Скачать или смотреть សង្ខេបព័ត៌មានជាតិសំខាន់ៗ ប្រចាំថ្ងៃទី២៤ ខែតុលា ឆ្នាំ២០២៥

---
១. សម្តេចតេជោ ហ៊ុន សែន ពន្យល់ថា កិច្ចព្រមព្រៀងទីក្រុងប៉ារីសមិនអាចយកមកដោះស្រាយជម្លោះកម្ពុជា-ថៃបានទេ។ ឆ្លើយតបទៅនឹងអ្នកចង់ឱ្យយកកិច្ចព្រមព្រៀងសន្តិភាពទីក្រុងប៉ារីសទៅដោះស្រាយជាមួយថៃ, សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាកម្ពុជា នៅថ្ងៃទី២៤ ខែតុលានេះ បានពន្យល់ថា កិច្ចព្រមព្រៀងទីក្រុងប៉ារីសមិនអាចយកមកដោះស្រាយជម្លោះកម្ពុជា-ថៃបានទេ ព្រោះកម្ពុជា-ថៃ ដែលជាប្រទេសហត្ថលេខី នឹងចោទប្រកាន់គ្នាថារំលោភលើអធិបតេយ្យភាពគ្នារៀងៗខ្លួន។ សម្តេចតេជោ ហ៊ុន សែន បានដាក់ជាសំណួរថា «សួរថា សហប្រធានគាត់ព្រមទេ? សាកល្បងសួរទៅឥណ្ឌូនេស៊ី និង ទៅបារាំងមើល៍ តើគេព្រមកោះទេ? ហើយហត្ថលេខី ទាំងឡាយគេព្រមចូលរួមទេ? ហើយដោះរបៀបម៉េច? …»។ ការថ្លែងយ៉ាងដូច្នេះ របស់សម្តេចអគ្គមហាសេនាបតីតេជោ ហ៊ុន សែន ធ្វើឡើងក្នុងកិច្ចប្រជុំព្រឹទ្ធសភា នីតិកាលទី៥ សម័យប្រជុំលើកទី៤ ថ្ងៃទី២៤ ខែតុលា ឆ្នាំ២០២៥៕
ប្រភព៖ FB/សម្ដេចតេជោ ហ៊ុន សែន (  / 17cqdpi6di  )

២. ប្រធានាធិបតីកូរ៉េខាងត្បូង នឹងជួបចរចាជាមួយនាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត ក្រៅកិច្ចប្រជុំកំពូលអាស៊ាន នាថ្ងៃចន្ទសប្តាហ៍ក្រោយ។ នេះបើតាមការផ្សាយរបស់កាសែតកូរ៉េខាងត្បូងនាថ្ងៃសុក្រនេះ។ ទីប្រឹក្សាសន្តិសុខជាតិបានបញ្ជាក់ថា ជំនួបនេះ នឹងពិភាក្សាអំពីភាពជាដៃគូយុទ្ធសាស្ត្ររវាងប្រទេសទាំងពីរ និងបញ្ហាដែលមិនទាន់ដោះស្រាយ រួមមានឧក្រិដ្ឋកម្មឆបោកតាមអ៊ីនធឺណិត។ គួរបញ្ជាក់ថា ពាក់ព័ន្ធនឹងការប្រយុទ្ធប្រឆាំងនឹងឧក្រិដ្ឋកម្មឆ្លងដែន, កម្ពុជាកំពុងរៀបចំបង្កើតក្រុមការងារបង្ក្រាបឧក្រិដ្ឋកម្មតាមប្រព័ន្ធបច្ចេកវិទ្យាថ្នាក់ជាតិ, បង្កើនសមត្ថភាពធ្វើកោសល្យវិច្ច័យឌីជីថល និងបន្តសហការជាមួយដៃគូ ដើម្បីពង្រឹងក្របខ័ណ្ឌការអនុវត្តច្បាប់ឆ្លងព្រំដែន និងអភិបាលកិច្ចនៃប្រព័ន្ធបច្ចេកវិទ្យា។
ប្រភព៖ YNA (https://m-en.yna.co.kr/view/AEN202510...)

៣. កិច្ចប្រជុំពេញអង្គគណៈរដ្ឋមន្ត្រីដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នាថ្ងៃទី២៤ ខែតុលានេះ បានអនុម័តលើសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៦។ ក្នុងសេចក្តីព្រាងច្បាប់នេះ រាជរដ្ឋាភិបាលគ្រោងចំណាយថវិការដ្ឋសរុប ៤០ ៩១៣ ប៊ីលានរៀល (ប្រមាណ១០ពាន់លានដុល្លារ) ស្មើនឹង ១៨,៨៥% នៃ ផ.ស.ស. ឬកើនចំនួន ៧,៨ភាគរយ ធៀបនឹងច្បាប់ហិរញ្ញវត្ថុឆ្នាំ២០២៥។ សេចក្ដីព្រាងច្បាប់ថវិកាឆ្នាំ ២០២៦ មាន ៦ជំពូក និង ១៥មាត្រា រៀបចំឡើងដោយផ្ដល់អាទិភាព សមត្ថភាពការពារអធិបតេយ្យជាតិ ការគាំទ្រការអនុវត្តគោលនយោបាយសំខាន់ៗ ព្រមទាំងវិធានការកែទម្រង់គន្លឹះ ដែលត្រូវបន្តអនុវត្តនៅឆ្នាំ ២០២៦ ជាពិសេសគាំទ្រការបន្តអនុវត្តកម្មវិធីគោលនយោបាយអាទិភាពទាំង ៦ វិធានការគន្លឹះទាំង ៥ និងអាទិភាពគន្លឹះទាំង ៥ ដូចក្នុងយុទ្ធសាស្ត្របញ្ចកោណដំណាក់កាលទី១។
ប្រភព៖ ថ្មីៗ (https://t.me/thmeythmeymedia/77607)

៤. តាមរយៈសេចក្ដីប្រកាសព័ត៌មាន របស់កងរាជអាវុធហត្ថ ចេញផ្សាយនៅថ្ងៃទី២៤ ខែតុលានេះ កងរាជអាវុធហត្ថសម្រេចស្នើសុំតាមឋានានុក្រមទៅអគ្គបញ្ជាការដ្ឋាន នៃកងយោធពលខេមរភូមិន្ទ ផ្អាកមុខតំណែង និងបញ្ជូនសំណុំរឿងជនប្រព្រឹត្តបទល្មើសឈ្មោះ ឈឹម ឆែម ទៅអយ្យការអមសាលាដំបូងរាជធានីភ្នំពេញ។ តាមកងរាជអាវុធហត្ថ ក្រោយការស្រាវជ្រាវ ប្រមូលភស្តុតាង និងការស្ដាប់ចម្លើយ បានរកឃើញថា ឈ្មោះ ឈឹម ឆែម ពិតជាបានបង្កហិង្សាដោយចេតនាទៅលើជនរងគ្រោះពិតប្រាកដមែន។ សូមរម្លឹកថា បុរសដែលជាអ្នកបង្កហិង្សា ត្រូវបានគេស្គាល់ថាជា ឧត្តមសេនីយ៍ត្រី ឈឹម ឆែម នាយករងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ។ ស្រ្តីរងគ្រោះ បានថ្លែងប្រាប់ប្រព័ន្ធផ្សព្វផ្សាយថា នាងត្រូវបានបុរសជាម្ចាស់រថយន្តម្នាក់ដែលក្រោយមកត្រូវបានគេស្គាល់ថាជា ឧត្តមសេនីយ៍ត្រី ឈឹម ឆែម វាយនាងនឹងកាំភ្លើង នាំឱ្យរបួសក្បាល ក្រោយនាងបានទាមទារថ្លៃសំណង ២ម៉ឺនរៀល ពីការថយបុកម៉ូតូរបស់ខ្លួន។
ប្រភព៖ GRK News (https://www.facebook.com/share/p/1Brz...)

៥. នៅថ្ងៃទី២៣ ខែតុលា ឆ្នាំ២០២៥ ពន្ធនាគារខេត្តក្រចេះបានចេញលិខិតបំភ្លឺច្រានចោល ការចោទប្រកាន់ថាពន្ធនាគារខេត្តក្រចេះបង្ខំអ្នកទោសធ្វើការឆបោកតាមអនឡាញ។ លិខិតបំភ្លឺរបស់ពន្ធនាគារខេត្តក្រចេះធ្វើឡើង ក្រោយផេកហ្វេសប៊ុកឈ្មោះ «សម្លេងមនសិការខ្មែរ» ផ្សាយខ្លឹមសារថា «ពន្ធនាគារខេត្តក្រចេះ ត្រូវបានរាយការណ៍មកថាអ្នកទោសត្រូវបានគេបង្ខំឱ្យធ្វើការឆបោក តាមអនឡាញដោយត្រូវបានបង្កើតគេចេញជា១០ក្រុម ក្នុងមួយក្រុមមានគ្នា៣០នាក់។ មកដល់ខែនេះ សម្រេច បាន៥ដងហើយ ក្នុងរយៈពេល៥ខែ»។ ជុំវិញការចោទប្រកាន់នេះ អង្គភាពពន្ធនាគារ បានបំភ្លឺថា នៅក្នុងពន្ធនាគារ មិនត្រូវបានអនុញ្ញាតឱ្យជនជាប់ឃុំប្រើប្រាស់ទូរសព្ទចល័តនោះទេ ហេតុដូច្នេះគ្មានហេតុផលណាមួយ ដែលជនជាប់ឃុំអាចធ្វើការឆបោកតាមអនឡាញបានឡើយ។ អង្គភាពពន្ធនាគារខេត្តក្រចេះ បន្ដថា អង្គភាពពន្ធនាគារ តែងធ្វើការឆែកឆេររុករកវត្ថុហាមឃាត់ក្នុងបន្ទប់ឃុំឃាំងជាប្រចាំក្នុង ១សប្តាហ៍ ចំនួន ២ទៅ ៣ដង ពុំបានរកឃើញអ្វីដែលខុសពីបទបញ្ជាផ្ទៃក្នុងពន្ធនាគារ និងច្បាប់ពន្ធនាគារនោះទេ។
ប្រភព៖ កម្ពុជាថ្មី (https://t.me/kptnews/136923)

Facebook:   / preah.khan.khmer  
Telegram: https://t.me/preah_khan
TikTok:   / preah_khan