون عداه قربه كما السهل المحال

لا زهمنا اللي زهم وارتكينا للحمول
في نظرنا حِملها ريش لو هي كالجبال

ورعنا من كُبر فعله يهِيب اهل الفعول
وعودنا يقلط على الحال و يحلّ المُحال

من يجاري لاد سهْلٍ على الطّيب مهبول
نفهقه بالطّيب طِيبِين وانا اخو العيال

ما نطوّل من قصر ما نقصّر من يطول
كل شخصٍ له مقامه و كلٍ له مقال

دون قاصر في جميع القبايل والشّمول
من علوّ إلى حدِر من جنوب إلى شمال

والله و تسعين نعمٍ تطول اللي ينول
للنّعم نـاسٍ تنوله و نـاسٍ ما تنال

يوم للعرضة طبول و للفزعة طبول
(الجزل)لا قنّد الرّاس ما يرجع حثال

وكان ما راسي و شعري يجمّل يالسّهول
يحرم مْن الرّوس راسي يجي فوقه عقال

والعذر مما بدَر من قصورٍ يا الزّحول
الشّعور اكبر من الحكي لو انّه يقال

ختمها صلّو على محمّد الهادي الرّسول
الرّسول اللي هدى النّاس من بعد الضّلال

كـ/ أبوو زيد .
فهد بن عبدالعزيز بن محمد آل حصّان السهلي .

سناب شات 👇🏻.

  / xfahad.55  





#جديد و #حصري #شيلة #حفل #ضباط #السهول #عام #1442 هـ #كلمات #الشاعر : #فهد بن #عبدالعزيز #السهلي #اداء #المنشد : #جفران بن #هضبان