სირიაში კიდევ ორი პანკისელი ახალგაზრდა დაიღუპა

სირიაში კიდევ ორი პანკისელი ახალგაზრდა დაიღუპა. გარდაცვლილები არიან 24 წლის რამზან ფარეულიძე, რომელიც სირიაში წასვლამდე სოფელ ბირკიანში ცხოვრობდა და სოფელ ომალოს მკვიდრი, 22 წლის მუხმად თურქოშვილი. ორივე მათგანი „ისლამური სახელმწიფოს“ რიგებში იბრძოდა.

რამზან ფარეულიძე სირიაში დაახლოებით ერთი წლის წინ წავიდა. მანამდე ის თელავში, იურიდიულ ფაკულტეტზე სწავლობდა. რაც შეეხება მუხმად თურქოშვილს, ის პანკისიდან სირიაში დაახლოებით ერთი წლის წინ გაეგზავრა. მანმადე კი გარკვეული პერიოდის განმავლობაში თურქეთში ცხოვრობდა, ოჯახის სხვა წევრებთან ერთად. მუხმად თურქოშვილს პანკისში ცოლი და ერთი შვილი დარჩა.

სირიაში საბრძოლო მოქმედებებში უკვე 17 პანკისელი დაიღუპა. არსებული ინფორმაციით, პანკისის ხეობიდან სირიაში 50-მდე ახალგაზრდა იბრძვის „ისლამური სახელმწიფოს“ მხარეს, რომლის ორი ლიდერიც, თარხან ბათირაშვილი და მურად მარგოშვილი პანკისის ხეობიდან არიან.