Скачать или смотреть စစ်ဆင်ရေးအတွက်အသင့်ပြင်ဆင်ထားဖို့ လေယာဉ်တင်သင်္ဘောကို ဗြိတိန်ရေတပ်ညွှန်ကြား | People's Spring

စစ်ဆင်ရေးအတွက်အသင့်ပြင်ဆင်ထားဖို့ လေယာဉ်တင်သင်္ဘောကို ဗြိတိန်ရေတပ်ညွှန်ကြား

မတ်လ- ၈ ၊၂၀၂၆ ။People’s Spring

၅ ရက်အတွင်း စစ်ဆင်ရေးအတွက် ထွက်ခွာနိုင်အောင် အသင့်ပြင်ထားဖို့ လေယာဉ်တင် သင်္ဘောတစ်စီးကို ဗြိတိန် ရေတပ်က ညွှန်ကြားထားကြောင်း သိရပါတယ်။

HMS Prince of Walesရဲ့ ရေတပ်သားတွေဟာ နောက်ထပ် ၅ ရက်အတွင်း ပို့စ်မောက်သ်မြို့ ဆိပ်ကမ်းကနေ ထွက်ခွာနိုင်အောင် အသင့်ပြင်ဆင်ထားဖို့ အမိန့်စာ လက်ခံရရှိထားတယ်လို့ ဆိုပါတယ်။ Prince of Walesဟာ ဗြိတိန်ရေတပ်က ပိုင်ဆိုင်တဲ့ လေယာဉ်တင် သင်္ဘောနှစ်စီးထဲက တစ်စီးဖြစ်ပါတယ်။

အဲဒီစစ်ရေယာဉ်ကြီးကို ဘယ်ဒေသဆီ ထွက်ခွာစေမလဲ ဆိုတာကို အတိအကျ မသိရသေးပေမယ့် အရှေ့အလယ်ပိုင်း ဒေသမှာ လက်ရှိ ဖြစ်ပွားနေတဲ့ စစ်ပွဲကြောင့် ခြိမ်းခြောက်ခံလာရနိုင်တဲ့ ဗြိတိန် အကျိုးစီးပွားတွေကို ကာကွယ်ဖို့ မြေထဲပင်လယ်ဆီ စေလွှတ်လိမ့်မယ်လို့ ယုံကြည်ရပါတယ်။

ပုံမှန် လုပ်ထုံးလုပ်နည်းတွေအရ လေယာဉ်တင် သင်္ဘောရဲ့ ခရီးစဉ်တစ်ခု မတိုင်ခင် ကြိုတင်ပြီး အကြောင်းကြားတဲ့ ကာလဟာ ၁၄ ရက် ဖြစ်ပါတယ်။

မတ်လ ၇ ရက်နေ့ ညတုန်းက အမေရိကန် သမ္မတ ဒေါ်နယ်လ်ထရမ့်ဟာ ဗြိတိန်က အရှေ့အလယ်ပိုင်း ဒေသဆီကို လေယာဉ်တင် သင်္ဘောတွေ စောစောစီးစီး မစေလွှတ်ပေးခဲ့တဲ့အတွက် ဗြိတိန်ဝန်ကြီးချုပ် ဆာကီရာ စတာမာကို ဝေဖန်ခဲ့ပါတယ်။ သူက စစ်ပွဲကို အမေရိကန်က နိုင်နေပြီဆိုတဲ့ အချိန်ကျမှ ဗြိတိန် လေယာဉ်တင် သင်္ဘောတွေကို မလိုအပ်တော့ဘူးလို့လည်း ဆိုပါတယ်။

ဗြိတိန်ဟာ တစ်ချိန်က အမေရိကန်ရဲ့ မဟာမိတ်ကောင်း ဖြစ်ခဲ့ကြောင်း၊ မဟာမိတ်တွေ အားလုံးထဲမှာ အကောင်းဆုံးတောင် ဖြစ်နိုင်ကြောင်း၊ အခုဆိုရင် လေယာဉ်တင် သင်္ဘောနှစ်စီးကို ဗြိတိန်က အရှေ့အလယ်ပိုင်းဆီ ပို့ဆောင်ပေးဖို့ အလေးအနက် စဉ်းစားသင့်ပြီဖြစ်ကြောင်း၊ ဝန်ကြီးချုပ် စတာမာကို ပြောချင်တာက အမေရိကန် အနေနဲ့ အဆင်ပြေကြောင်း၊ ဗြိတိန် လေယာဉ်တင် သင်္ဘောတွေကို အမေရိကန်က နောက်ထပ် မလိုအပ်တော့ကြောင်း၊ ဒါပေမဲ့ အခုကိစ္စကို အမေရိကန်က မှတ်ထားမှာဖြစ်ကြောင်း၊ အမေရိကန်က နိုင်အောင် တိုက်နှင့်နေပြီးသား စစ်ပွဲမှာ တခြားနိုင်ငံတွေက ဝင်ကူတာမျိုးလည်း မလိုအပ်ကြောင်း ထရမ့်က လူမှုကွန်ရက် မီဒီယာမှာ ရေးသားထားခဲ့ပါတယ်။

ဗြိတိန် အစိုးရဟာ အီရန်ကို အမေရိကန်က တိုက်ခိုက်နေတဲ့ စစ်ပွဲအတွင်း ထိုးစစ်ဆင်မှုတွေမှာ လုံးဝ ဝင်မပါပေမယ့် အရှေ့အလယ်ပိုင်း ဒေသတွင်း နိုင်ငံတွေဆီ အီရန်က လက်တုံ့ပြန် ပစ်ခတ်နေတဲ့ ဒရုန်းနဲ့ ဒုံးကျည်တွေကို ကြားဖြတ်ဟန့်တားတဲ့ ခံစစ်အစီအမံတွေမှာ ကူညီပေးနေပါတယ်။

ဗြိတိန်မှာ နိုင်ငံရေးသမား တချို့က အစိုးရ အနေနဲ့ ဒီစစ်ရေးပဋိပက္ခ ဖြစ်လာနိုင်တာကို သိသိကြီးနဲ့ လုံလောက်တဲ့ ကြိုတင်ပြင်ဆင်မှုတွေ လုပ်မထားဘူးဆိုတဲ့ စွပ်စွဲချက်တွေကို စတာမာက ငြင်းဆိုခဲ့ပြီး နှစ်ဆန်းပိုင်း ကတည်းက ကာတာနဲ့ ဆိုက်ပရပ်စ်တို့မှာ ကာကွယ်ရေး အစီအမံတွေ ပိုမို မြှင့်တင် ဖြန့်ကျက်ထားခဲ့ကြောင်း ပြောကြားသွားပါတယ်။

ဆိုက်ပရပ်စ် ကျွန်းမှာရှိတဲ့ ဗြိတိန် လေတပ်စခန်း တစ်ခုကို အီရန်ဒရုန်း ထိမှန်ခဲ့တဲ့ ကိစ္စအပြီး ဗြိတိန်အစိုးရဟာ တပ်သား ၄၀၀ လောက်ကိုလည်း ဆိုက်ပရပ်စ်ဆီ ဖြည့်တင်း ပို့ဆောင်ထားကြောင်း သိရပါတယ်။

𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴

#ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA