#شيلة

#شيلة خاطري سامح
أداء: علي بن دريميح و بخيت المري

🎧
خاطري سامح من الحب ياللي تعذلون
جزت من طرد الهوى بعد حب الاولين
من صواديف الليالي وخيبات الضنون
راحت عزوم الهواوي من الفرقا طحين
من وليفٍ جاني بهون ثم اقفى بهون
حال دونه قسمة الله ومكتوب الجبين
جعل يسقى قبل يقفي مع ذيك الضعون
عاد لي في زخرف الوقت والغالين عين
كن في كبدي لاجا الليل من خضر الطعون
وقدةٍ قفوا أهلها شديدٍ راحلين
مالي إلا اجر صوتي واغني باللحون
وان غشى عيني نعسها تجاذبت الونين
حالتي حالة شجاع من القوم مغبون
يوم شاف انه لحاله وجاوه مقبلين
سلّ سيفه لكن ازرى بعد كسر المتون
وصاح في ربعه ولا نبّه امن المنقذين
3:06 💔
بري حالي بري غصنٍ تلوى بالغصون
انكسر من عقب ماهو من النسمه يلين
خابرٍ قلبي جفاني مع الغض الفتون
ماترك لي كون ذكرى ينقضها الحنين
اتركوني لا انتثر دمع موقي من العيون
الحزن خيم بقلبي من اعجاف السنين
أجبر النفس العزيزه ولو هو ما يهون
والحقيقه والله اني من الفرقا حزين