Twins新歌MV拍足21個鐘 阿Sa拍到癲 阿嬌香檳噴面睇唔到嘢

Twins將明年一月舉行《TWINS SPIRIT演唱會》由原來6場一加再加，兩次加場均極速售罄，最後加至12場，打破自己出道以嚟紀錄。22周年主題曲《雙喜樓》早前推出，MV噚晚（21日）正式上架。

今次MV特別去台灣拍攝，導演搵曾為周杰倫、張惠妺、田馥甄拍MV嘅比爾賈操刀。呢次快閃台灣，阿嬌坦言未出發先興奮：「好耐都冇去過台灣，所以有啲興奮，因為好掛住台灣小食，不過時間有啲短，哈哈！」阿Sa蔡卓妍好耐冇拍自己歌舞嘅MV：「一聽呢首歌個demo，已經覺得好正、好係演唱會嗰種氣氛，同埋係好『Twins』。再夾埋呢份詞都好鍾意，因為聽填詞人先生講《雙喜樓》呢個名，話佢十幾年前已經好想寫畀我哋。《雙喜樓》顧名思義就梗係講我哋兩個，成雙成對，同埋我哋廿二週年呢個日子，Twins Spirit嘛，yeah！」」阿嬌好耐冇試過跳住舞拍MV：「今次特別請咗之前為綜藝節目《乘風破浪的姐姐》舞台總監為我哋排舞，『姐姐』嘅感覺即刻返晒嚟。」

阿Sa表示MV講述佢哋想準備一份禮物送畀大家，最喜歡係MV導演設計嘅巨形「囍」字隧道。問到難忘及蝦碌事，阿Sa笑指MV拍咗21粒鐘拍到人都癲！而阿嬌被香檳噴中眼睛：「最尾開香檳嘅時候成支香檳噴咗落塊面度，我係完全開唔到眼，可能大家留心啲睇嘅話就會見到我隻眼係開唔到，哈哈。」

#Twins #新歌 #MV #演唱會 #雙喜樓 #新歌 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞

即刻Follow TVB 娛樂新聞台 Facebook專頁
  / tvbenews  

登入myTV SUPER享受睇TVB自製節目7日包括娛樂新聞的免費點播
https://bit.ly/2TXLlM0