Jounal Kreyòl Premye Okazyon || Mèkredi 10 Jiyè 𝟐𝟎𝟐𝟒

1.-Ansanm ak konseye prezidansyel Louis Gerald Gilles ak DG PNH la Rameau Normil ,premye minis Garry Conille vizite lopital jeneral la,aye madi a ,yon jou apre lapolis nasyonal dayiti te anonse yo reprann kontwol espas la bandi te okipe depi anviwon 4 mwa.



Dr Louis Gerald Gilles ak Dr Garry Conille ki mande popilasyon an pasyans,anonse nan tet kole ak konsey prezidansyel la yap bay lapolis la tout sa li bezwen kom mwayen ,yon fason pou rive reprann kontwol tout zon bandi ak zam yo te okipe.



Se pa posib pou lopital jeneral pase 4 mwa femen aloske se pi pwo loiptal leta peyi a ki la pou bay sevis ak popilasyon an sitou sila yo ki pa gen mwayen lajan ,dapre Dr Louis Gerald Gilles ak premye minis Garry Conille .



2.- Konsèy Prezidansyèl Tranzisyon an vizite jounen madi 9 jiyè a santral E-power ak sou stasyon EDH la ki nan Dèlma 33 a.



Konseye Prezidansyèl Leslie Voltaire ki te reprezante KPT a nan kad vizit sa fe konnen demach sa ap pèmèt Konsèy la gen plis enfòmasyon sou 30 megawat kouran E-power ap founi pou EDH mete sou 33 megawat ki soti Pelig ak tèminal "Vareux " ki bay yon total 63 megawat EDH genyen ki disponib.



Selon enfòmasyon yo, EDH ap bezwen 300 megawat pou l’ distribye kouran sou tout zòn metwopolitè Pòtoprens lan.



3.-Lajistis repiblik dominiken arete aye madi a,sitwayen dominiken Hungria Diaz ,pou enplikasyon prezime li nan asasina ak bal 2 sitwayen ayisyen .



Ensidan sa te rive 2 jiye pase a , sou yon plantasyon prezime kriminel la genyen nan zon Pedernales,dapre lapres dominiken.

Viktim yo se Jean Duversaint,65 lane ak Maurice Delia ,49 lane ,yo mouri anba bal , nan moman yo tap ranmase branch bwa sech pou al limen pou fe manje ,dapre temwayaj yo .



4.- Reyaksyon ministe afe etranje ayisyen sou dosye lanmo 3 resotisan ayisyen pami yo Saint Mira Milien , Jean Duverssaint ak Maurice Delia.



Ministe a ki kondane move tretman sitwayen ayisyen yo kontinye ap viktim nan zon fwontye yo ak sou teritwa dominiken an mande otorite dominiken yo pou degaje yo fe limye sou sikonstans asasina sitwayen ayisyen sa yo epi idantifye responsab yo .



Anbasad ayiti santo domengo ki deja okouran dosye say o ap gen pou fe swivi nesese yo, dapre ministe afe etranje ayisyen yo.



5.-Sekretarya jeneral inyon paran elev pwogresis ayisyen (UPEPH) eksprime ekyetid paran yo nan zon metwopoliten potoprens la genyen pou pitit yo ki ta dwe patisipe nan egzamen ofisyel yo ane sa akoz vyolans fe plizye milye elev sa yo ak paran yo al refifye nan vil pwovens yo.



Nan yon let tou louvri oganizasyon an voye bay minis edikasyon an ,li mande minis Antoine Augustin ki desizyon ministe a pran deja anfave plizye milye elev sa yo ki oblije kite dives komin nan depatman lwes la akoz vyolans gang ak zam yo .



UPEPH pwopoze pou tout direkte depatmantal edikasyon yo kreye yon sant espeyal pou resevwa tout elev 9em ane fondamantal yo ak Ns4 ki refifye nan res peyi a .


Prezantasyon : Dieuseul GUERRIER & Johnny FERDINAND
Meteyo : Chrisnette SAINT-GEORGES
Tansyon Lari : Mackenson RÉMY 4x4
Spo : Jacques Hans Vilfort (jako)
Pwodiksyon : Jean-Claude DOLCÉ
kowòdinasyon : Peterson LUXAMA
Redaksyon : Dieuseul GUERRIER
Reyalizasyon ak Sou Entènèt : Jack thedd Jr Dieudonne & Jimmy Cly Théagène