Скачать или смотреть MAPYA KESI YA SHAMIMU NA MUMEWE

Kesi ya Dawa za Kulevya inayomkabili mfanyabiashara, Abdul Nsembo na mkewe, Shamim Mwasha katika Mahakama ya Hakimu Mkazi Kisutu inasubiri majibu ya Mkemia Mkuu wa Serikali ili ikamilike upelelezi.

Hayo yamebainishwa na Wakili wa Serikali Mwandamizi, Wankyo Simon mbele ya Hakimu Mfawidhi, Kelvin Mhina wakati kesi hiyo ilipotajwa.

Wakili Wankyo ameeleza kuwa upelelezi wa shauri hilo bado haujakamilika na bado wanafuatilia majibu kwa Mkemia Mkuu wa Serikali, hivyo anaiomba mahakama hiyo kupanga tarehe nyingine.

Baada ya kueleza hayo, Hakimu Mhina ameahirisha kesi hiyo hadi Septemba 27, 2019 kwa ajili ya kutajwa.

Katika kesi ya msingi, washtakiwa hao wanakabiliwa na shtaka la kusafirisha gramu 232.70 za dawa za kulevya aina ya Heroin.

Inadaiwa kuwa Mei Mosi, 2019 kwa pamoja washtakiwa hao wakiwa maeneo ya Mbezi Beach walisafirisha dawa za kulevya zenye uzito wa gramu 232.70 huku wakijua kufanya hivyo ni kosa kisheria.