ТАМАРА АСАР: Табиғат - бұл "Жер - Ана"! 22 сәуір - Халықаралық Жер - Ана күніне орай жаңа клип шықты

Әнші Тамара Асардың "Табиғат - бұл Жер Ана" атты жаңа туындысы шықты. 22 сәуір - Халықаралық Жер - Ана күні. Осыған орай ғаламдық музыкалық жобаға қазақстандық орындаушыларды қатысуға шақыратын британдық "Tackroom Theatre" компаниясының көркемдік директоры Эбби Райттан өтініш келіп түскен.

Эбби Райт 2019 жылы Лондонда "Decca Records" студиясында шығарылған «Resolution», яғни қазақшаға аударғанда «Шешім» атты әнін қазақ тілінде, қалаған музыкалық стиль мен дәстүрде орындауға және осы әнге бейнебаян түсіруге ұсыныс берген. Эбби Райттың айтуынша, жобаға қатысушылардың барлығы, оның ішінде өзі де, волонтер болып табылады. Бұл ауқымды жобаның мақсаты - әлемнің әр түкпір-түкпірінен түсірілген музыкалық бейнебаян жинағын жасап, оны ірі экологиялық ұйымдар мен танымал музыканттардың ғаламдық желісі арқылы атақты платформаларда көрсету. Осы арқылы планетамызға төніп тұрған климаттық және экологиялық қауіпке бүкіл әлем халықтарының назарын аудартып, қоршаған ортаны қорғауға әрбір жеке адамның жауапты екенін түсіндіруге тырысу, адамдарды «жасыл» шешім қабылдауға шабыттандыру, сондай-ақ бүкіл адамзат баласын табиғатты белсенді қорғауға жұмылдыру болып табылады.

Бейнебаян түсірілімінің орны еліміздің әдемі табиғатын бейнелейтін жерде немесе жеке экологиялық дағдарысқа назар аудару үшін белгілі бір жерде болуы мүмкін. Дайындалған материал БАҚ-та және БҰҰ-ның Климаттың өзгеруі туралы негіздемелік конвенциясының тараптары Конференциясының келесі 27-сессиясы сияқты ірі халықаралық іс-шараларда көрсетілетін болады. Эбби Райт музыкалық бейнебаянды үстіміздегі жылдың 15-ші сәуіріне дейін түсіру қажет екенін атап өтті. Сондай-ақ, Эбби Райттың айтуынша әннің авторлары бұл әнге ешқандай авторлық құқық талап етпейтіндіктен, орындаушылар аталған әнді емін-еркін орындап, өздері қалаған кез-келген әлеуметтік желілерде жүктей алады. Осы келіп түскен өтінішке орай, Елшілік қазақтың халық және эстрада әндерін дәстүрлі мәнерде әрі заманауи нақышта орындайтын әнші мен өнер иесі қазақстандық әнші, Қазақстанның еңбек сіңірген қайраткері Тамара Асар Қалниязқызына жоғарыда аталған ғаламдық музыкалық жобаға еліміздің атынан қатысуын сұраған болатын.

Әннің нотасын және ағылшын тіліндегі сөзі мен қазақ тіліндегі жолма жол аудармасы, әннің демосы мен басқа елдердің өкілдері (әншілері мен музыкалық топтары) орындаған нұсқаларына сілтемелерді Тамара Асар Қалниязқызына жолданды.
Өз кезегінде Тамара Асар аталған жобаға қатысуға келісімін берді. Қазіргі кезде әннің саундтрегі дайын, ал әнге түсірілген бейнематериал монтаждау сатысынан өтіп, алдымыздағы күндері дайын болады деп күтілуде.

Аталған креативтік шараға - «Resolution» ғаламдық музыкалық жобасына Қазақстанның қатысуы еліміздің қоршаған ортаны қорғау сияқты өзектi мәселеге ат салысып, халықтың назарын аудартып, табиғатымызды аялауға үлес қоса алады деген сенімдеміз.