Chambugong Aro Bolwari Ni Ong.baani.

Ia story ba itihas ko video tarie watatengon mongsong batedi "Chambugong" katta ra mai oni ong.katbaaha aro "Bolwari" katta ra mai oni ong.katbaaha ian ong.a. Bang.bata manderangan Bolwari maharide Chambugongoni ong.kata ine ma.sia, indiba atchu Janggin Sarangpani sa.rao gro jegipa katta dokgipa ko kinarikgipa angni mama Challin Ch Marak(Silsepa) ni agane donangskaani gita de Bolwari aro Chambugong ra abisa ong.a. Kokken aro Dimre uamang ni chasongo darang mahariba dongkuja ine agana. Kokken aro Dimre ni demechik abisa, abitanggipa ko Tekmi aro nogipako Malmi mingachin indake abitanggipa Tekmi sa nogipa ko Chambu bite akge cha.e sala sia ni giminsa Chambugong mingaha ine agana, uno nisa "Chambugong" katta ong.katbaaha. Nogipa Malmi ba abitangni songdong a.chagipa songona re.baon uamang ni chiring chiga ringgipa ra bolgrim andalsimsim dakana. Unasa Bolna wari gisim ko chiga ringgipa Bolwari Gisim ine mingskaahana, uno nisa "Bolwari" katta ong.katbaaha. Maina anga ia kattarangko dal.e raa? angni ma.siani gitade atchu Janggin Laskor(Sarangpa) uara mande seng.gipa man.gipa ong.a aro Garo Hills gimikon biko mingsing minggama aro uni sa.rao gro jegipa aro katta dokgiparangde miattam cha.manaoni wal sengkampila indiba katta agangiparang matchotja ine Lt Challin Ch Marak agane donanga. Uamanga A.chikrangni Tibet a.songoni re.baani gimin ba namen aganna changa indiba uarangko see ra.rikna gita man.rikjaha. Uamangni agana ni gitade Guwahati ni Kamakya Mandir o mite dake olakienggipa ra A.chikrangko Tibet a.songoni re.dilbagipa mite paksa mande paksa ong.gipa Kamal ba Tuara Nangapa sana ukosa da.onaba manienga ine uamangan sakkiko on.anga ine agana. Ambi Malmi ni katdanggipa bi.ap Sa.minpattal minggipa ra badiao ong.genchim ukode uamangba agana man.ja, Ambi Tekmi ni dongrikgipa Norek Baljek minggipa koba namede ma.sija indiba da.o donggipa Baljek ong.engnaba donga ine san aganaia, ine sakkiko donangaha.