Скачать или смотреть Valentine's Day Urdu poetry - nazm - 'kuch to garr barr hai' - نظم ۔ کچھ تو گڑ بڑ ہے

کُچھ تو گَڑ بَڑ ہے !
ہَیں گُل فَروش پَرِیشان ، کُچھ تو گَڑ بَڑ ہے !
گُلاب ہیں پَسِ زِندان ، کُچھ تو گَڑ بَڑ ہے !
شَہر میں ڈُھونڈ رَہے ہیں پَناہ دِل والے
خَطا ہیں اَپنے بھی اَوسان ، کُچھ تو گَڑ بَڑ ہے!
گُھما رَہا ہے وہ تَسبِیح بے نِیازی سے
جو گُفتگُو کے بھی دَوران ، کُچھ تو گَڑ بَڑ ہے!
نِچوڑتا ہے جو رَگ رَگ سے خُونِ دِل ہَر پَل
وُہی ہے اَپنا نِگِہبان ، کُچھ تو گَڑ بَڑ ہے !
عِلاجِ دَرد بھی ہوتا ہے تو بِلا تَشخِیص !
غَموں سے اَپنے ہیں اَنجان ، کُچھ تو گَڑ بَڑ ہے!
سُنا تھا دَولَتِ دُنیا ہے مَیل ہاتھوں کا
جَہاں اُسی پہ ہے قُربان ، کُچھ تو گَڑ بَڑ ہے !
ہَر ایک ذَریعہ ءِ نَشر و ذُیُوع رَقابَت میں
اُگَل رَہا ہے جو ہَذیان ، کُچھ تو گَڑ بَڑ ہے !
ہُجُوم وہ کہ کَھوے سے کَھوا ہے ٹَکراتا
نَہِیں ہے ایک بھی اِنسان ، کُچھ تو گَڑ بَڑ ہے !
جَہاں میں جِن کا مُقَدَّر بَنی ہے رُسوائی
وُہی ہیں صاحِبِ اِیمان ، کُچھ تو گَڑ بَڑ ہے !
ہیں دَسترَس میں خَزانے تَمام قُدرَت کے
مَگَر فَہم کا ہے فُقدان ، کُچھ تو گَڑ بَڑ ہے !
ہَر ایک موڑ پہ طُوفاں کَھڑا ہے مُنہ پھاڑے
قَدَم قَدَم پہ ہے بُحران ، کُچھ تو گَڑ بَڑ ہے !
خَزاں بَصُورَتِ لَشکَر ہے رَوندتی گُلشَن
بَہار کا نَہِیں اِِمکان ، کُچھ تو گَڑ بَڑ ہے !
نہ روزگار کی حاجَت نہ کاروبار کا غَم
گَدا گَری کا ہے طُوفان ، کُچھ تو گَڑ بَڑ ہے !
جِسے تھا ناز کَبھی اَپنی کار سازی پَر
وُہی فَلَک ہے پَشیمان ، کُچھ تو گَڑ بَڑ ہے !
وہ آپ چَل کے ہیں آئے ہَماری مَحفِل میں
کِیا ہے ہَم پہ جو اِحسان ، کُچھ تو گَڑ بَڑ ہے !
وہ جِس کو عَدل کا سونپا تھا مَنصَبِ اعلیٰ
اُٹھا کے لے گَیا میزان ، کُچھ تو گَڑ بَڑ ہے !
جو سُن کے عَظمَتِ رَفتہ کے جُھوٹے اَفسانے
سِمَٹ کے رَہ گئے اَذہان ، کُچھ تو گَڑ بَڑ ہے !
جُنُونِ جِہدِ تَسَلُّظ بَزورِ تِیر و تَبَر
ہے ذَوق و شَوق کا عُنوان ، کُچھ تو گَڑ بَڑ ہے !
سُنا تھا عِشق میں عاشِق تو جاں لُٹاتے ہیں
وہ جان لے کے ہیں شادان، کُچھ تو گَڑ بَڑ ہے !
'جو ہَم کہیں وُہی کَہنا ہی تُم پہ واجِب ہے '
مِلا ہے شاہ کا فَرمان ، کُچھ تو گَڑ بَڑ ہے !
ہَر ایک گوشہ ءِ گُلشَن سے اُٹھ رَہا ہے دُھواں
بَپا لَہُو میں ہے ہَیجان ، کُچھ تو گَڑ بَڑ ہے !
عقیلؔ خَوفِ خُدا بھی تو چِیز ہے کوئی
ہُوئے ہو تُم بھی مُسَلمان ؟ کُچھ تو گَڑ بَڑ ہے !
سکندر عقیلؔ انصاری