Скачать или смотреть READ Foundation က ဂေဟစနစ် စိုက်ပျိုးရေးသင်တန်းအတွက် သင်တန်းသားများ ခေါ်ယူ

ကရင်နီ၊အောက်တိုဘာ ၆

ကရင်နီပြည်နယ်အတွင်း ကျေးလက်ပညာရေးနှင့်စိုက်ပျိုးဖွံ့ဖြိုးရေး ဖောင်ဒေးရှင်း (READ Foundation) က ဂေဟစနစ်စိုက်ပျိုးရေးသင်တန်းအတွက် သင်တန်းသားများ ခေါ်ယူနေကြောင်း ထုတ်ပြန်ထားသည်။

လျှောက်ထားလိုသူအနေဖြင့် အသက် (၁၇) နှစ်အထက် ဖြစ်ရမည်ဖြစ်ပြီး အတန်းပညာအရည်အချင်း အနည်းဆုံး (၅) တန်းအောင်သူ၊ ကရင်နီပြည် (သို့) နယ်စပ်တွင်နေထိုင်သူ၊ သင်တန်းကာလအတွင်း ဘော်ဒါဆောင် နေနိုင်သူ၊ အများနှင့်ဆက်ဆံရေးကောင်းမွန်သူ၊ ခွဲခြားဆက်ဆံခြင်းမရှိသူ၊ ကျန်းမာရေးကောင်းမွန်သူ ဖြစ်ရမည်ဖြစ်ကြောင်း ဖော်အြထားသည်။

သင်တန်းတွင် ဓာတုစိုက်ပျိုးရေးစနစ် ဆိုးကျိုးများ၊ ဂေဟစနစ်နှင့် အစာ သံသရာလည်ပုံ၊ ဂေဟစနစ် စိုက်ပျိုးရေး အခြေခံသဘောတရားများ၊ ရေနှင့်မြေကြီး၊ မြေဆီလွှာ ထိန်းသိမ်းခြင်းနှင့် ကောင်းမွန်စေခြင်း၊ ကောက်ပဲ သီးနှံစိုက်ပျိုး နည်းစနစ်၊ ပိုးမွှားကာကွယ်ထိန်းသိမ်းနည်းများ နှင့် ကိုယ်ပိုင် မျိုးစေ့ ထုတ်လုပ်ခြင်း၊ အပင်မျိုးပွားခြင်းဆိုင်ရာ နည်းလမ်းများ၊ စိုက်ခင်းဒီဇိုင်းဆွဲခြင်း၊ မှိုတစ်ရှူး မျိုးပွားခြင်း၊မွေးမြူထုတ်လုပ်ခြင်း၊ စိုက်ပျိုးရေးဆိုင်ရာ စီမံချက်ချခြင်း၊ အဆိုပြုလွှာ တင်သွင်းခြင်း၊ အစီရင်ခံစာရေးသားခြင်း၊ Presentation skill and public speaking skill စသည့်တို့ကို သင်ကြားပေးမည်ဖြစ်ကြောင်း ဖော်ပြထားသည်။

အဆိုပါ သင်တန်းကို ကရင်နီပြည်တွင် ရင်ဆိုင်နေရသည့် စားနပ်ရိက္ခာ နှင့် အာဟာရ မလုံလောက်မှုများကို သင်တန်းဆင်းသူများမှတဆင့် ပြည်သူများကို စိုက်ပျိုးရေး၊ မွေးမြူရေး သင်တန်းထပ်ဆင့် ပို့ချနိုင်ရန်၊ တနိုင်တပိုင် စိုက်ပျိုးရေး၊မွေးမြူရေး လုပ်ငန်း လုပ်ဆောင်နိုင်ရန်၊ ပြည်သူများ စားနပ်ရိက္ခာ လုံလောက်မှုရှိစေရန် နှင့် အလုပ်အကိုင် အခွင့်အလမ်းပေါ်ပေါက်စေရန် အတွက် ဖွင့်လှစ်ရခြင်းဖြစ်ကြောင်း ဖော်ပြထားသည်။

သင်တန်းကာလ (၅) လ ကြာမြင့်မည်ဖြစ်ပြီး သင်တန်းပြီးပါက ကရင်နီပြည်ရှိ ပြည်သူများကို စိုက်ပျိုးရေး သင်တန်းပြန်လည် ပို့ချရမည်ဖြစ်ပြီး အနည်းဆုံး (၁)နှစ် တာဝန်ထမ်းဆောင်ရမည် ဖြစ်ကြောင်း ဆိုထားသည်။

သင်တန်းလျှောက်လွှာများကို ၂၀၂၅ ခုနှစ်၊ နိုဝင်ဘာ (၁၅) ရက်နေ့အထိ လက်ခံမည်ဖြစ်ပြီး သင်တန်းကို ၂၀၂၆ ခုနှစ်၊ ဇန်နဝါရီလမှ မေလအထိ ဖွင့်လှစ်မည်ဖြစ်ကာ လူဦးရေ (၃၀) ဦးသာခေါ်ယူမည်ဖြစ်ကြောင်း ဖော်ပြထားသည်။

KPV News
Photo - READ (ပုံဟောင်း)

#KarenniPeoplesVoice #ဂေဟစနစ် #စိုက်ပျိုးရေးသင်တန်း #သင်တန်းသား #ခေါ်ယူ #READ