Скачать или смотреть "Алматы ұстазы" байқауының жеңімпазы анықталды

"Алматы ұстазы" байқауының жеңімпазы анықталды. Жас педагогтардың ішінен топ жарған химия пәнінің мұғалімі 5 миллион теңге мен шетелде білімін жетілдіруге жолдама алды. Қала әкімі Дархан Сатыбалды жобаның мақсаты жас мамандарға қолдау көрсетіп, шығармашылық әлеуетін арттыру деп отыр. Ұстаздар күніне орай ұйымдастырылған салтанатты шара жайында әріптесім толығырақ айтып берсін.
Байқауға 216 мектептен 700-ден астам жас педагог қатысты. Финалға жеті мұғалім суырылып шықты. Арасынан химия пәнінің мұғалімі Нұрсұлтан Сағынтай үздік атанды. Сайыстың жеңімпазы 5 миллион теңге көлемінде сыйақы мен шетелде білім алуға мүмкіндік алды. Гран-при иегері бұл қаражатты өзінің дамуына жұмсамақ.
НҰРСҰЛТАН САҒЫНТАЙ, №146 мектеп-лицейі химия пәнінің мұғалімі:
Қуанышымда шек жоқ. Ақшаны өзімнің кәсіби шеберлігіме жұмсаймын. Өйткені, мұғалімдік сала ары қарай дамуды, күнделікті еңбек етуді, үздіксіз ізденісті талап етеді. Өзімнің ойымдағы идеяларды жүзеге асыру үшін жұмсаймын.
Ақтық сында бақ сынаған мұғалімдердің еңбегі де ескеріліп, оларға халықаралық білім беру тағылымдамасынан өтуге сертификаттары табысталады. Сондай-ақ, салтанатты жиында қала әкімі Дархан Сатыбалды осы салада ұзақ жыл табысты еңбек еткен педагогтарды мемлекеттік награда және алғыс хатпен марапаттады.
ДАРХАН САТЫБАЛДЫ, Алматы қаласының әкімі:
Сіздер ерең еңбектеріңіз бен өнегелі сөздеріңізбен жас ұрпақтың жүрегіне ізгілік пен адамгершілік дәнін егіп келесіздер. Бүгінде Алматы ұстаздары білім мен тәрбие беру ісінде заман талабына сай үздік нәтижелерге қол жеткізіп, жас ұрпақтың рухани және интеллектуалды дамуына аянбай еңбек етесіздер. Адамзатқа әріп танытып, қалам ұстатқан ағартушы қауымына шынайы алғыс пен құрмет білдіреміз.
Ал, "техникалық және кәсіптік, орта білімнен кейінгі білім беру ұйымы» ретінде туризм және қонақжайлылық индустриясы колледжі үздік атанды. Оқу орнына 68 миллион теңге табысталды. Шаһар басшысының айтуынша, ұстаздық жолды таңдаған жастарға әрқашанда қолдау көрсетіп, мамандықтың мәртебесін арттыруға күш салу керек.
#Информбюро #31арна #БастыЖаңалықтар #Новости #31канал